MISA SA ADLAW
MISA SA ADLAW
ABC
KINUTLO GIKAN SA BASAHON NI PROPETA ISAIAS
Pagkatahom sa mga tiil niadtong milatas sa kabukiran aron pagwali sa maayong balita, pagmantala sa pakigdait, pagdalag kalipay, ug pagsangyaw sa kaluwasan, ug miingon sa Sion,"Naghari ang imong Dios." Naninggit ang inyong mga magbalantay, nagdungan sila pag-awit sa kalipay, kay nakita gayod nila ang pagbalik sa GINOO ngadto sa Sion.
Pag-awit kamong tanan, kamong mga nagun-ob nga mga dapit sa Jerusalem kay gilipay na sa GINOO ang iyang katawhan, gitubos na niya ang Jerusalem.
Gipakita sa GINOO ang iyang balaang gahom atubangan sa kanasuran, ug ang tibuok kalibutan nakakita sa kaluwasan nga gikan sa atong Dios.
ANG PULONG SA GINOO.
Ps. 98:1, 2-3, 3-4, 5-6
R. Ang tanang kautlanan sa yuta nakakita sa makaluwas nga gahom sa Dios.
Awiti ang Ginoo og bag-ong awit, kay naghimo siya og katingalahang mga buhat; Ang iyang tuong kamut nakakab-ut og kadaugan alang kaniya, ang iyang balaan nga bukton.
R. Ang tanang kautlanan sa yuta nakakita sa makaluwas nga gahom sa Dios.
Ang Ginoo nagpahibalo sa iyang kaluwasan: sa atubangan sa kanasuran iyang gipahayag ang iyang katarong. Nahinumdom siya sa iyang kaluoy ug iyang kamatinud-anon, alang sa balay sa Israel.
R. Ang tanang kautlanan sa yuta nakakita sa makaluwas nga gahom sa Dios.
Ang tanang kautlanan sa yuta nakakita sa kaluwasan nga gihimo sa atong Dios. Awiti nga malipayon ang Ginoo, kamong tanang kayutaan; singgit kamo sa pag-awit, awit nga pagdayeg.
R. Ang tanang kautlanan sa yuta nakakita sa makaluwas nga gahom sa Dios.
Awitig pagdayeg ang Ginoo diha sa alpa, diha sa alpa ug sa mananoy nga awit. Diha sa trumpeta ug sa tingog sa budyong pag-awit kamo nga malipayon atubangan sa hari, ang Ginoo!
R. Ang tanang kautlanan sa yuta nakakita sa makaluwas nga gahom sa Dios.
Heb. 1:1-6
ANG SINUGDANAN SA SULAT NI SAN PABLO NGADTO SA MGA HEBREO
Sa karaang panahon misulti ang Dios ngadto sa atong mga katigulangan pinaagi sa mga propeta sa makadaghan ug sa nagkalainlaing mga paagi, apan niining katapusang mga adlaw misulti siya kanato pinaagi sa iyang Anak.
Pinaagi kaniya gibuhat sa Dios ang uniberso, ug gipili siya aron manag-iya sa tanang butang. Naglarawan siya sa himaya sa Dios, ug diha gayod kaniya ang kinaiya sa Dios. Siya maoy nagkupot sa tibuok uniberso pinaagi sa iyang gam- hanang pulong. Tapos niya hugasi ang mga tawo sa ilang mga sala, milingkod siya sa tuo sa Dios didto sa langit.
Ang Anak gihimong labaw pa kay sa mga anghel ingon nga gihatagan siya sa Dios og ngalan nga halangdon pa kay sa ngalan sa mga anghel. Kay wala gayod moingon ang Dios kang bisan kinsa sa iyang mga anghel, "Ikaw mao ang akong Anak; Karong adlawa naimo akong Amahan." Ni miingon ang Dios, "Ako maiyang Amahan, Ug siya maakong Anak."
Sa hapit na ipadala sa Dios ang iyang panganayng Anak nganhi sa kalibutan, miingon usab siya, "Kinahanglan mosimba kaniya ang tanang mga anghel sa Dios."
ANG PULONG SA GINOO.
Jn. 1: 1-18
Kinutlo gikan sa Balaan nga Ebanghelyo sumala ni Juan
(Tinaas)
Sa sinugdanan diha na ang pulong, ug ang pulong anaa uban sa Dios, ug Dios ang pulong.
Siya diha na sa sinugdanan uban sa Dios. Ang tanang mga butang gibuhat pinaagi kaniya, ug gawas kaniya wala gayoy binuhat nga nabuhat.
