Miyerkoles sa Badlis

LENTEN SEASON

Miyerkoles sa Badlis

PASIUNA

MIYERKOLES SA BADLIS

PEBRERO 14, 2024

Maayong Gabii mga igsuon ko diha ni Cristo.

Karong adlawa gisugdan sa tibuok Simbahan ang Panahon sa Kwaresma pinaagi niining pagsaulog sa Miyerkoles sa Badlis.

Ang Unang Pagbasa gikuha gikan sa Basahon ni Propeta Joel. Dinhi atong madungog nga nag-ingon ang Ginoo, "Apan bisan karon, paghinulsol kamo sa kinasingkasing ug balik kanako nga magpuasa, maghilak ug magbangotan..."

Ang Ikaduhang Pagbasa gikuha gikan sa ikaduhang Sulat ni San Pablo ngadto sa taga-Corinto. Siya nagpahinumdum ngadto kanila sa pakighiusa kang Cristo aron nga makaambit sa kamatuoran sa Dios.

Ang ebanghelyo gikuha gikan sa Santos nga Ebanghelyo sumala ni San Mateo. Si Jesus nagpahinumdum sa iyang mga tinun-an mahitungod sa tulo ka relihiyosong mga buhat; ang pagpaambit, pag-ampo ug pagpuasa.

Palihug manindog alang sa pagsugod sa Santos nga Eyukaristiya.

Salmo Responsoryo:

Maluoy ka Ginoo, kay nakasala kami.

Katilingbanong Pag-ampo:

Amahan, kabiga kami balik diha kanimo.

BASAHON I

Jl. 2:12-18

KINUTLO GIKAN SA BASAHON NI PROPETA JOEL

Nag-ingon ang GINOO, "Apan bisan karon, paghinulsol kamo sa kinasingkasing ug balik kanako nga magpuasa, maghilak ug magbangotan.

Gisia ang inyong kasingkasing inay ang inyong bisti."

Balik sa GINOO nga inyong Dios, kay maluluy-on siya kaayo, mapailubon ug matinumanon sa saad; andam siya sa pagpasaylo, ug dili sa pagsilot. Basin pag maluoy siya kanato ug panalanginan niya ang atong mga uma

aron may trigo ug bino kita nga ikahalad kaniya.

Patingoga ang trumpeta sa Bukid sa Sion; sugoa ang katawhan sa pagpuasa; tigoma sila aron pagsimba.

Tigoma sila ug andama sa usa ka balaang panagtigom; iapil ang mga tigulang, ang mga kabataan, lakip ang mga masuso.

Bisan ang bag-o pang gikasal kinahanglan moapil sa maong tigom.

Ang mga pari nga nag-alagad sa GINOO sa tungatunga sa pultahan ug sa halaran sa Templo kinahanglan maghilak ug mag-ampo;

"GINOO, kaloy-i intawon ang katawhan mo.

Ayaw itugot nga kami tamayon ug biaybiayon sa ubang mga nasod ug ingnon, 'Hain na man ang inyong Dios?'"

Unya gipakita sa GINOO

nga nahingawa siya sa iyang yuta ug naluoy. sa iyang katawhan.

ANG PULONG SA GINOO.

SALMO RESPONSORYO

Ps. 51:3-4, 5-6, 12-13, 14, 17

R. Maluoy ka Ginoo, kay nakasala kami.

Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan. Hugasi akog maayo sa akong kasaypanan, ug linisi ako sa akong kasal-anan.

R. Maluoy ka Ginoo, kay nakasala kami.

Kay giila ko ang akong kalapasan, ug ang akong sala kanunay ania sa akong atubangan:

"Kanimo lamang nakasala ako, ug nakabuhat og dautan sa imong atubangan."

R. Maluoy ka Ginoo, kay nakasala kami.

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu.

R. Maluoy ka Ginoo, kay nakasala kami.

Ibalik kanako ang kasadya sa imong kaluwasan, ug padayona dinhi kanako ang mauyonong espiritu.

O Ginoo, ablihi ang akong mga ngabil, ug ang akong baba magsangyaw sa imong pagdayeg.

R. Maluoy ka Ginoo, kay nakasala kami.

BASAHON II

2 Cor. 5:20-6:2

KINUTLO GIKAN SA IKADUHANG SULAT NI SAN PABLO NGADTO SA TAGA-CORINTO

Ania kami gipadala ni Cristo, ug sama ra nga ang Dios gayod ang nangaliyupo kaninyo pinaagi kanamo. Sa ngalan ni Cristo, hangyoon kamo namo nga makig- uli kamo sa Dios. Walay sala si Cristo, apan gipaambit siya sa Dios sa atong sala aron kita, sa atong pagkahiusa kaniya, makaambit sa pagkamatarong sa Dios.

Busa ingon nga mga katabang sa Dios, naghangyo kami kaninyo nga dili ninyo usikan ang grasya sa Dios nga inyong nadawat. Kay nag-ingon ang Dios, "Gidungog ko kamo sa takna nga akong gikahimut-an, Gitabangan ko kamo sa adlaw sa kaluwasan."

