IKAKAWHAAG-WALO
Ikakawhaag-walo nga Domingo Sulod sa Tuig
PASIUNA
October 15, 2023
Maayong bunyag/hapon mga igsuon ko diha ni Cristo.
Ania na kita sa Ikakawhaan ug walo nga Domingo sa Ordinaryong Panahon. Gisaulog usab karon ang Extreme Poverty Day ug Sunday for Cultures.
Ang unang pagbasa gikuha gikan sa Basahon ni Propeta Isaias. Dinhi atong madungog nga ang Ginoo nga Labing Gamhanan ang usa ka kombira sa lamiang pagkaon, ug labing maayong bino.
Ang ikaduhang pagbasa gikuha gikan sa Sulat ni San Pablo ngadto sa taga-Filipos. Dinhi atong nadungog si San Pablo nga nagkanayon, "May kalig-on sa gahom nga gihatag kanako ni Cristo."
Ug ang Ebanghelyo sumala ni San Mateo nga mahitungod sa Sambingay sa usa ka kumbira.
Palihug manindog alang sa pagsugod sa Santos nga Eyukaristiya.
Salmo Responsoryo:
MAGBALANTAY KANAKO ANG GINOO WALA NAY MAGMAKULANG PA KANAKO.
Katilingbanong Pag-ampo: GINOO, DUNGGA KAMI.
BASAHON I
Is. 25:6-10
KINUTLO GIKAN SA BASAHON NI PROPETA ISAIAS
Niining bukira himoon sa GINOO nga Labing Gamhanan alang sa tanang katawhan ang usa ka kombira sa mga lamiang pagkaon, ug labing maayong bino. Ug langkaton niya ang panganod sa kagul-anan nga nagpandong sa kanasuran. Wagtangon sa GINOONG DIOS ang kamatayon, ug pahiran ang mga luha, ug papason niya ang kaulaw sa iyang katawhan; mao kini ang gisulti sa GINOO.
Ikaingon niadtong adlawa, "Siya mao ang atong Dios nga atong gilaoman nga maoy moluwas kanato. Siya ang atong gipaabot; maglipay kita sa iyang pagluwas kanato."
Kay dinhi niining bukira magpabilin ang gahom sa GINOO, apan tunob- tunoban ang Moab, ingon sa uhot nga tunobtunoban diha sa tai.
ANG PULONG SA GINOO.
SALMO RESPONSORYO
Ps. 23:1-3, 3-4, 5, 6
R. Magbalantay kanako ang Ginoo wala nay magmakulang pa kanako.
Magbalantay kanako ang Ginoo, wala nay magmakulang pa kanako.
Sa lunhaw nga sibsibanan iya ako nga gipapahulay; Sa daplin sa malinaw nga tubig iya akong gidala; iyang gihupay ang akong kalag.
R. Magbalantay kanako ang Ginoo wala nay magmakulang pa kanako.
Iya ako nga gitultolan sa matarong nga mga agianan tungod sa iya nga ngalan.
Bisan kon magalakaw ako sa walog nga mangitngit wala akoy kahadlokan nga dautan; Kay anaa ka man sa akong kiliran sa imong igbubugaw og sungkod gihatagan mo ako og kaisog.
R. Magbalantay kanako ang Ginoo wala nay magmakulang pa kanako.
Gihikyaran mo ako og lamesa sa akong atubangan samtang nagatan-aw ang akong mga kaaway; Gidihogan mo ang akong ulo og lana; nagaawas gayod ang akong kopa.
R. Magbalantay kanako ang Ginoo wala nay magmakulang pa kanako.
Ang kaayo lamang ug kaluoy maoy nagasunod kanako, sa tanang mga adlaw sa akong kinabuhi; Ug magpuyo ako sa balay sa Ginoo sa mga katuigan sa katuigan.
R. Magbalantay kanako ang Ginoo wala nay magmakulang pa kanako.
BASAHON II
Phil. 4:12-14, 19-20
KINUTLO GIKAN SA SULAT NI SAN PABLO NGADTO SA TAGA-FILIPOS
Mga igsuon: Nasinati ko ang pagpuyo diha sa kawad-on ug kahamugaway. Nakakat-on na ako niining paagiha sa pagkinabuhi bisan diin ug bisan kanus-a, busog ako kun gigutom, hamugaway kun nagkalisodlisod. May kalig-on ako sa pagsagubang sa tanan tungod sa gahom nga gihatag kanako ni Cristo.
