SANTO NIÑO

 SANTO NIÑO

A. Unang Basahon
Isaias 9:1-6

Ang pagbasa gikuha gikan sa basahon ni Propeta Isaias.

Ang katawhan nga kaniadto naglakaw sa kangitngit nakakita'g dakung kahayag; ang nagpuyo sa mangi-ob nga dapit gisidlakan na sa kahayag. Gipadaghan mo ang mga molupyo sa nasud, Ginoo, nagmaya sila diha sa imong atubangan; sama sa pagmaya sa mga tawo inigkating-ani na ug ingon nga maglipay ang tawo inigbahinbahin nila sa ilang inilog. Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti nga nagdaugdaug kaniya. Kay sunugon daw sugnod ang tanang sapatos sa mga sundalo nga nagpaingon sa gubat, ingon man ang tanang sapot nga nabasa sa dugo. Kay natawo alang kanato ang usa ka bata, gihatag kanato ang usa ka anak lalaki; ug siya ang magmando sa tanan, ug hinganlan siya'g, "Maalamong Magtatambag," "Dios nga Gamhanan," "Walay Katapusang Amahan," "Prinsipe sa Pakigdait."

Mga igsoon, ang Pulong sa Ginoo.

B. Salmo Responsoryo
Salmo 98:1,2-3,3-4,5-6

Tubag (R) - Ang tanang katawhan sa tibook kalibutan, nakakita sa kadaugan sa atong Dios.

Awiti'g bag-ong awit ang Ginoo; kay nagbuhat siya'g katingalahang W mga butang! Pinaagi sa iyang gahum ug balaang kusog, nakab-ot niya ang kadaugan. (R)

Gipahayag sa Ginoo ang iyang pagdaug, gipaila niya sa kanasuran ang iyang makaluwas nga gahum. Gituman niya ang iyang saad sa katawhan sa Israel, uban sa walay paglubad nga gugma ug pagkamaunongon. (R)

Nakakita sa kadaugan sa atong Dios ang tanang katawhan sa kalibutan! Pag-awit kamo nga malipayon ngadto sa Ginoo, kamong tanang katawhan; dayga siya pinaagi sa mga awit ug mga singgit sa kalipay. (R)

Dayga ang Ginoo dinuyogan sa mga alpa; pagtugtog og huni diha sa mga alpa! Bulhota ang mga trumpeta ug mga budyong ug singgit sa kalipay atubangan sa Ginoo, ang atong hari! (R)

C. Ikaduhang Basahon

Efeso 1:3-6,15-18

Ang pagbasa gikuha gikan sa sulat ni San Pablo ngadto sa mga taga- Efeso.

Magpasalamat kita sa Dios ug Amahan sa atong Ginoong Jesukristo nga nagpanalangin kanato sa tanang espirituhanong gasa sa langit diha sa atong pagkahiusa kang Kristo. Sa wala pa buhata ang kalibutan gipili na kita sa Dios aron maiya diha ni Kristo, aron mabalaan kita ug mawalay sala sa iyang atubangan. Tungod sa iyang gugma, daan nang gibut-an sa Dios nga sagupon kita niya nga mga anak pinaagi ni Jesukristo - mao kini ang iyang gikahimut-an ug tuyo. Daygon nato ang Dios tungod sa iyang labihang pagtagad kanato pinaagi sa iyang hinigugmang anak.

Tungod niini, sukad sa pagkadungog ko nga mituo kamo sa Ginoong Jesus ug nahigugma sa tanang katawhan sa Dios, wala akoy hunong sa pagpasalamat sa Dios tungod kaninyo. Gihinumduman ko kamo sa akong mga pag-ampo, ug naghangyo ako sa Dios sa atong Ginoong Jesukristo, ang gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong mga salabutan aron masayud kamo unsa ang paglaum nga alang niini gitawag kamo. Ug hinaut usab unta nga masayud kamo sa kapuno sa mga panalangin nga gisaad niya sa iyang katawhan.