Mao na kini ang takna sa pagdawat sa kaluoy sa Dios; karon mao ang adlaw sa kaluwasan!

ANG PULONG SA GINΟΟ.

EBANGHELYO

Mt. 6:1-6,16-18

Kinutlo gikan sa Balaan nga Ebanghelyo sumala ni Mateo

Miingon si Jesus sa iyang mga tinun-an: 

"Matngoni ninyo nga dili himoon atubangan sa mga tawo ang inyong mga buhat sa pagkamatarong aron lamang ilang makita; kay kon ingon man lang gani niini, walâ na kamoy ganti nga madawat gikan sa inyong Amahan nga anaa sa langit.

"Busa kon mohatag ka og limos, ayaw ipalanog ang trumpeta sa imong atubangan ingon sa gibuhat sa mga tigpakaaron-ingnon diha sa mga sinagoga ug sa kadalanan, aron daygon sila sa mga tawo. Sa pagkatinuod, sultihan ko kamo, nadawat na nila ang ilang ganti. Apan sa imong paghatag og limos, ayaw pahibaloa ang imong wala nga kamot kon unsa ang gibuhat sa imong tuò nga kamot aron ang imong limos mahitabo diha sa tago; ug ang imong Amahan nga nagtan-aw diha sa tago moganti kanimo.

"Kon mag-ampo gani kamo, ayaw panig-ingon sa mga tigpakaaron-ingnon, nga gustong mag-ampo nga nagtindog diha sa mga sinagoga ug diha sa mga eskina sa kadalanan, aron makita sila sa mga tawo. Sa pagkatinuod, sultihan ko kamo, nadawat na nila ang ilang ganti. Apan kon ikaw mag-ampo, sulòd diha sa imong lawak, ug sa sinirhan na ang imong pultahan, pag-ampo ngadto sa imong Amahan diha sa tago; ug ang imong Amahan nga nagtan-aw diha sa tago moganti kanimo.

"Ug kon magpuasa kamo, ayaw kamo paghimo sama sa mga tigpakaaron-ingnon nga masulub-on og dagway kay gipakita nila ang panagway nga gutom aron makita sa mga tawo nga nagpuasa sila. Sa pagkatinuod, sultihan ko kamo, nadawat na nila ang ilang ganti. Apan kon ikaw magpuasa, pagdihog sa imong ulo ug panghilam-os sa imong nawong, aron dili makakita ang mga tawo nga nagpuasa ka, kondili ang imong Amahan nga anaa sa tago; ug ang imong Amahan nga nagtan-aw sa tago moganti kanimo."

Ang Ebanghelyo sa Ginoo.

Katilingbanong Pag-ampo

Miyerkoles sa Badlis

Pebrero 14, 2024

Pari: Ang paghinulsol sa panahon sa Kwaresma nagsugod na. Ang timaan sa nabinditahan nga agiw nagdapit kanato sa pag-tubag sa tawag sa Dios nga kita mobalik ngadto kaniya sa tibuok natong kasingkasing. Atong ihatud ngadto sa Amahan ang atong tinguha sa pagbag-o. Sa matag pag- ampo kita moingon:

AMAHAN, KABIGA KAMI BALIK DIHA KΑΝΙΜΟ.

1. Nga ang mga lideres sa atong Simbahan ilabina si Papa Francisco, mga Obispo ug mga Pari, mamahimong instrumento sa pakighiusa kang Cristo. Mag-ampo kita.

2. Nga ang mga lideres sa atong nasud, makabaton og kalinaw sa hunahuna ug kasingkasing diha sa ilang mga desisyon alang sa kaayohan sa tanan. Mag- ampo kita.

3. Nga ang mga binunyagan modangop unta diha sa Sakramento sa Pakighiuli ilabina niining panahon sa grasya ug pagbag-o. Mag-ampo kita.

4. Nga kitang tanan makapakita og talagsaong pag-amoma sa mga masakiton ug sa mga sinalikway sa katilingban. Mag-ampo kita.

5. Nga ang mga mapasalamaton sa Ginoo ug nagadayeg kaniya ilabina sila ____ mamahimong abli ang ilang mga mata sa panginahanglan sa mga kabus pinaagi sa paglimos ug bug-os nga kamanggihatagon. Mag-ampo kita.

6. Nga ang atong mga minahal nga nangamatay ilabina nila _____  makapahimulos na unta sa kalipay didto sa langit. Mag-ampo kita.

Pari: Ginoo sa kaluoy, lantawa ang mga pangaliyupo niining imong mahinolsulong katawhan. Hinaut pa unta nga ang agiw nga among nadawat karon maghulagway sa among matuod nga pagtahan sa kaugalingon sa pagtuman sa imong kabubut-on. Unta ang among pagsalikway sa kaugalingon magapadayag sa among tinguha sa pagpakamatay kaugalingon aron kami makapuyo sa imong Diosnong kinabuhi. Kini among gipangayo pinaagi ni Cristo among Ginoo. Amen.