IKATULONG DOMINGGO SA ADBIYENTO IKADUHANG ADLAW SA MISA DE GALLO

Ikatulong Domingo Sa Adbiyento

Disyembre 17

PASIUNA

Malipayong buntag mga igsoon diha ni Cristo.

Ania na kita sa Ikatulo nga Domingo sa Adbiyento, gitawag usab kini nga Gaudete Sunday o Domingo sa Kalipay ug karon usab mao ang Ikaduhang Adlaw sa atong pagtukaw sa Misa de Gallo.

Ang unang pagbasa gikan sa basahon ni Propeta Isaias. Siya mipadayag ngadto kanila nga ang Espiritu sa Dios anaa kaniya aron pagsangyaw sa Maayong Balita sa mga kabus.

Ang ikaduhang pagbasa gikan sa Unang Sulat ni San Pablo ngadto sa taga-Tesalonica. Siya mipahimangno kanila sa paglipay, pag-ampo ug pagpasalamat kanunay sa Dios.

Ang Ebanghelyo gikan sa Ebanghelyo ni San Juan. Dinhi atong madungog si Juan nga nag-ingon, "siya moabot sunod kanako, ug dili ako takos nga mobadbad sa higot sa iyang sandalyas."

Palihug manindug alang sa pagsugod sa Santos nga Eyukaristiya.

Salmo Responsoryo:

Ang akong kalag nalipay diha sa akong Dios.

Katilingabanong Pag-ampo:

Ginoo, dungga ang imong katawhan.

BASAHONI

Is. 61:1-2, 10-11

KINUTLO GIKAN SA BASAHON NI PROPETA ISAIAS

Ania kanako ang espiritu sa GINOONG DIOS kay gipili ug gipadala man ako niya aron pagsangyaw og maayong balita ngadto sa mga kabus; gipadala niya ako aron paglipay sa mga masulob-on

ug pagpagawas sa mga binilanggo ug mga binihag.

Gipadala niya ako aron pagmantala -nga miabot na ang panahon nga luwason sa GINOO ang iyang katawhan ug panimaslan ang ilang kaaway.

Gipadala niya ako aron paghupay niadtong nagsubo.

Magmalipayon ako pag-ayo tungod sa nahimo sa GINOO, ang kalag ko magmaya tungod sa akong Dios; kay gibistihan niya ako sa bisti sa kaluwasan, gikupoan niya ako sa kupo sa pagkamatarong, ingon sa pamanhonon nga nagkuwentas og mga bulak, ug sama sa pangasaw-onon nga nagdayandayan sa iyang kaugalingon og mga alahas.

Kay ingon nga ang yuta mopaturok ug ingon nga ang tanaman mopaturok sa gipugas diha niini, paturokon usab sa GINOONG DIOS ang katarong ug pagdayeg sa atubangan sa kanasuran.

ANG PULONG SA GINOO.

SALMO RESPONSORYO

Lk 1:46-48, 49-50, 53-54

R. Ang akong kalag nalipay diha sa akong Dios.

Nagasangyaw ako sa kadako sa Ginoo, ang akong espiritu nalipay diha sa Dios nga akong manluluwas.

Kay gitan-aw niya ang kaubos sa iyang sulugoon; ang tanang kaliwatan nga umaabot magtawag kanako nga bulahan.

R. Ang akong kalag nalipay diha sa akong Dios.

Ang Dios nga gamhanan naghimog dagkong butang alang kanako, balaan ang iyang ngalan; Ang iyang kaluoy gikan sa kaliwatan ngadto sa kaliwatan alang kanila nga mahadlokon kaniya.

R. Ang akong kalag nalipay diha sa akong Dios.

Ang mga gigutom iyang gitagaan sa tanang mga kaayohan, samtang ang adunahan iyang gipapauli nga walay dala.

Iyang gibayaw si Israel, iyang sulugoon kay nahinumdom sa iyang kaluoy.

R. Ang akong kalag nalipay diha sa akong Dios.

BASAHON II

1 Thes. 5:16-24

KINUTLO GIKAN SA UNANG SULAT NI SAN PABLO NGADTO SA TAGA-TESALONICA

Pagmalipayon kamo kanunay, pag- ampo sa tanang panahon ug pagpa- salamat kamo bisan unsay modangat kaninyo. Kini mao ang kabubut-on sa Dios nga buhaton ninyo sa ngalan ni Cristo Jesus.

Ayaw ninyo santaa ang Espiritu Santo, ug ayaw tamaya ang mga mensahe gikan sa Dios. Sutaa ninyo ang tanan; ampingi ang maayo, ug isalikway ang dautan. Hinaut unta nga ang Dios nga nag- hatag kanatog kalinaw, magbalaan kaninyo sa hingpit ug manalipod kaninyo-sa inyong espiritu, kalag ug lawas ug magputli gayod kaninyo hangtod sa pag-abot sa atong Ginoong Jesucristo. Sanglit matinud-anon man ang nagtawag kaninyo, buhaton gayod niya kini.

