Unang Domingo sa Kwaresma

Unang Domingo sa Kwaresma

PASIUNA

PEBRERO 18, 2024

Maayong buntag/hapon mga igsuon diha ni Cristo.

Ania na kita sa Unang Domingo sa Kwaresma

Ang unang pagbasa gikuha gikan sa Basahon sa Genesis. Dinhi atong madungog nga ang Dios naghimo'g kasabotan tali kang Noe, ug sa iyang mga anak, ug sa tanang mga binuhat nga buhi.

Ang ikaduhang pagbasa gikuha gikan sa Unang Sulat ni San Pedro. Siya nagkanayon, "Ang bunyag nagluwas kaninyo pinaagi sa pagkabanhaw ni Jesuscristo."

Ang ebanghelyo gikuha gikan sa Balaan nga Ebanghelyo sumala ni San Marcos. Dinhi usab atong madungog si Jesus miingon, "Paghinulsol kamo ug tuohi ninyo ang maayong balita!"

Palihug manindog alang sa pagsugod sa Santos nga Eyukaristiya.

Salmo Responsoryo: 

Ang imong Dalan, O Ginoo, gugma ug kamatuoran, alang kanila nga nagbantay sa imong kasabutan.

Katilingbanong Pag-ampo:

Amahan, luwasa kami sa tanang dautan.

BASAHON I
Gn. 9:8-15

KINUTLO GIKAN SA BASAHON SA GENESIS

Unya ang Dios miingon kang Noe ug sa iyang mga anak, "Himoon ko na karon ang akong kasabutan tali kaninyo ug kanako ug sa inyong mga kaliwat, ingon man sa tanang binuhat nga buhi uban kaninyo ang mga langgam, mga kahayopan, ug mga ihalas nga mga mananap-tanan gayod nga nanggawas sa arka. Himoon ko ang akong kasabutan tali kaninyo ug kanako: isaad ko nga dili na gayod puohon pinaagi sa lunop ang tanang binuhat nga buhi. Dili na gayod laglagon ang kalibutan pinaagi sa lunop." Ug ang Dios miingon, "Agig timaan sa walay katapusang kasabutan nga akong gihimo tali kanako ug kaninyo ingon man sa tanang mananap, palutawon ko ang akong bangaw diha sa kapanganoran. Timaan kini sa kasabutan tali kanako ug sa kalibutan. Kon tigomon ko na gani ang mga panganod diha sa langit ug makita diha niini ang bangaw, hinumdoman ko ang akong gisaad kaninyo ug sa tanang mananap nga dili ko na gayod laglagon pinaagig lunop ang tanang binuhat."

ANG PULONG SA GINOO.

SALMO RESPONSORYO

Ps. 25:4-5, 6-7, 8-9

R. Ang imong dalan, O Ginoo, gugma ug kamatuoran, alang kanila nga naga- bantay sa imong kasabutan.

Ipaila kanako, O Ginoo, ang imong kadalanan; tudloi ako sa imong mga agianan, Agaka ako diha sa imong kamatuoran ug tudloi ako. kay ikaw man ang Dios nga akong manluluwas.

R. Ang imong dalan, O Ginoo, gugma ug kamatuoran, alang kanila nga naga- bantay sa imong kasabutan. 

Hinumdomi nga ang imong kaluoy, O Ginoo, ug ang imong kaayo sukad pa kaniadto. Sa imong kaluoy hinumdomi ako, tungod sa imong kaayo, O Ginoo.

R. Ang imong dalan, O Ginoo, gugma ug kamatuoran, alang kanila nga naga- bantay sa imong kasabutan.

Maayo ug matarong ang Ginoo; sa ingon niini iyang gitudloan ang makasasala sa dalan.

Iyang giagak ang mapaubsanon ngadto sa katarong, iyang gitudloan ang mapaubsanon sa iyang dalan.

