IKAUNOM NGA DOMINGGO SA ORDINARYONG PANAHON

 IKAUNOM NGA DOMINGGO SA ORDINARYONG PANAHON

A. Unang Basahon
Levitico 13:1-2,44-46

Ang pagbasa gikuha gikan sa basahon sa Levitico.

Ang Ginoo miingon kang Moises ug kang Aaron, "Kon ang usa ka tawo may hubag o butoy o nuka ug mahimo kining sanla, dad-a siya ngadto sa pari nga usa sa mga anak ni Aaron. Ang butoy niya susihon sa pari. Kun ang balahibo diha sa butoy puti, nan, sanlahon siya ug busa hugaw. Ang pari kinahanglan nga mag-isip kaniya nga hugaw, ang sakit niya anaa sa iyang ulo."
"Ang sanlahon kinahanglan magsul-ob og gision nga sinina ug ipadunghay niya ang iyang buhok, ug tabonan niya ang ibabaw niyang ngabil ug moingon siya sa kusog nga tingog, 'Hugaw ako! Hugaw ako!" Magpabilin siyang hugaw samtang anaa pa kaniya ang sakit. Ug kay hugaw man siya, magpuyo siya nga mag-inusara sa usa ka puloy-anan sa gawas sa kampo.

Mga igsoon, ang Pulong sa Ginoo.

B. Salmo Responsoryo
Salmo 32:1-2,5-11

Tubag (R) Sa panahon sa kagul-anan nagadangop ako kanimo, Ginoo, ug gipuno mo ako sa kalipay sa kaluwasan.
Bulahan ang tawo, kansang kalapasan gipapas, kansang sala gitabonan. Bulahan ang tawo, nga wala pasanginli'g sala sa Ginoo, kansang espiritu walay kasal-anan. (R)

Unya giila ko ang akong sala sa imong atubangan, ang akong kalapasan wala nako ilimod. Miingon ako, "Itug-an ko ang akong mga sala ngadto sa Ginoo" ug imong gikuha ang akong sala. (R)

Paglipay diha sa Ginoo ug pagsadya, kamong mga matarong; pagsadya kamong tanang mga matarong og kasingkasing. (R)

C. Ikaduhang Basahon

1 Corinto 10:31-11:1

Ang pagbasa gikuha gikan sa unang sulat ni San Pablo ngadto sa taga- Corinto.

Busa kon mokaon o moinom kamo o magbuhat bisan unsa, buhata ang tanan sa pagpasidungog sa Dios. Paningkamoti nga dili kamo makaangin sa pagpakasala sa mga Judeo ug sa dili mga Judeo o sa Simbahan sa Dios. Sunda ang akong gibuhat: gipaningkamotan ko ang pagpahimuot sa tanang tawo sa tanan kong gibuhat, sa walay paghunahuna sa kaugalingon kong kaayohan, kondili sa kaayohan sa tanan aron sila maluwas.

Busa, sunda ninyo ang akong panig-ingnan sama nga ako usab nagsunod sa panig-ingnan ni Kristo.

Mga igsoon, ang Pulong sa Ginoo.

D. Ebanghelyo

Marcos 1:40-45

Ang pagsangyaw sa Maayong Balita sumala ni San Marcos.

May usa ka sanlahon nga miduol kang Jesus, miluhod, ug mihangyo sa iyang panabang. Siya miingon, "Kon buot ka, makaayo ka kanako."

Naluoy si Jesus kaniya, ug gihikap niya ang sanlahon ug miingon, "Buot ko. Mamaayo ka!" Dihadiha naayo ang sanlahon. Unya gipalakaw siya ni Jesus ug gipahimangnoan pag-ayo, "Ayaw kini isugilon kang bisan kinsa, apan adtoa dayon ang pari ug pagpahiling kaniya. Unya paghalad sumala sa gisugo ni Moises aron pagmatuod sa tanan nga naayo ka na."

Apan milakaw ang tawo ug nanugilon hinoon sa tanang katawhan mahitungod sa nahitabo. Hilabihan gayud niyang panugilon ug tungod niini, si Jesus dili na makapasayasaya pagsulod sa lungsod. Nagpabilin na lamang siya sa mga dapit nga awaaw ug nangadto kaniya ang mga tawo nga gikan sa nagkalainlaing dapit.

Mga igsoon, ang Maayong Balita sa atong Ginoo.

E. Komentaryo

Tema: Paglikay sa Usa ka Sakit nga Mananakod!

Ang atong Ebanghelyo karon, naghisgot sa usa ka sanglahon nga miduol kang Jesus nga adunay dakung pagsalig nga siya mamaayo sa iyang sakit. Ang sanglahon miluhod sa atubangan sa atong Ginoo ug mihangyo, "Kung buot Mo, mamaayo ako". Ang gibuhat sa maong sanglahon nagpakita sa iyang pagkamapaubsanon ug tim-os nga pagtoo ngadto sa Dios.

