IKAKATLOAG TULO NGA DOMINGGO

IKAKATLOA'G TULO NGA DOMINGGO

Pasiunang Pag-ampo

O Ginoo, dungagi ang among kadasig sa pagbuhat sa imong kabubut-on ug tabangi kami sa pagkasayud sa makaluluwas nga gahum sa imong gugma.

Kini among gipangayo pinaagi sa among Ginoong Jesukristo imong Anak, nga buhi ug hari uban kanimo ug sa Espiritu Santo, Dios nga usa hangtud sa kahangturan.

a. BASAHON I

Sanglitanan. 31: 10-13,19-20,30-31

Kinutlo gikan sa basahon sa mga Sanglitanan.

Kon ang usa ka tawo makakaplag og usa ka takus nga asawa ang iyang bili labaw kaayo sa mga mutya. Ang iyang bana, sa pagsalig sa iyang kasingkasing ngadto kaniya, makabaton og dili katahapan nga ganti. Ang maong asawa magdala og kaayohan sa bana, ug dili kadautan, sa tanang mga adlaw sa kinabuhi sa asawa. Makakaplag siya og delana ug lino ug maayo siyang mangamot sa pagbuhat og hinabol. Mokupot siya sa hablonan ug ang iyang mga tudlo mopalihok sa kalinyasan. Manghatag siya sa mga kabus ug motabang siya sa mga nagkinahanglan. Ang kamaayong bata malimbongan ug ang kaanyag lumalabay lamang. Ang babaye nga mahadlokon sa Ginoo maoy angay nga dayegon. Gantihi siya tungod sa iyang mga kabudlay, ug ang iyang mga buhat maoy pagdayega kaniya diha sa mga ganghaan sa siyudad.

Ang Pulong sa Ginoo.

b. SALMO RESPONSORYO

Salmo 128: 1-2, 3, 4-5

Tubag (R) Bulahan sila nga mahadlokon sa Ginoo.

Bulahan ikaw nga mahadlokon sa Ginoo, nga nagalakaw sa Iyang kadalanan. Kay nagakaon ka sa bunga sa imong binuhatan; mabulahan gayud ikaw ug mapanalanginan. (R)

Ang imong asawa mahisama sa usa ka mabungahon nga bagon nga anaa sa tugkaran sa imong balay, ang imong mga anak sama sa mga tanum nga olibo libot sa imong talad. (R)

Ania, ingnon niini pagpanalangin ang tawo nga mahadlokon sa Ginoo. Ang Ginoo manalangin kanimo gikan sa Sion; makakita unta ikaw sa kausbawan sa Jerusalem, sa tanang mga adlaw sa imong kinabuhi. (R)

c. BASAHON II

1 Tes. 5: 1-6

Kinutlo gikan sa unang sulat ni San Pablo ngadto sa taga Tesalonica.

Mga igsoon, wala nay kinahanglan nga ako magsulat pa kaninyo kon kanus-a mahitabo kining mga butanga, kay kamo mismo nasayud kaayo nga ang pagbalik sa Ginoo sama sa usa ka kawatan nga moabot sa gabii. Inig-ingon sa mga tawo: "Malinawon ang tanan ug way kabilinggan", sa kalit moabot kanila ang kalaglagan. Dili sila makalikay niini, kay ingon kini sa kasakit nga moabot sa babaye nga nagbati. Apan kamo mga igsoon, wala na magpuyo diha sa kangitngit, busa dili kamo hikalitan sa maong Adlaw nga moabot ingon sa usa ka kawatan. Kamong tanan iya sa kahayag, ug iya sa adlaw. Dili kita iya sa gabii ni iya sa kangitngit. Ug busa dili kita mangatulog sama sa uban kondili magtukaw ug magmaugdang. Kasagaran ang mga tawo matulog sa gabii ug kasagaran usab sa gabii sila maghuboghubog. Apan kay kita iya man sa adlaw; angay kita magmaugdang. Kinahanglan nga ang pagtoo ug paghigugma himoon natong sama sa kotamaya nga panalipod sa dughan, ug ang atong paglaum sa kaluwasan ingon sa puthawng kalo nga panalipod sa ulo.