R. Ang imong dalan, O Ginoo, gugma ug kamatuoran, alang kanila nga naga- bantay sa imong kasabutan.

BASAHON II

1 Pt. 3:18-22

KINUTLO GIKAN SA UNANG SULAT NI SAN PEDRO

Kay si Cristo mismo namatay sa makausa lamang tungod sa atong mga sala, ang matarong alang sa mga dili matarong, aron pagdala kanato ngadto sa Dios. Gipatay siya ingon nga tawo, apan gibanhaw ingon nga espiritu; ug sa iyang espirituhanong kahimtang miadto siya ug nagwali sa mga espiritu nga nabilanggo. Mao kini ang mga espiritu sa mga tawo nga misupil sa Dios samtang siya mapailubon nga naghulat kanila sa diha nga si Noe naghimo sa arka. Walo lamang ka tawo ang misulod sa arka ug naluwas sa tubig nga naghulagway sa bunyag nga karon nagluwas kaninyo, dili pinaagi sa paghugas sa buling sa inyong lawas, kondili pinaagi sa saad nga gihimo ngadto sa Dios gikan sa usa ka maayong konsiyensya. Ang bunyag nagluwas kaninyo pinaagi sa pagkabanhaw ni Jesucristo nga miadto sa langit ug atua na sa tuo sa Dios, naghari sa mga anghel ug sa mga langitnong gahom.

ANG PULONG SA GINOO.

EBANGHELYO

Mk.1:12-15

Kinutlo gikan sa Balaan nga Ebanghelyo sumala ni Marcos

Ug dihadiha ang Espiritu midala kang Jesus ngadto sa kamingawan.

Ug didto siya sa kamingawan sulòd sa kap-atan ka adlaw, gitental ni Satanas. Ug ubàn siya sa mga maidlas nga mananap, ug ang mga anghel nag-alagad kaniya.

Ug human mabilanggo si Juan, miadto si Jesus ngadto sa Galilea, nagmantala sa maayong balita sa Ginoo ug nag-ingon, "Natuman na ang panahon ug taliabot na ang gingharian sa Dios. Paghinulsol kamo ug tuòhi ninyo ang maayong balita!"

Ang Ebanghelyo sa Ginoo.

KATILINGBANONG PAG-AMPO

PEBRERO 18, 2024

Pari: Mga igsuon, mag-ampo kita ngadto sa atong Langitnong Amahan aron mamahimo kitang matinud-anon sa pagsunod sa lyang Bugtong Anak, si Jesucristo nga atong Ginoo. Sa matag pangamuyo, kita moingon:

AMAHAN, LUWASA KAMI SA TANANG DAUTAN.

1. Alang sa Simbahan ug ang mga pangulo niini ilabina si Papa Francisco, mga Obispo, ug mga Pari, mamahimo unta silang panig-ingnan sa katawhan, aron magpabilin kini nga lig-on bisan taliwala sa daghang mga panghulga ug buot mobahinbahin sa katilingban. Mag-ampo kita sa Ginoo.

2. Alang sa mga tawo nga anaa sa kagamhanan ilabi na ang mga lideres sa atong nasud, makadawat unta sila og igong kaalam diha sa pag-alagad sa mga katawhan. Mag-ampo kita sa Ginoo.

3. Alang sa matag pamilya, nga niining pagsaulog sa Bulan sa Pro-Life, lamdagan sa Espiritu Santo ang matag miyembro niini aron molambo ang paghigugma sa kinabuhi ug sa matag usa ug ang pagpuyo sa pagkabinunyagan. Mag-ampo kita sa Ginoo.

4. Alang sa mga nagmasakiton ug kadtong mga masakiton nga gitintal sa pagbiya sa ilang pagtuo sa Dios tungod sa maong kahimtang, makasinati unta sa makaluluwas nga gahum sa Dios pinaagi sa mga tawo nga nag-amoma kanila. Mag-ampo kita sa Ginoo.

5. Alang sa mga nagadayeg ug nagapasalamat sa Dios ilabina sila _ makadawat unta sa grasya nga ilang gikinahanglan sa matag adlaw. Mag-ampo kita sa Ginoo.

6. Alang sa atong mga igsuong nangamatay ilabina nila nga pasayluon sila sa sala ug paambiton sa kinabuhing dayon uban ni Cristo. Mag-ampo kita sa Ginoo.

Pari: Langitnong Amahan, lig-ona kami sa grasya nga among nadawat sa bunyag aron magmalahutayon kami sa pagsunod sa imong Anak niining kalibutana. Kini among gipangayo pinaagi ni Cristo nga among Ginoo. Amen.