Diha kaniya ang kinabuhi, ug ang kinabuhi mao ang kahayag sa katawhan; ug ang kahayag nagadan-ag diha sa kangitngit, ug ang kangitngit wala makabuntog niini.
May usa ka tawo nga pinadala gikan sa Dios, ang iyang ngalan Juan. Siya mianhi aron mosaksi mahitungod sa kahayag, aron ang tanan motuo pinaagi kaniya. Dili kadto siya ang kahayag, apan aron magsaksi sa mahitungod kahayag.
Ang matuod nga kahayag nga nag-iwag sa matag tawo, mianhi na sa kali botan.
Diha na siya kalibotan, ug ang kalibotan nahimo pinaagi kaniya, apan ang kalibotan wala makaila kaniya. Mianhi siya sa iyang katawhan, ug ang iyang katawhan wala modawat kaniya.
Apan ang tanan nga midawat kaniya gitagaan niya sila og gahom nga mahimong mga anak sa Dios, sila nga nagatuo sa iyang ngalan, sila nga nangatawo dili gikan sa dugo ni gikan sa lawasnong kailibgon ni gikan sa tawhanong kabubut-on kondili gikan sa Dios.
Ug ang pulong nahimong tawo, ug nagtukod siya og tolda uban kanato. Nakita nato ang iyang himaya, himaya isip iya sa bugtong Anak, gikan sa Amahan, puno sa grasya ug kamatuoran.
Nagasaksi si Juan mahitungod kaniya ug misinggit nga nag-ingon, "Kini siya mao ang akong giingon, 'siya nga moabot sunod kanako nahauna pa kanako kay diha na man siya una pa kanako." Kay gikan sa iyang kahingpitan nakadawat kitang tanan og naghingapin nga grasya. Kay ang balaod gihatag pinaagi kang Moises, ang grasya ug ang kamatuoran miabot pinaagi kang Jesucristo.
Wala pa gayoy tawo nga nakakita sa Dios. Ang bugtong Anak, nga anaa sa dughan sa Amahan, kadto siya maoy nagpaila kaniya.
Ang Ebanghelyo sa Ginoo.
Pasko sa Pagkatawo The Nativity of the Lord (CHRISTMAS)-Misa sa Adlaw
Pari: Ang atong mga kasingkasing napuno sa kalipay sa atong pagsaulog sa Pagkatawo sa atong Ginoo ug Manunubos nga si Jesucristo. Uban sa atong mapasalamatong mga kasingkasing, kita mag-ampo ngadto sa Dios Amahan nga nagpadala sa iyang Anak aron pagtubos kanato. Sa matag pag-ampo, kita moingon:
DIOS NGA NAGPAKATAWO, LUWASA KAMI.
1. Alang sa Simbahan ilabina ang atong Santo Papa, Francisco, mga kaobispohan, kaparian ug mga relihiyoso, nga mamahimo silang buhing saksi sa iyang pagpakatawo ug pinaagi kanila makasinati ang katawhan sa kalibutan sa presensiya ni Jesus, ang Ginoo-nahimong tawo. Mag-ampo kita sa Ginoo.
2. Alang sa mga punoan sa panggamhanan, mamahimo unta silang instrumento sa kalinaw sa kalibutan. Mag-ampo kita sa Ginoo.
3. Alang sa mga dili Kristiyanos, makadawat unta sila ug makasinati sa grasya sa Dios, ang nahimong-tawo. Mag-ampo kita sa Ginoo.
4. Alang sa matag banay, makabaton unta sila og kalipay, kalinaw ug kaangayan niining panahon sa Pasko sa Pagkatawo. Mag-ampo kita sa Ginoo.
5. Alang sa mga kabus, masakiton ug mga tigulang, makakaplag unta sila og paglaum ug kalipay diha sa pag-abot sa Manunubos. Mag- ampo kita sa Ginoo.
6. Alang sa mga nagadayeg ug nagapasalamat sa Dios, ilabina nila _, magmalipayon unta sila diha sa ilang pagpaambit sa grasya sa Dios ngadto sa uban. Mag-ampo kita sa Ginoo.
7. Alang sa mga nangamatay, ilabina sila _ makaangkon unta sila og kaluwasan nga gidala ni Cristo sa kalibutan. Mag-ampo kita sa Ginoo.
Pari: Amahan, nagadayeg kami kanimo sa imong pagkatawo sa imong Anak nga among Manunubos. Himo-a siya nga among kahayag, kalipay ug kalinaw hangtod sa kahangturan. Itugot kini pinaagi ni Cristo nga among Ginoo. Amen.
Comments
Post a Comment