Mga igsoon, ang Pulong sa Ginoo.

Ebanghelyo

Marcos 10:13-16

Ang pagsangaw sa Maayong Balita sumala ni San Marcos.

May pipila ka tawo nga nagdala'g mga bata ngadto kang Jesus aron sila hikapon niya, apan gikasab-an sila sa mga tinun-an. Sa pagka-alinggat ni Jesus niini, nasuko siya ug miingon sa iyang mga tinun-an, "Paanhi-a kanako ang mga bata. Ayaw silag did-i, kay ang gingharian sa Dios ila sa sama niining mga bata. Timan-i ninyo kini: ang dili modawat sa paghari sa Dios sama sa usa ka bata, dili mahisakop niini." Unya iyang gipangugos ang mga bata, gitapion ang iyang mga kamot kanila, ug gipanalanginan sila.

Mga igsoon, ang Maayong Balita sa atong Ginoo.

E. Komentaryo

Tema: Senyor Santo Niño, ang Batang Jesus.

Kon nakamatngon kita niadtong miaging mga Misa de Gallo sa nagkalain-lain nga mga parokya sa atong siyudad, makita gayud nato ang bagang hut-ong sa katawhan nga nanimba. Gikan sa unang adlaw hangtud sa ikasiyam, walay puas ang mga tawo nga nanambong sa Misa ug nakapuno sa atong mga simbahan. Daghan ang pangutana kon ngano nga nahitabo kini? May mitubag nga kini nahitabo tungod sa kalisud sa atong panahon karon. Ang mga tawo naningkamot nga maka-kompleto sa siyam ka adlaw aron makaangkon og dugang grasya, ilabi na pinansyal o salapi. May miingon usab nga kini tungod kay dinhi sa atong siyudad, walay nay kagubot o pagpabuto sa rebentador. Diha sa mga naglihok sa

Simbahan, may miingon nga pagtoo ang hinungdan kon nganong daghan ang misimba. May usa ka magsusulat nag-ingon nga ang Pilipinas daw mao

ang duyan sa Kristohanong pagtoo sa Asia ("Cradle of Christianity in Asia"), tungod kay ang Kristiyanismo dinhi man una nga nakagamot sa atong nasud. Apan misumpay siya sa pag-ingon nga nagpabilin lang gihapon kita nga duyan sa bata, ug wala makatubo sa atong pagka-Kristiyano. Bug-at kini nga pagsumada sa atong Kristohanong pagtoo.

Kon kita ang pasumadahon sa atong Kristohanong pagtoo, unsa kaha kita, bata pa ba o hamtong na? Kini matubag nato pinaagi sa pag-usisa sa atong kahimtang o kinabuhi isip sumusunod ni Kristo. Matud pa sa atong Ebanghelyo karon ang hamtong nga pagtoo nagkinahanglan og kinaiya sa usa ka bata. Wala kini nagpasabot nga magbinata na lang kita aron malig-on sa atong pagtoo. Ang buot ipasabot niini nga pinaagi sa kinaiya sa usa ka bata: ang iyang pagkamasinugtanon sa iyang ginikanan; ang iyang pagka-yano,pagka-inosente, pagkamapaubsanon,ug ang iyang pagka-maayong sumusunod sa iyang mga labaw, maoy atong pagasundon sa atong pagtubo diha sa pagtoo. Kining mga kinaiya mao man gayud ang nakapahimo sa mga bata nga haduol sa kasingkasing ni Jesus. Mipuno pa gani si Jesus sa pag-ingon, "Timan-i ninyo kini: ang dili modawat sa paghari sa Dios sama sa usa ka bata, dili mahisakop niini, (sa Gingharian sa Dios).