Ang Pulong sa Ginoo.

d. EBANGHELYO

Mt. 25: 14-30 or 25:14-15,19-20

Ang Santos nga Ebanghelyo sumala ni San Mateo.

(Tinaas)

Si Jesus misugilon niining sambingay ngadto sa Iyang mga tinun-an: "May usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan, ug gihatagan silag puhonan sumala sa ilang katakus; ang usa gihatagan niyag lima ka libo ka pesos, ang usa duha ka libo ka pesos, ug ang usa pa gayud usa ka libo ka pesos. Unya mipanaw siya. Ang sulugoon nga nakadawat og lima ka libo ka pesos milakaw dayon ug gipatigayon niya ang salapi, ug nakaganansiya siya og lima ka libo ka pesos. Sa samang paagi, ang nakadawat og duha ka libo ka pesos nakaganansiyag duha ka libo ka pesos. Apan ang sulugoon nga nakadawat og usa ka libo ka pesos milakaw ug nagkalot sa yuta, ug gitagoan niya ang salapi sa iyang agalon.

Tapos sa taas nga panahon, mipauli ang agalon niadtong mga sulugoon ug nangayog husay kanila. Ang sulugoon nga nakadawat sa lima ka libo ka pesos miadto kaniya ug mihatag sa laing lima ka libo ka pesos. 'Sir,' miingon siya, 'mihatag ka kanakog lima ka libo ka pesos; tan-awa, aniay laing lima ka libo ka pesos nga akong naganansiya.' 'Maayo, buotan ka ug maayong sulugoon!" miingon ang agalon. Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay! Unya misulod ang sulugoon nga nahatagan og duha ka libo ka pesos ug miingon, 'Sir, gihatagan mo akog duha ka libo ka pesos. Tan-awa! Aniay laing duha ka libo ka pesos nga akong naganansiya.' 'Maayo, buotan ka ug maayong sulugoon, miingon ang iyang agalon. 'Sanglit kasaligan ka man sa diyotayng salapi, piyalan ko ikaw sa daghang salapi. Dali, sulod ngari, ug ambit sa akong kalipay! Unya misulod ang sulugoon nga nakadawat sa usa ka libo ka pesos ug miingon, 'Sir, nasayud ako nga estrikto ka kaayo: nag-ani ka sa wala mo itanum, ug naghipos sa wala mo ipugas. Nahadlok ako, busa milakaw ako ug gitagoan ko ang imong salapi ilalom sa yuta. Tan-awa, Sir, ania ang imong salapi. 'Walay hinungdan ug tapolan nga suguloon,' miingon ang agalon. 'Nasayud ka man diay nga ako nag-ani sa wala ko itanom, ug naghipos sa wala ko ipugas, nganong wala mo man ideposito sa bangko ang akong salapi aron mahibalik kini kanako nga may tubo na? Karon, kuhaa kaniya ang salapi ug ihatag ngadto sa sulugoon nga may napulo ka libo ka pesos. Kay ang anaay iya hatagan pag dugang, ug makabaton siyag labaw pa sa iyang gikinahanglan; apan ang wala gayoy iya, bisan pa gani ang diyotay nga iyaha kuhaon pa gikan kaniya. Ug kining walay hinungdan nga sulugoon ilabog ngadto sa gawas nga mangitngit; didto maghilak siya ug magkagot sa iyang ngipon.

Ang Ebanghelyo sa Ginoo.

(Minubo)

Si Jesus misugilon niining sambingay ngadto sa Iyang mga tinun-an: "May usa ka tawo nga hapit na mopanaw; gitawag niya ang iyang mga sulugoon ug gipiyalan niya sa iyang katigayonan, ug gihatagan silag puhonan sumala sa ilang katakus; ang usa gihatagan niyag lima ka libo ka pesos, ang usa duha ka libo ka pesos, ug ang usa pa gayud usa ka libo ka pesos. Unya mipanaw siya.

