Ikakatloag-upat nga Domingo Sulod sa Tuig CRISTO, ANG HARI

Ikakatloag-upat nga Domingo Sulod sa Tuig

CRISTO, ANG HARI

PASIUNA

Nobiyembre 26, 2023

Maayong buntag/hapon mga igsuon diha ni Cristo!

Karon Domingoha mao ang Katapusang Domingo sa Liturhikanhong tuig. Niining Domingoha usab, ang tibuok Simbahan nagsaulog sa Solemnidad sa Cristohanong Hari.

Ang unang pagbasa gikuha sa gikan sa Basahon ni Propeta Ezequiel. Dinhi atong madungog ang pagpaila sa Ginoo isip Magbalantay.

Ang ikaduhang pagbasa gikuha gikan sa Unang Sulat ni San Pablo ngadto sa taga-Corinto. Si San Pablo nagkanayon, "Apan ang tinuod mao nga gibanhaw si Cristo, ingon nga pasalig nga kadtong nangamatay banhawon usab".

Ang Ebanghelyo gikan sa Balaan nga Ebanghelyo sumala ni Mateo. Si Hesus miingon, "Amen, naga ingon ako kaninyo: sa higayon nga wala ninyo kini himoa sa usa niining labing ubos, wala ninyo kini buhata kanako."

Palihug manindog alang sa pagsugod sa Santos nga Eyukaristiya.

Salmo Responsoryo:

Magbalantay kanako ang Ginoo, wala nay magmakulang pa kanako.

Katilingbanong Pag-ampo:

Cristo, Among Hari, Dungga kami.

BASAHON I

Ez. 34:11-12, 15-17

KINUTLO GIKAN SA BASAHON NI PROPETA EZEQUIEL

Nag-ingon ang GINOONG DIOS, "Ako mismo maoy mangita sa akong mga karnero. Ingon nga ang magbalantay sa karnero mangita sa iyang karnerong mawala, pangitaon ko usab ang akong mga karnero ug luwason ko sila gikan sa tanang dapit diin sila nahisalaag usa niana ka adlaw nga mangiob. Ako mismo maoy magbantay sa akong mga karnero ug papahulayon ko sila, nag-ingon ang GINOONG DIOS."

"Pangitaon ko ang nawala, dad-on pagbalik ang nahisalaag, lakilakian ang napiang, lig-onon ang maluyahon ug bantayan ang mga maayog lawas. Pakan- on ko sila sa walay pihigpihig."

"Mahitungod kaninyo, akong panon, nag-ingon ang GINOONG DIOS: Pinigon ko ang mga karnero ug lainon ko kini gikan sa mga kanding."

ANG PULONG SA GINOO.

SALMO RESPONSORYO

Ps. 23:1-2, 2-3, 5-6

R. Magbalantay kanako ang Ginoo wala nay magmakulang pa kanako.

Magbalantay kanako ang Ginoo, wala nay magamakulang pa kanako.

Sa lunhaw nga sibsibanan iya ako nga gipapahulay.

R. Magbalantay kanako ang Ginoo wala nay magmakulang pa kanako.

Sa daplin sa malinaw nga tubig iya akong gidala; iyang gihupay ang akong kalag.

Iya ako nga gitultolan sa matarong nga mga agianan tungod sa iya nga ngalan.

R. Magbalantay kanako ang Ginoo wala nay magmakulang pa kanako.

Gihikyaran mo ako og lamesa sa akong atubangan samtang nagatan-aw ang akong mga kaaway;

Gidihogan mo ang akong ulo og lana; nagaawas gayod ang akong kopa.

Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi;

ug magpuyo ako sa balay sa Ginoo sa mga katuigan sa katuigan.