Ang kapistahan sa Senyor Santo Niño nagpahinumdum kanato karon nga si Jesus nahimong bata sama kanato. Miipon ug mitubo diha sa usa ka pamilyang tawhanon, ang pamilya ni Jose ug Maria. Ug miabot ang adlaw diin Iyang gituman ang misyon nga gihatag Kaniya sa Langitnong Amahan. Kini mao ang kaluwasan sa tanang katawhan gikan sa kaulipnan sa sala ug kamatayon. Kita usab maghimo sa ingon. Ang Batang Jesus diha sa atong mga altar magdala unta kanato ngadto sa kalamboan sa atong pagtoo ug pagpuyo nga Kristiyano niining panahon nato karon. Sa matag adlaw sa atong kinabuhi, atong daygon ang Dios ug pasalamatan sa gasa sa kinabuhi ug pagtoo. Dili na kinahanglan nga maghulat pa kita og Misa de Gallo sa Disyembre. Kada adlaw ug kada Dominggo, ang Santos nga Yukaristiya nag-awhag kanato sa pagpuyo kanunay sa Pulong sa Dios ug sa Lawas ug Dugo ni Kristo nga maoy atong kusog sa paglahutay sa atong pagsangyaw sa Maayong Balita.

Diha sa atong pagtambong sa Santos nga Misa, atong hinumduman ang Senyor Santo Niño nga andam motabang kanato aron mamahimo usab kita nga hamtong diha sa atong pagtoo ug sa atong paghigugma Kaniya. Amen.

Giya alang sa Pamalandong:

1. Isip mga binunyagan, nahamtong nab a kita sa atong pagtoo?

2. Giunsa man nato kini pagpadayag sa uban ilabina diha sa atong pamilya?

F. Katilingbanong Pag-ampo

Pangulo: Mga igsoon atol niining pagsaulog nato sa kapistahan sa Sto. Nino sa tumang pagpaubos atong ihalad sa atong maloloy-ong Amahan ang atong mga pag-ampo ug panginahanglan. Ug sa matag pangaliyupo kita motubag:

GINOO, PAMΑΤΙΑ ΚΑΜΙ.

1. Alang sa mga nagdumala sa atong Simbahan nga unta nga ang hiyas sa pagkamapaubsanon maoy maghari sa ilang galamhan sama sa ehemplo nga gipakita ni Kristo ang maayong magbalantay sa iyang panon. Mag-ampo kita.

2. Alangsa mga nagdumala sa atong nasud nga ang pagkamatinud-anon, pagkamapa- ubsanon ni Kristo maoy ilang sumbanan diha sa ilang pag-alagad sa tanan. Mag-ampo kita.

3. Alang sa tanang mga ginikanan nga unta ipadayag nila ang pagkamapaubsanon diha sa ilang pagtuman sa ilang kaakuhan sa paghigugma ug pag-agak sa ilang mga anak subay sa Diosnong pagtulon-an. Mag-ampo kita.

4. Alang sa nag-antus sa mga nagkadaiyang balatian sa lawas nga unta ilang masinati ang gugma sa Dios pinaagi sa mga tawo nga nag-amoma kanila. Mag-ampo kita.

5. Alangsamga batan-on nga untamamahimo silang mapaubsanon ug masunuron sa ilang mga ginikanan kinsa naghatag kanila sa maayong mga panig-ingnan pinasikad sa mga Kristohanong pangtulon-an. Mag- ampo kita.

6. Alang kanatong mga masalaypon nga unta makaamgo kita kanunay sa atong mga kalapasan ug dili kita magpanuko sa pagdawat kanunay sa Sakramento sa Pakig-uli diha sa makanunayon natong pagpangumpisal. Mag-ampo kita

Pangulo: Langitnong Amahan tudloi kami sa pagpaubos sa among kaugalingon aron sayon alang kanamo ang pagdawat ug pagpasidungog Kanimo sa mga grasya nga among madawat pinaagi ni Kristo among Ginoo sa kahangturan. Amen.