Tapos sa taas nga panahon, mipauli ang agalon niadtong mga sulugoon ug nangayog husay kanila. Ang sulugoon nga nakadawat sa lima ka libo ka pesos miadto kaniya ug mihatag sa laing lima ka libo ka pesos. 'Sir,' miingon siya, 'mihatag ka kanakog lima ka libo ka pesos; tan-awa, aniay laing lima ka libo ka pesos nga akong naganansiya."

Ang Ebanghelyo sa Ginoo.

e. KOMENTARYO

Tema: "Dios Lang Igo Na"

Adunay usa ka awit nga nagkanayon: "Ang kabalaka ayaw pasudla, ug ang tanan mong kahadlok wad-a, kay ang tanang butang  lumalabay, Dios lang ang magpabilin kanunay.

Ang pailub mao ray sinugdan, sa tanan mong mga kaayohan, ang Diosnon sa tanan wa nay gana, Dios lang igo na alang kaniya."

Mga igsoon, mga kini ang gihatagan og punting sa mga pagbasa niining ikakatloag tulo nga Dominggo sa Ordinaryong Panahon. Dili ikalimod nga mobati kita og mga kahadlok ug mga kabalaka sa atong kinabuhi. Aduna kitay kabalaka kon maunsa na ang atong pagpuyo sa umaabot, mabalaka kita kon unsa nay atong kan-on, unsay atong sul-obon, unsay atong ipalit og mga butang nga atong magustuhan. Mahadlok usab kita kon dunay mga katalagman nga manghitabo sa atong kinabuhi. Ug kon aduna kitay hingpit nga pagsalig ug paghigugma sa Dios, dili gayod kita mobati og sama niini. Kay ang gugma maoy atong sukaranan sa atong pagkakontento ug kalig-on sa kinabuhi. "Dios lang igo na."

Sa atong inadlaw-adlaw nga pagpuyo niining kalibutana, misantop na ba sa atong panghunahuna ang mga pangutana nga: "Unsa kaha ang mga butang nga nakapalipay kanato? Naghatag og kasuko ug kaguol? Naghatag og kahingawa, kabalaka ug kahadlok? Unsa kaha ang hinungdan niining mga kasinatian nga atong nasinati nga dili gayod malikayan?

Si Kristo mismo sa kanunay nagpahinumdum kanato sa angayan natong buhaton agi og pagpangandam sa kinatumyan atong sa kinabuhi. Gipadayag kini dili lamang alang sa iyang mga apostoles kon dili alang usab kanato sa atong kapanahunan karon. Ang sambingay nga gipadayag ni Kristo wala maghatag og dugang kalibog kanato. Kon dili usa ini ka tubag sa atong mga kasinatian sa kalisud, kasakit ug kahingawa sa atong pagpakabuhi.

Ang sambingay maoy nahimo natong giya ug tubag sa daghan natong kalibog sa kinabuhi.

Ang atong mga nagkalain-laing kasinatian, makapasubo ug makalipay, kalibog ug kalisod sa kinabuhi, kahadlok ug kabalaka ug daghan ipa. Ug kasagaran nga atong malitok, "Nganong nahitabo man kini kanako? Nganong ako pa man?" Mga pagbasol ug mga pagmahay maoy maghari sa atong kaugalingon. Wala na kita makahunahuna nga adunay Dios. Ato nang giangkon ang tanan. Apan kon ato lamang gipamalandungan pag-ayo ang mga panghitabo sa atong kinabuhi, dili kita angay nga mabalaka kay ang tanang butang sa kalibutan gitagana na nga mahitabo sa atong tagsatagsa ka kinabuhi.