R. Magbalantay kanako ang Ginoo wala nay magmakulang pa kanako.

BASAHON II

1 Cor. 15:20-26, 28

KINUTLO GIKAN SA UNANG SULAT NI SAN PABLO NGADTO SA TAGA-CORINTO

Apan ang tinuod mao nga gibanhaw si Cristo, ingon nga pasalig nga kadtong nangamatay banhawon usab. Kay ingon nga miabot ang kamatayon pinaagi sa usa ka tawo, moabot usab ang pagkabanhaw pinaagi sa usa ka tawo. Kay ingon nga nangamatay ang tanang mga tawo tungod sa ilang pagkahiusa kang Adan, ban- hawon usab ang tanan tungod sa ilang pagkahiusa kang Cristo. Apan ang matag usa anaa sa iyang husto nga dapit: si Cristo maoy una sa tanan, unya mosunod kadtong iya ni Cristo inig-abot na niya. Unya moabot ang katapusan ug buntogon ni Cristo ang tanang pangulo nga espirituhanon, mga awtoridad, mga kagamhanan, ug itugyan niya ang Gingharian ngadto sa Dios nga Amahan. Kay kinahanglan maghari si Cristo hangtod mabuntog sa Dios ang tanan niyang mga kaaway ug himoon sila nga tumbanan sa iyang mga tiil. Ang kata- pusang kaaway nga buntogon mao ang kamatayon. Apan kon ang tanang butang ipailalom na sa pagmando ni Cristo, ang Anak mismo harian sa Dios nga maoy nagtugyan sa tanan ubos sa iyang pagmando, ug maghari ang Dios sa tanan sa hingpit gayod.

ANG PULONG SA GINOO.

EBANGHELYO

Mt. 25:31-46

Kinutlo gikan sa Balaan nga Ebanghelyo sumala ni Mateo

Niingon si Jesus ngadto sa iyang mga tinun-an:

"Inig-abot sa Anak sa Tawo sa iyang himaya ug ang tanang mga anghel uban kaniya, molingkod unya siya sa trono sa iyang himaya. Ug pagapundokon atubangan kaniya ang tanang kanasuran ug pagabulagon niya sila gikan sa usag-usa, sama nga ang magbalantay nagabulag sa mga karnero gikan sa mga kanding, ug patindugon niya ang mga karnero sa iyang tuo, ug ang mga kanding sa wala.

"Unya moingon ang hari ngadto sa mga anaa sa iyang tuo: 'Dayon, mga bulahan sa akong Amahan, dawata nga kabilin ang gingharian nga giandam na alang kaninyo sukad pa sa sinugdan sa kalibutan. Kay gigutom akò ug gihatagan akò ninyo og makaon, giuhaw akò ug gihatagan akò ninyo og mainom, langyaw akò ug giabi-abi akò ninyo, hubo akò ug gisaninaan ninyo akò, masakiton akò ug giduaw ninyo akò, didto akò sa bilanggoan ug miduaw kamo kanako.

"Unya motubag kaniya ang mga matarong nga magaingon: 'Ginoo, kanus-a ka ba namo nakit-an nga gigutom ug gipakaon namo, o giuhaw ug gipainom namo?

O kanus-a ka ba namo nakit-an nga langyaw ug giabi-abi ka namo, o hubo ug gisaninaan ka namo? O kanus-a ka ba namo nakit-an nga nagmaluyahon o didto sa bilanggoan ug miduaw kami kanimo?'

"Ug motubag ang hari ug moingon kanila: 'Amen, nagaingon akò kaninyo: Sa higayon nga gibuhat ninyo kini sa usa sa labing ubos nako nga igsoon, gibuhat ninyo kini kanako?

"Unya moingon usab siya ngadto sa iyang wala: 'Palayo kamo kanako kamong mga tinunglo ngadto sa walay kataposang kalayo nga giandam alang sa yawa ug sa iyang mga anghel. Kay gigutom akò ug wala ninyo akò hatagi og makaon, giuhaw akò ug wala ninyo akò paimna, langyaw akò ug wala ninyo akò abi-abiha, hubo ug wala akò ninyo bistihi, maluyahon ug didto sa bilanggoan ug wala ninyo akò duawa.?

"Unya sila usab motubag nga magaingon: 'Ginoo, kanus-a man ikaw namo nakit-an nga gigutom o giuhaw o langyaw o hubo o maluyahon o didto sa bilanggoan ug wala kami moalagad kanimo?'

"Unya motubag siya ngadto kanila nga magaingon: 'Amen, nagaingon akò kaninyo: Sa higayon nga wala ninyo kini himoa sa usa niining labing ubos, wala ninyo kini buhata kanako.

"Ug kini sila moadto ngadto sa silot nga walay kataposan, apan ang mga matarong ngadto sa kinabuhing dayon."

Ang Ebanghelyo sa Ginoo.

KATILINGBANONG PAG-AMPO

Nobiyembre 26, 2023

Pari: Puno sa pagtoo ug sa mapaubsanong kasing-kasing, ato karong ihalad ngadto sa Dios kinsa mipadala sa iyang Anak nga si Jesucristo, atong Ginoo ug atong Hari aron pagbantay kanatong tanan ug sa matag pag-ampo, kita moingon:

CRISTO, AMONG HARI, DUNGGA KAMI.

