IKAUNOM NGA ADLAW SA MISA DE GALLO

IKAUNOM NGA ADLAW SA MISA DE GALLO

Disyembre 21

PASIUNA

Mga igsuon diha ni Cristo, maayong buntag kaninyong tanan.

Ania na kita sa Ika-tulo nga semana sa Adbiyento ug Ika-unom nga adlaw sa Misa de Gallo.

Ang unang pagbasa gikuha gikan sa Basahon ni Sofonias. Dinhi atong madungog nga siya nagkanayon, "Awit og kusog, O katawhan sa Sion. Singgit, O Israel!"

Ang ebanghelyo gikuha gikan sa Balaan nga Ebanghelyo sumala ni San Lucas. Kini nagsaysay mahitungod sa Pagbisita ni Maria sa iyang ig-agaw nga si Isabel.

Palihug manindog alang sa pagsugod sa Santos nga Eyukaristiya.

Salmo Responsoryo:

Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit.

Katilingbanong Pag-ampo:

Ginoo, himo-a kaming bulahan

BASAHON I

Sg. 2:8-14

KINUTLO GIKAN SA AWIT SA MGA AWIT

Ang babaye:

Nadungog ko ang tingog sa akong hinigugma; nagdagan siya sa kabungtoran paingon kanako. Sama sa lagsaw ang akong hinigugma; sama siya sa nating usa.

Nagbarog siya luyo sa among paril. Milili siya sa mga bintana ug mitan-aw kanako diha sa mga rehas. Nakigsulti kanako ang akong hinigugma.

Ang lalaki:

Ngari kanako, hinigugma ko, manlakat kita, minahal ko.

Ang tingtugnaw milabay na; mihunong na ang ulan; namuklad na ang mga bulak sa kaumahan.

Panahon na karon sa pag-awit; mabati na diha sa kaumahan ang awit sa mga salampati.

Nagsugod na pagpanghinog ang mga igos, ug nangalimyon na ang bulak sa mga paras. Busa ngari kanako, hinigugma ko, manlakat kita, minahal ko. Sama ka sa salampati nga nagtago sa lungag sa bato.

Pasud-onga ako sa matahom mong nawong, ug padungga ako sa tingog mong mananoy.

ANG PULONG SA GINOO.

OR

Zep. 3:14-18

KINUTLO GIKAN SA BASAHON NI SOFONIAS

Awit og kusog, O katawhan sa Sion.

Singgit, O Israel!

Pagmaya ug paglipay pag-ayo, O Jerusalem!

Dili na kamo silotan sa GINOO, giabog na niya ang inyong mga kaaway.

Ang hari sa Israel, ang GINOO, anaa sa inyong taliwala, busa ayaw na kamo kahadlok sa dautan. Niadtong adlawa ingnon unya ang Jerusalem:

"Ayaw kahadlok, O Sion; ayaw pakawad-ig kusog ang imong mga kamut. Ang GINOO nga inyong Dios anaa uban kaninyo, ang iyang gahom mohatag kaninyong kadaugan. Malipay kaninyo ang GINOO, ug diha sa iyang gugma hatagan kamog bag-ong kinabuhi. Moawit siya ug magmalipayon tungod kaninyo, sama sa buhaton sa adlaw sa pangilin."

Miingon ang GINOO, "Kuhaon ko ang katalagman gikan kaninyo, aron dili na kamo bugalbugalan tungod niini." ANG PULONG SA GINO0.

SALMO RESPONSORYO

Ps. 33:2-3, 11-12, 20-21

R. Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit. 

Pasalamati ang Ginoo diha sa Alpa, uban sa lira nga may napulo ka koldas.

Awiti ang iyang mga pagdayeg. Awiti siya og usa ka bag-ong awit Ayoha pagkablit ang mga koldas, uban sa mga singgit sa kalipay.

R. Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit.

Ang laraw sa Ginoo nagabarog sa kahangturan: ang hunahuna sa iyang kasingkasing, latas sa tanang kaliwatan.