Ang Dios maoy nagpahiluna sa tanan. Tuod adunay mga higayon nga lisod dawaton sa atong tawhanon nga pagsabot tungod sa kasakit ug kapait niini apan atong pamalandungan kon unsa ang mensahe nga nagpaluyo niining tanan.

Ang atua, mao lamang ang hingpit nga pagtoo ug paghigugma sa Dios. Gikinahanglan ang pagtuo ug paghigugma kaniya aron masinati kon giunsa kita pag-atiman ug paghigugma sa Dios. Kay kon kulang ang atong pagtoo ug paghigugma sa Dios dili gayod nato masinati ang paghigugma sa Dios kanato. Ug kon dili kita makontento kon unsay anaa kanato dili gayod kita makasinti og hingpit nga kalipay kay kanunay kitang nagpangita ug nangandoy sa mga butang nga dili molungtad ug dili makahatag kanato og hingpit nga kalipay. Makat-on unta kita sa pagpasalamat kon unsay atong nahuptan. Kinahanglan makabaton kita sa grasya nga makontento kon unsay anaa kanato. Ang pagpuyo sa katarung ug gugma nga maoy tinubdan sa hingpit nga kalipay ug kalinaw. Ang mensahe nga pangitaon nato ang iyang gingharian ug ang tanan idugang kanato. Ang pagkinabuhi nga nahisubay sa kamanduan, kabubut-on ug paagi sa Dios. Aron inig-abot na sa tukmang panahon, moatubang kita sa Dios nga mapagarbohon kay natuman nato ang iyang kabubut-on sa atong inadlaw-adlaw nga pagkinabuhi. "Dios lang igo na alang Kaniya". Amen.

Giya alang sa pamalandong:

1. Andam na ba ako sa pag-atubang sa atong Ginoo?

2. Giunsa man nako paggamit ang mga gasa sa Dios nga gipiyal kanako?

3. Andam ba ako sa paghatag sa hustong tubag kon mangayo na og husay sa akong binuhatan ang atong Agalon?

f. PANGALIYA SA KATILINGBAN

Pangulo: Mga igsoon sa kanunay ang atong Makagagahum nga Dios nagdasig kanato sa pagsunod Kaniya nga matinud-anon. busa sa tumang pagsalig atong ipadangat Kaniya ang atong mga pag-ampo ug mga panginahanglan. Sa matag pangamuyo motubag kita:

AMAHAN, DUNGGA KAMI.

1. Nga ang atong Simbahan, ilabina ang mga lideres nga gitugyanan sa pangsangyaw sa Pulong sa Dios mamahimo unta silang buhing panig-ingnan sa mga pulong ug buhat nga ilang gimantala. Mag-ampo kita.

2. Nga ang mga lideres sa atong nasud ug sa uban pang kanasuran ila untang buhaton ug ipatuman ang ilang mga saad alang sa kaayohan ug kaangayan sa tanan. Mag-ampo kita.

3. Nga ang matag banay ilabina sa mga amahan ug inahan mamahimo unta silang sumbanan sa Diosnong kaayo, gugma, pag-amoma ug pagsinabtanay alang sa kahiusahan, kahapsay ug kalinaw sa ilang pagpuyo. Mag-ampo kita.

4. Nga kitang ania karon giniyahan sa Pulong sa Dios, mamahimong magmaalagaron ngadto sa uban sa walay pagpaabot og balus. Mag-ampo kita.

5. Nga ang atong mga kaigsoonan nga mihalin na ning kalibutana makadangat na sa langitnong pinuy-anan nga gitagana kanila sa atong mahigugmaon nga Amahan. Mag-ampo kita.

6. Nga ang atong personal nga katuyuan atong ihalad sa Dios diha sa kahilum.

Pangulo: Amahan nga maloloy-on Imong nadungog ang among mga pag-ampo. Masaligon kami nga Imo kining hatagan og katumanan subay sa Imong kabubut-on pinaagi ni Kristo among Ginoo. Amen.