ANG PULONG SA GINOO.

EBANGHELYO

Jn. 1: 6-8, 19-28

Kinutlo gikan sa Balaan nga Ebanghelyo sumala ni Juan

May usa ka tawo nga pinadala gikan sa Dios, ang iyang ngalan Juan. Siya mianhi aron mosaksi mahitungod sa kahayag, aron ang tanan motuo pinaagi kaniya. Dili kadto siya ang kahayag, apan aron magsaksi mahi- tungod sa kahayag.

Kini mao ang pagmatuod ni Juan. Sa dihang nagpadala [ngadto kaniya] ang mga Judio gikan sa Jerusalem og mga pari ug Levita aron pagpangutana kaniya, "Kinsa ka man!" Mipahayag siya ug wala milimod, ug mipahayag siya, "Dili ako ang Cristo."

Ug nangutana sila kaniya, "Nan, kinsa ka man diay? Ikaw ba si Elias? Ug siya miingon, "Dili ako!" "Ikaw ba ang propeta?" Ug mitubag siya, "Dili."

Busa miingon sila kaniya, "Kinsa ka man aron makahatag kami og tubag sa mga nagpadala kanamo? Unsay imong ikasulti mahitungod sa imong kaugalingon?"  

Mitubag siya: "Ako ang tingog sa usa nga nagsinggit didto sa kaminga- wan, 'Tul-ira ang dalan sa Ginoo,' sumala sa giingon ni propeta Isaias."

Ug sila nga mga pinadala gikan sa mga Pariseo nangutana ug miingon kaniya, "Nan, nganong namunyag ka man kondili ikaw ang Cristo ni si Elias ni ang propeta?"

Mitubag si Juan kanila, "Ako nagabunyag diha sa tubig; sa taliwala ninyo nagatindog siya nga wala ninyo hiilhi, siya moabot sunod kanako, ug dili ako takos nga mobadbad sa higot sa iyang sandalyas.”

Kining mga butanga nahitabo didto sa Betania tabok sa Jordan, diin si Juan namunyag.

Ang Ebanghelyo sa Ginoo.

KATILINGBANONG PAG-AMPO Disyembre 17, 2023

Pari: Mga igsuon diha sa atong pagpangandam sa pag-abot sa atong Manunubos, ihalad ta sa Dios Amahan ang atong mga pag-ampo ug panginahanglan. Sa matag pag-ampo, kita moingon:

GINOO, DUNGGA ANG IMONG KATAWHAN.

1. Alang sa atong Santo Papa, Francisco, mga obispo ug mga kaparian, ug mga diyakono, giyahan unta sila sa Espiritu Santo sa ilang misyon sa pagsangyaw sa matuod nga kahayag nga maoy maghatag og lamdag sa espirituhanong kinabuhi sa katawhan. Mag-ampo kita.

2. Alang sa mga pangulo sa atong nasud, panalanginan unta sa Dios diha sa ilang walay puas nga paningkamot alang sa kalamboan sa katilingban subay sa kabubut-on sa Dios. Mag-ampo kita.

3. Nga ang mga nagmasakiton, tigulang, himalatyon, ug mga biktima sa inhustisya, makabaton unta sila og kaayohan, kalipay ug kalinaw diha sa ilang kinabuhi pinaagi sa mga nag-amoma kanila. Mag-ampo kita sa Ginoo.

4. Alang kanatong tanan nga ania karon dinhi, nga pinaagi niining kasaulogan sa Santos nga Eyukaristiya, makapadasig kanato sa pagpahimuot sa Dios pinaagi sa pagpaubos ug pagpasalamat sa matarong. Mag-ampo kita.

5. Alang sa mga nagdayeg ug nagpasalamat sa Ginoo, ilabina sila ang Dios sa grasya magapanalangin kanila sa kanunay ug magdasig kanila sa pagkamanggihatagon ngadto sa uban. Mag-ampo kita.

6. Alang sa atong mga minahal sa kinabuhi nga mihalin na ngadto sa laing kalibutan ilabina sila makadangat na sila sa Gingharian ug ila nang matagamtaman ang kalipay nga walay katapusan. Mag- ampo kita.

Pari: Langitnong Amahan, tinubdan sa tanang grasya ug kaayo, dungga ang among mga pag-ampo nga among gihalad karon ug himo-a nga mahimo kaming angayan sa pagdawat niini pinaagi ni Cristo nga among Ginoo. Amen.