Bulahan ang nasod kansang Dios mao ang Ginoo, ang lungsod nga iyang gipili alang sa iyang kaugalingong kabilin.

R. Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit.

Ang atong kalag nagapaabot sa Ginoo, nga mao ang atong hinabang ug atong panalipod, Kay diha kaniya nalipay ang atong mga kasingkasing; diha sa iyang balaang ngalan nagasalig kita.

R. Singgit kamo sa kalipay diha sa Ginoo, kamo nga mga balaan; awiti ninyo siya og usa ka bag-ong awit.

EBANGHELYO

Lk. 1: 39-45

Kinutlo gikan sa Ebanghelyo sumala ni Lucas

Ug mitindog si Maria ug miadto nga nagdalidali niadtong mga adlawa, ngadto sa kabungtoran, didto sa usa ka lungsod sa Judea. Ug misulod siya sa balay ni Zacarias ug nangumusta kang Isabel.

Ug sa pagkadungog ni Isabel sa pangumusta ni Maria, miulpot ang bata sulod sa iyang sabakan, ug napuno sa Espiritu Santo si Isabel.

Ug misinggit siya sa makusog nga siyagit, "Labing bulahan ka sa mga kababayenhan ug bulahan ang bunga sa imong sabakan. Ug ngano nga nahitabo man kini kanako nga ang inahan sa akong Ginoo miari kanako? Tan-awa, tungod kay sa diha nga miabot ang tingog pangumusta sa imong ngari sa akong mga dalunggan, miulpot sa kasadya ang bata nga ania sa akong sabakan. Bulahan, O ikaw nga mituo nga adunay katumanan ang mga gipa- mulong nganha kanimo gikan sa Ginoo."

Ang Ebanghelyo sa Ginoo.

KATILINGBANONG PAG-AMPO

DISYEMBRE 21, 2023

Pari: Mga igsuon, mag-ampo kita karon sa atong Langitnong Amahan kinsa mihimo kang Maria nga bulahan. Ipadangat nato karon ang atong mga pag-ampo ngadto sa Amahan, pinaagi sa pag-ingon:

GINOO, HIMO-A KAMING BULAHAN

1. Nga ang atong Santo Papa, mga Obispo, kaparian, mga diyakono ug mga relihiyoso, mamahimong madasigon diha sa pagpakaylap sa Maayong Balita sa kaluwasan ngadto sa tanang katawhan ilabina sa mga lagyong dapit. Mag-ampo kita sa Ginoo.

2. Nga ang mga lideres sa gobiyerno, mamahimong abli ang ilang mga kasingkasing sa mga kabus ug mga sinalikway pinaagi sa ilang mga programa ug pagserbisyo. Mag-ampo kita sa Ginoo.

3. Nga ang matag pamilya ug katilingban bendisyonan sa Ginoo sa matag adlaw ug pinaagi sa lyang grasya, maghari sa matag miyembro ang lyang gugma, pagpasaylo ug maayong pagtagad sa usa'g-usa. Mag-ampo kita sa Ginoo.

4. Nga sama kang Maria, pinaagi sa grasya sa Dios, magmasinugtanon kita sa imbitasyon sa Ginoo sa matag adlaw sa pagsunod Kaniya. Mag-ampo kita sa Ginoo.

5. Nga ang mga nagadayeg ug nagapasalamat sa Ginoo ilabina nila_______ maglipay diha sa lyang grasya ug mopaambit niini sa mga nanginahanglan. Mag-ampo kita sa Ginoo.

6. Nga ang mga minahal natong nangamatay ilabina sila______ makasinati na sa kalipay sa Diosnong presensiya sa iyang Gingharian. Mag-ampo kita sa Ginoo.

Pari: Makagagahum nga Amahan, imong gipadayag ang imong presensiya nganhi kanamo pinaagi sa among mga kaigsuonan nga mipaambit sa ilang kalipay tungod sa imong grasya. Tudlo-i kami sa pagpuyo diha sa imong gugma ug itugot kini pinaagi ni Cristo among Ginoo. Amen.