IKAKAWHAAG WALO

IKAKAWHAA'G WALO NGA DOMINGGO

a. BASAHON I

Is. 25: 6-10

Kinutlo gikan sa basahon ni Propeta Isaias.

Niining bukira himoon sa Ginoo nga Labing Gamhanan alang sa tanang katawhan ang usa ka kombira sa mga lamiang pagkaon, ug maayong bino. Ug langkaton Niya ning bukira ang tabon nga nagtaptap sa tanang katawhan. Wagtangon Niya ang kamatayon, ug pahiran sa Ginoong Dios ang tanang mga luha, ug papason Niya ang kaulaw sa iyang katawhan; mao kini ang gisulti sa Ginoo.

Ikaingon niadtong adlawa, "Kini mao ang atong Dios; gihulat nato Siya aron Iya kitang luwason. Mao kini ang Ginoo nga atong gipaabot; maglipay kita sa Iyang pagluwas kanato." 

Kay dinhi niining bukira magpabilin ang gahum sa Ginoo, ug

tunobtunoban ang Moab, ingon nga ang uhot tunobtunoban diha sa kalapukan.

Ang Pulong sa Ginoo.

b. SALMO RESPONSORYO

Salmo 23: 1-3,3-4,5-6

Tubag (R) Magbalantay kanako ang Ginoo wala nay magmakulang  pa kanako. 

(Magpuyo ako sa balay sa Ginoo sa tanang mga adlaw sa akong kinabuhi.) 

Magbalantay kanako ang Ginoo wala nay magmakulang pa kanako. Sa lunhaw nga sibsibanan Iya ako nga gipapahulay: Sa daplin sa malinawon nga tubig Iya akong gidala; Iyang gihupay ang akong kalag. (R)

Iya ako nga gitultolan sa matarung nga agianan tungod sa Iyang ngalan. Bisan kon maglakaw ako sa walog sa kangitngitan wala akoy kahadlokan nga dautan; kay anaa Ka man sa akong kiliran sa Imong igbubugaw og sungkod gihatagan Mo ako og kaisog. (R)

Gihikyaran Mo ako og lamesa sa akong atubangan samtang nagtan-aw ang akong mga kaaway; Gidihogan Mo ang akong ulo og lana; nagaawas gayud ang akong kopa. (R)

Ang kaayo lamang ug kalooy maoy nagasunod kanako sa tanang mga adlaw sa akong kinabuhi; Magpuyo ako sa balay sa Ginoo sa mga katuigan nga way katapusan. (R)

c. BASAHON II

Fil. 4:12-14,19-22

Kinutlo gikan sa sulat ni San Pablo ngadto sa taga Filipos.

Nasinati ko ang pagpuyo diha sa kawad-on ug kahamugaway. Nakakat-on na ako niining paagiha sa pagkinabuhi bisan diin ug bisan kanus-a, busog ako kon gigutom, hamugaway kon nagkalisodlisod. May kalig-on ako sa pagsagubang sa tanan tungod sa gahum nga gihatag kanako ni Kristo.

Apan dalaygon kamo tungod sa inyong pagtabang kanako sa akong mga kalisdanan. Ug ang akong Dios, uban sa naghingapin Niyang bahandi diha kang Kristo Jesus, magsangkap sa tanan ninyong mga kinahanglan. Ihatag ta sa atong Dios ug Amahan ang himaya hangtud sa kahangturan. Amen.

Kumusta ang tanang katawhan sa Dios nga Iya ni Kristo Jesus. Nangumosta kaninyo ang mga kauban ko diri. Nangumosta usab kaninyo ang tanang katawhan sa Dios diri labi pa ang mga nagtrabaho sa kagamhanan.

Ang Pulong sa Ginoo.

d. EBANGHELYO

Mt. 22:1-14 o 22:1-10

Ang Santos nga Ebanghelyo sumala ni San Mateo.