1. Nga ang mga lideres sa Simbahan ilabina si Papa Franciso, mga Obispo, mga Pari, mga Diyakono ug tanang mga Relihiyoso, mamahimo unta silang maayong magbalantay ngadto sa tanang katawhan ug nga ang Cristo nga Hari maglig-on ug maghari sa ilang tagsa-tagsa ka kasing-kasing. Mag-ampo kita.

2. Nga ang mga namunoan sa panggamhanan, makadawat sa grasya sa Dios nga ilang gikinahanglan aron sa pagserbisyo sa katawhan subay sa hiyas sa atong Ginoong Jesucriso, atong Hari. Mag ampo kita.

3. Nga ang mga kabatan-onan nga misalmot karon sa LOCAL WORLD YOUTH DAY sa nagkalain-laing diyosesis, mapuno unta sa grasya sa kaalam, kaisog, kalumo sa kasing-kasing ug kalipay diha sa pagsunod dalan, kamatuoran ug kinabuhi nga mao si Jesucristo, atong Hari. Mag-ampo kita.

4. Nga ang mga nagmasakiton, tigulang ug himalatyon, makadawat sa grasya sa pasaylo, kalinaw ug kaayohan, pinaagi sa gahum sa atong Ginoo ug Hari. Mag-ampo kita.

5. Nga ang mga biktima sa kalamidad ug sa gubat, panalanginan ug protektahan unta sa atong Ginoo sa atong tanang panahon ug makadawat unta sila sa grasya nga ilang gikinahanglan. Mag-ampo kita

6. Nga ang mga midayeg ug mipasalamat sa Dios ilabina nila motubo unta diha sa Iyang kaayo ug gugma aron mamahimong maayong sumusunod ni Cristo atong Hari. Mag-ampo kita

7. Nga ang mga magtutuong mipahulay na sa laing kinabuhi ilabina sila makadawat na sa kinabuhing walay katapusan. Mag-ampo kita.

Pari: Langitnong Amahan, amo nang nahalad ang among pag- ampo ug malaumon kami nga kining tanan hatagan mo ug katumanan. Kini among gipangayo pinaagi ni Cristo among Ginoo. Amen.

PAHIBALO

Nobyembre 26, 2023

1. Karong umaabot nga Nobyembre 30, 2023, adlaw'ng huwebes, mao ang adlaw sa atong "Confirmation", kini magsugod sa alas 2:00 sa hapon. Ang atong pre-Confirmation Catechesis Seminar ipahigayon karong Nobyembre 27, 2023 adlaw'ng lunes, kini magsugod sa alas 8:00 sa buntag hangtud sa alas 4:00 sa hapon. Giawhag ang mga kompermahanan sa pagdala ug pagkaon alang sa ilang paniudto ug merienda.

2. Ang parokya sa San Pedro Cathedral, nagpahigayon ug usa ka Raffle for a Cause, alang sa pag repair sa Cathedral. Dagkong premyo ang naghulat alang sa mga mananaog. Ang mga ticket mamahimong mapalit sa opisina sa atong parokya sa kantidad nga 100pesos kada ticket. Ang Grand Raffle Draw pagahimoon karong umaabot nga Desyembre 23, 2023.

3. Ang atong mga kabatan-onan dinhi sa parokya naglusad ug usa ka IGP o income generating project aron makatabang sa mga proyekto sa atong simbahan, kini mao ang "Light a star on Christmas, Season 2. "Maging liwanag sa dilim". Mamahimo kitang mo palit ug Parol sa kantidad nga 300 pesos ug kini ibitay sa palibot sa atong simbahan. Alang sa dugang detalye niini, mamahimong mo duol sa mga batan-on nga nag pwesto sa gawas sa atong simbahan o moadto sa opisina sa atong parokya.

4. Ang atong parokya sa Immaculada Conception magsaulog sa ika 64 nga kapistahan karong umaabot nga Desyembre 8, 2023. Ang atong Novena magsugod na karong Nobyembre 29, 2023, sa alas 5:45 sa buntag ug pagasundan kini sa Santos nga Misa pagka alas 6:00 sa buntag. Giawhag ang tanan sa pagtambong niini. Alang sa mga dugang detalye mahitungod sa atong "Fiesta Activities" palihug pagbasa sa mga pahibalo nga gipaskil sa gawas sa atong simbahan.

Daghang Salamat.