Apan dalaygon kamo tungod sa inyong pagtabang kanako sa akong mga kalisdanan.
Ug ang akong Dios, uban sa nag- hingapin niyang bahandi diha kang Cristo Jesus, magsangkap sa tanan ninyong mga kinahanglan. Daygon ta ang atong Dios ug Amahan hangtod sa kahangturan. Amen.
ANG PULONG SA GINOO.
EBANGHELYO
Mt. 22:1-14
TINAAS
Kinutlo gikan sa Balaan nga Ebanghelyo sumala ni Mateo
Ug mitubag pag-usab si Jesus sa mga pangulong pari ug mga punoan sa katawhan ug misulti kanila pinaagi sa mga sambingay nga nag-ingon, "Ang gingharian sa langit matandi sa usa ka tawo nga hari nga nag-andam og kombira sa kasal alang sa iyang anak. Ug gipadala niya ang iyang mga sulugoon pagtawag sa mga dinapit ngadto sa kombira sa kasal, apan nagdumili sila pagtambong.
"Nagpadala na usab siya og laing mga sulugoon sa pag-ingon, 'Ingna ang mga dinapit,
"Tan-awa, andam na ang akong kombira, naihaw na ang akong mga toro ug mga gipatambok nga baka ug ang tanan andam na; dali na kamo sa kombira sa kasal."
Apan walâ sila manumbaling ug milakaw, ang usa ngadto sa iyang uma, ang usa ngadto sa iyang patigayon.
Apan ang ubàn midakop, mipasipala, ug mipatay sa iyang mga sulugoon.
"Ug nasuko ang hari ug mipadala sa iyang mga ginsakpan ug gipapatay kadtong mga mamumuno ug gisunog ang ilang siyudad.
"Unya miingon siya sa iyang mga sulugoon, 'Andam na ang kombira sa kasal, apan ang mga dinapit dili takos; Busa lakaw kamo ngadto sa mga eskina sa kadalanan ug dapita ninyo ngadto sa kombira sa kasal kutob sa inyong hikaplagan.
Ug paggula niadtong mga sulugoon ngadto sa kadalanan gitigom nila ang tanan nga ilang hikaplagan, mga daotan ug maayo; ug napuno sa mga dinapit ang hawanan sa kombira.
"Apan pagsulod sa hari aron pagtan-aw sa mga dinapit nakita niya ang usa ka tawo nga walâ magsul-ob og bisti sa kasal.
Ug miingon siya kaniya, 'Higala, giunsa man nimo pagsulòd dinhi nga walâ ka man magsul-ob og bisti sa kasal?'
Apan walâ siya makatingog. Unya miingon ang hari sa mga alagad, 'Gapusa siya, tiil ug kamot, ug ilabog siya ngadto sa kangitngit sa gawas; didto duna unyay pagminatay ug pagkagot sa mga ngipon.
"Kay daghan ang gitawag apan diyotay ra ang gipili."
Ang Ebanghelyo sa Ginoo.
MINUBO
Mt. 22:1-10
Kinutlo gikan sa Balaan nga Ebanghelyo sumala ni Mateo
Ug mitubag pag-usab si Jesus sa mga pangulong pari ug mga punoan sa katawhan ug misulti kanila pinaagi sa mga sambingay nga nag-ingon,
"Ang gingharian sa langit matandi sa usa ka tawo nga hari nga nag-andam og kombira sa kasal alang sa iyang anak. Ug gipadala niya ang iyang mga sulugoon pagtawag sa mga dinapit ngadto sa kombira sa kasal, apan nagdumili sila pagtambong.
"Nagpadala na usab siya og laing mga sulugoon sa pag-ingon, 'Ingna ang mga dinapit, "Tan-awa, andam na ang akong kombira, naihaw na ang akong mga toro ug mga gipatambok nga baka ug ang tanan andam na; dali na kamo sa kombira sa kasal." Apan wala sila manumbaling ug milakaw, ang usà ngadto sa iyang uma, ang usa ngadto sa iyang patigayon.
Apan ang uban midakop, mipasipala, ug mipatay sa iyang mga sulugoon.
"Ug nasuko ang hari ug mipadala sa iyang mga ginsakpan ug gipapatay kadtong mga mamumuno ug gisunog ang ilang siyudad.
