IKAPITO NGA ADLAW SA MISA DE GALLO

IKAPITO NGA ADLAW SA MISA DE GALLO

Disyembre 22

PASIUNA 

Maayong buntag mga igsuon diha ni Cristo.

Ania na kita sa Ika-pito sa atong Misa de Gallo.

Ang unang pagbasa gikuha gikan sa Basahon ni Samuel. Dinhi atong madungog ang pagsaysay mahitungod sa usa ka babaye nga matuohon sa Ginoo.

Ang ebanghelyo gikuha gikan sumala sa Balaan nga Ebanghelyo ni San Lucas. Dinhi atong madungog ang awit ni Maria ngadto sa Ginoo.

Palihug manindog alang sa pagsugod sa Santos nga Eyukaristiya.

Salmo Responsoryo:

Ang akong kasing-kasing nalipay diha sa Ginoo nga akong Manunubos.

Katilingbanong Pag-ampo:

Ginoo, panalangini ang imong katawhan.

BASAHON I

1 Sm. 1:24-28

KINUTLO GIKAN SA UNANG BASAHON NI SAMUEL

Ug sa nalutas na niya ang bata, gidala niya sa templo sa GINOO didto sa Silo. Nagdala usab siyag turong baka nga nagpanuigog tulo ka tuig, usa ka bakid nga trigo ug usa ka puntil nga panit nga gisudlan niyag bino. Unya giihaw nila ang turo ug ilang gidala ang bata ngadto kang Eli. Unya miingon si Ana kang Eli, "Kon nahinumdom ka pa, ako kadtong babaye nga mibarog dinhi sa imong atubangan ug nag-ampo sa GINOO. Kining bataa ang akong gipangayo sa GINOO ug gidungog niya ang akong pag-ampo. Busa gitugyan ko siya sa GINOO aron mag- alagad siya kaniya sa tibuok niyang kinabuhi."

Ug gisimba nila didto ang GINOO.

ANG PULONG SA GINOO.

SALMO RESPONSORYO

1 Sm. 2:1, 4-5, 6-7, 8

R. Ang akong kasingkasing nalipay diha sa Ginoo nga akong Manunubos.

Ang akong kasingkasing nalipay diha sa Ginoo, ang akong gahom gibayaw diha sa akong Dios.

Akong gibuntog ang akong mga kaaway; Nalipay ako sa akong kadaugan.

R. Ang akong kasingkasing nalipay diha sa Ginoo nga akong Manunubos.

Ang mga pana sa gamhanan nangabali, samtang ang mahuyang nagabakos og kusog.

Ang mga busog nagpasuhol og pan samtang ang mga gutom nangahapla.

Ang landay nga asawa nanganak og pito ka anak, samtang ang inahan sa daghan nagamingaw.

R. Ang akong kasingkasing nalipay diha sa Ginoo nga akong Manunubos.

Ang Ginoo nagpahamtang sa kamatayon ug nagahatag sa kinabuhi; nagabanlod siya ngadto sa kahiladman, ug nagabanhaw siya pag-usab.

Ang Ginoo nagahimo sa kabus ug nagahimo sa dato. siya nagabanlod sa ubos, ug siya usab ang nagabayaw.

R. Ang akong kasingkasing nalipay diha sa Ginoo nga akong Manunubos. 

Iyang gibangon ang hangol gikan sa abog gikan sa abog iyang giisa ang kabus, Aron pagpalingkod kanila uban sa mga hamili, ug paghimo og mahimayaong trono sa ilang kabilin.

R. Ang akong kasingkasing nalipay diha sa Ginoo nga akong Manunubos.

EBANGHELYO

Lk. 1: 46-56

Kinutlo gikan sa Ebang. helyo sumala ni Lucas

Unya nagkanayon si Maria: "Nagpakadako ang akong pagkatawo sa Ginoo, ug nagmaya ang akong kalag diha sa Dios nga akong Manluluwas, tungod kay gikahimut-an niya pagpanumbaling ang iyang ubos nga ulipon. Kay tan-awa, sukad karon pagatawgon ako nga bulahan sa tanang kaliwatan tungod kay naghimo kanako og mga dagkong butang ang Makagagahum. Ug balaan ang iyang ngalan.

"Ug ang iyang kaluoy gikan sa mga kaliwatan ngadto sa mga kaliwatan diha kanila nga mahadlokon kaniya.

"Nagpakita siya og kusog diha sa iyang bukton; gipatibulaag niya ang mga mapahitas-on diha sa tinguha sa ilang mga kasingkasing.

"Gipukan niya ang mga gamhanan gikan sa mga trono ug gituboy niya ang mga mapaubsanon; ang mga gigutom gibusog niya sa mga maayong butang ug ang mga adunahan gihinginlan niya nga walay dala. 

"Mitabang siya kang Israel nga iyang alagad, aron pagahinumdoman ang iyang kaluoy, sama sa gisaad niya ngadto sa atong katigulangan, kang Abraham ug sa iyang kaliwatan hangtod sa kahangturan!"

Unya nagpabilin si Maria uban kaniya og mga tulo ka bulan, ug mipauli siya sa iyang balay.

Ang Ebanghelyo sa Ginoo.

KATILINGBANONG PAG-AMPO DISYEMBRE 22, 2023

Pari: Ang Dios Amahan manggihatagon ug Siya mao ang tuburan sa tanang grasya. Ato karong ipadangat ngadto Kaniya ang atong mga panginahanglan diha sa pag-ingon:

GINOO, PANALANGINI ANG IMONG KATAWHAN.

1. Sama ni Maria, ang mga pangulo sa Simbahan, ilabina ang Santo Papa, Obispo, Kaparian ug mga Relihiyoso, malamdagan sa Espiritu Santo ang ilang mga salabutan ug kasingkasing aron mapadayonon silang mangandam sa ilang kaugalingon sa pagkatawo sa atong Ginoo ug sa pagpakaylap niini sa tanang katawhan. Mag-ampo kita sa Ginoo.

2. Sama ni Maria, mamahimong malumo ang mga kasingkasing sa mga lideres sa atong nasud aron diha sa ilang pagserbisyo adunay luna ang mga sinalikway, hinikawan, ug ubang nanginahanglan. Mag-ampo kita sa Ginoo.

3. Sama ni Maria, makakaplag unta og paglaum ang mga inahan sa tibuok kalibutan diha sa iyang pagkamasulundon sa kabubut-on sa Ginoo ug makatagamtam unta sila sa kaayo sa Dios sa matag adlaw diha sa ilang mga anak. Mag-ampo kita sa Ginoo.

4. Sama ni Maria, mapalawon unta ang pagtuo ug paghigugma sa Ginoo sa atong mga igsuon nga mihalad sa ilang pagdayeg ug pasalamat Kaniya ilabina nila

5. Sama ni Maria, makaangkon unta sa kinabuhing walay katapusan ang atong mga igsuon nga nangamatay ilabina sila

Pari: Langitnong Amahan, nagapasalamat kami Kanimo alang sa mensahe sa kalinaw nga gidala ni Maria dinhi ning masamok namong kalibutan. Hatagi kami sa panabang nga among gikinahanglan sa matag adlaw pinaagi ni Cristo among Ginoo. Amen.