Ang sanglahon mitugyan sa iyang kaugalingon ngadto kang Jesus. Kini nagpakita nga siya miila sa gahum sa Dios, ug siya mitugyan sa iyang kaugalingon ngadto sa kabubut-on sa Ginoo.

Si Jesus natandog ug nalooy sa sanglahon busa Iya kining gihikap og miingon: "Buot Ko nga mamaayo ka."

Siguro dili kita mga sanglahon sa gawasnong aspeto sa atong pagkatawo, apan mga sanglahon kita tungod sa atong pagkamakasasala. Sa matag adlaw sa atong kinabuhi nga kita nagbuhat sa mga butang nga wala nahisubay sa kabubut-on sa Dios kita nahimong sanglahon. Ang sala usa ka sakit nga mananakod nga mokuyanap sa atong galamhan nga kung dili nato kini mabantayan maghatag kini og kasakitan sa atong lawas ilabina sa espirituhanong bahin niini. Kasagaran kanato dili lang kita magpakabana niini. Apan dili lang nato mahibaloan nga kini mikuyanap na sa atong kaugalingon nga lisod na pagaayohon. Labaw pa kini sa sakit nga sangla kay kini mokutkot man sa atong kalag ug magdala kanato ngadto sa kamatayon.

Ang pag-ayo ni Jesus sa sanglahon, nagpakita nga siya mianhi sa kalibutan aron sa pagtambal sa atong mga sakit aron kita maluwas sa kamatayon sa sala pinaagi sa Iyang kamatayon sa krus. Si Jesus nagkinahanglan lamang sa atong tim-os nga pagsalig ngadto Kaniya ug sa atong mapaubsanong kasingkasing.

Matag adlaw, atong mahimamat kanunay ang Dios ilabina diha sa Santos nga Yukaristiya. Kini maoy matuod nga tambal sa atong mga espirituhanong balatian sa atong lawas. Naghatag kini og kabaskog ug kalig-on aron kita makabatok sa tentasyon sa pagpakasala. Mao nga sa kanunay giawhag kita sa Dios nga mapaubsanong moduol Kaniya uban sa dakong pagtoo nga Siya moayo sa atong pagkamakasasala. Dili unta kita magduhaduha sa pagpakighiusa Kaniya kay Siya andam kanunay sa pagtabang ug pag-ayo kanato tungod kay ang Iyang dakong gugma alang kanato walay utlanan. Hinaut pa unta.

Giya alang sa Pamalandong:

1. Nakabaton ba kita og usa ka sakit nga mananakod nga mao ang sala?

2. Mitoo ug misalig ba kita sa gahum sa Dios nga maoy epektibong makaayo niini sama sa makanunayon natong pag-apil sa Santos nga Yukaristiya?

F. Katilingbanong Pag-ampo

Pangulo: Mag-ampo kita sa atong Makagagahum nga Amahan ang tinubdan sa tanang grasya ug kaayohan ug atong ihalad Kaniya ang atong mga panginahanglan. Sa matag pag-ampo kita motubag: DIOS SA GUGMA DUNGGA KAMI.

1. Sa tanang tinugyanan sa Simbahan ilabina ang Santo Papa, mga Obispo ug kaparian nga sa kanunay mahatagan unta nila og kongkreto nga ehemplo ang mga pagtulon-an ni Kristo nga ilang gisangyaw sa katawhan. Kami nagaampo...

2. Sa tanan nga Imong gihatagan og tahas sa pagdumala sa Imong katawhan nga makabaton sila og igong katakus sa paghupot og makiangayon nga gahum alang sa kaayohan sa tanan. Kami nagaampo...

3. Sa tanan nga Imong gitawag aron sa pag- atiman sa Imong kabuhatan ilabina dinhi sa among katilingban nga sa kanunay sila madasig ug makabaton og kalig- on sa hunahuna ug kasingkasing aron molahutay sila sa ilang gimbuhaton. Kami nagaampo...

4. Sa atong mga igsoon nga nag-antus sa nagkalainlaing kasakitan sa kinabuhi nga malig-on unta ang ilang pagtoo nga Ikaw O Dios mao ra gayud ang makahupay sa ilang mga kalisdanan pinaagi sa mga instrumento nga Imong gipadala kanila. Kami nagaampo...

5. Sa tanan Nimong katawhan nga Imong gitigom karon makabaton unta sa hiyas sa pagkamahigugmaon ug makiangayon alang sa kahiusahan sa usag usa. Kami nagaampo...

6. Sa tanan namong panginahanglan nga dili namo malitok sa pulong amo kining ihalad Kanimo diha sa kahilum.

Pangulo: Langitnon nga Amahan pinaagi ni Kristo among nasinati kon unsa Ikaw ka duol sa matag usa kanamo. Itugot nga amo nang maangkon ang grasya nga Imong gitagana kanamo nga nahisubay sa Imong kabubut-on. Amen