"Unya miingon siya sa iyang mga sulugoon, 'Andam na ang kombira sa kasal, apan ang mga dinapit dili takos; Busa lakaw kamo ngadto sa mga eskina sa kadalanan ug dapita ninyo ngadto sa kombira sa kasal kutob sa inyong hikaplagan.' Ug paggula niadtong mga sulugoon ngadto sa kadalanan gitigom nila ang tanan nga ilang hikaplagan, mga daotan ug maayo; ug napuno sa mga dinapit ang hawanan sa kombira."
Ang Ebanghelyo sa Ginoo.
Katilingbanong Pag-ampo:
Oktubre 15, 2023
Pari: Kitang tanan gidapit sa bangkite sa Ginoo nga maoy tinubdan sa atong lawasnon ug espirituhanon nga kinabuhi. Busa atol niining maong kasaulogan atong ihalad karon ang atong mga pag-ampo diha sa pag- ingon:
GINOO, DUNGGA KAMI.
1. Nga ang mga lideres sa Simbahan ilabina si Papa Francisco, mga obispo, mga pari, mga diyakono ug mga relihiyos panalanginan unta sa Diyos diha sa ilang pagpaambit sa mga Sakramento subay sa Kristohanong diwa. Mag- ampo kita sa Ginoo.
2. Nga ang mga namunoan sa atong nasud giyahan unta ug lamdagan sa Espiritu Santo aron mahatagan og maayong kasulbaran ang ilang mga plano ug mga gimbuhaton. Mag-ampo kita sa Ginoo.
3. Alang sa mga batan-on nga gitawag sa Dios ngadto sa bokasyon sa pagkapari o pagkarelihiyoso, pinaagi sa lamdag sa Espiritu Santo ug sa pangama ni Santa Maria mabati unta nila ang tawag sa Diyos nga gitagana alang kanila. Mag-ampo kita sa Ginoo.
4. Nga ang mga nasud nga anaa sa panagbingkil ug giyera, makabaton og malumo nga kasing-kasing, mapasayloon, mahigugmaon ug maalamon aron maghari ang kalinaw ug gugma sa matag usa. Mag-ampo kita sa Ginoo.
5. Nga ang mga naghalad sa ilang pagdayeg ngadto sa Diyos ilabina nila _________ mamahimo unta silang mga maayong sumbanan sa katawhan ngadto sa diwa sa pagka-Kristiyanong Katoliko. Mag-ampo kita sa Ginoo.
6. Alang sa atong mga mahal sa kinabuhi nga mipanaw na, ilabina nila __________ makadawat na unta sila sa ganti nga gitagana sa Dios kanila, ang kinabuhing walay katapusan. Mag-ampo kita sa Ginoo.
Pari: Amahang Langitnon, amo nang gikahalad kanimo ang among mga pag-ampo ug panginahanglan. Kami nagalaum nga makadawat na sa mga grasya subay sa imong kabubut-on, pinaagi ni Jesucristo nga among Ginoo. Amen.
PAHIBALO
Oktobre 15, 2023
1. Adunay pagahimoon nga Confirmation karong umaabot nga bulan sa Nobyembre 2023. Giawhag kadtong mga interisadong magpakompirma sa pagparehistro ngadto sa ilang mga tagsa-tagsa ka mga Gkk, ug paghatag sa gikinahanglang mga requirements sama sa IDS alang sa Kompirma ug Baptismal Certificate. Ang deadline para sa pag-submit karong Oktobre 28, 2023.
2. Ang parokya sa San Pedro Cathedral, nagpahigayon ug usa ka Raffle for a Cause, alang sa pag repair sa Cathedral. Dagkong premyo ang naghulat alang sa mga mananaog. Ang mga ticket mamahimong mapalit sa opisina sa atong parokya sa kantidad nga 100pesos kada ticket. Ang Grand Raffle Draw pagahimoon karong umaabot nga Desyembre 23, 2023.
3. Adunay pagahimoon nga Youth Congress ang Archiocesan Divine Mercy Apostolate dinhi sa atong vicariato, ang La Purisima Vicariate, kini ipahigayon karong umaabot nga Oktobre 21, 2023, adlaw'ng sabado, sa ala 1:00 sa hapon diha sa Holy Cross of Mintal gym. Giawhag ang mga kabatan-onan sa pag-apil niining maong kalihukan.
Daghang Salamat.
Comments
Post a Comment