(Tinaas)

Migamit na usab si Jesus og mga sambingay sa Iyang pagpakigsulti sa mga tawo. "Ang Gingharian sa langit sama sa usa ka hari nga naghikay og usa ka kombira sa kasal alang sa iyang anak nga lalaki. Gisugo niya ang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya: 'Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal!' Apan wala magtagad ang mga dinapit, ug nagpadayon sila sa ilang mga buluhaton: ang usa sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan: 'Andam na ang akong kombira sa kasal, apan dili angay niini ang mga tawo nga akong gidapit. Busa pangadto kamo sa kadalanan ug dapita ang tanan nga inyong makaplagan. Ug ang mga sulugoon nangadto sa kadalanan ug gitigom nila ang tanan nga ilang nakaplagan, maayo ug dautan, ug napuno sa mga tawo ang dapit nga gikombirahan.

Unya misulod ang hari aron pagtan-aw sa mga dinapit, ug nakita niya ang usa ka tawo nga wala magsul-ob og bisti sa kasal. Gipangutana siya sa hari, 'Higala, giunsa man nimo pagsulod dinhi nga wala ka man magsul-ob sa bisti sa kasal?' Apan wala motingog ang tawo. Unya miingon ang hari sa iyang mga sulugoon, 'Gapusa ninyo ang iyang mga kamot ug tiil ug ilabog siya ngadto sa kangitngitan sa gawas. Didto maghilak siya ug magkagot sa iyang ngipon. Ug gitapos ni Jesus ang sambingay sa pag-ingon, "Kay daghan ang dinapit, apan diyotay ra ang napili."

Ang Ebanghelyo sa Ginoo.

(Minubo)

Migamit na usab si Jesus og mga sambingay sa Iyang pagpakigsulti sa mga tawo. "Ang Gingharian sa langit sama sa usa ka hari nga naghikay og usa ka kombira sa kasal alang sa iyang anak nga lalaki. Gisugo niya ang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya: 'Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal! Apan wala magtagad ang mga dinapit, ug nagpadayon sila sa ilang mga buluhaton: ang usa sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan: 'Andam na ang akong kombira sa kasal, apan dili angay niini ang mga tawo nga akong gidapit. Busa pangadto kamo sa kadalanan ug dapita ang tanan nga inyong makaplagan. Ug ang mga sulugoon nangadto sa kadalanan ug gitigom nila ang tanan nga ilang nakaplagan, maayo ug dautan, ug napuno sa mga tawo ang dapit nga gikombirahan.

Ang Ebanghelyo sa Ginoo.

e. KOMENTARYO

Tema: Ang Kalipay nga Naghupot sa Gugma sa Ginoo.

Nabatasan na natong mga Pilipino nga sa higayon nga aduna kitay gisaulog nga importanteng okasyon sa atong kinabuhi, magkombira gayud kita. Ug dili gayud kita makalimot sa pagpangimbita sa atong mga igsoon, paryente, suod nga higala ug uban pang mga kaila. Apan kasagaran dili gayud kita modapit sa mga tawo nga dili nato mga kaila.

Diha sa unang pagbasa, nagpadayag kini nga tungod sa gahum ug gugma sa Ginoo diha sa iyang mga anak, magmaya ug magpista ang iyang mga katawhan kay anaa siya mohatag sa mga grasya. Ang gugma ug ang pagkamanggihatagon sa Ginoo gipamatud-an diha sa ikaduhang pagbasa. Kini naghisgot nga tungod sa mga grasya sa Ginoo nagmaya ang iyang katawhan, adunay panaghiusa ug pag-abi-abi sa usag-usa. Si San Pablo mismo nag-ingon: "Diha sa Dios nga Amahan ang himaya hangtod sa kahangturan. Amen."

Labaw sa tanan diha sa Ebanghelyo, gihatagan kini og dakung punting diha sa sambingay sa usa ka hari nga nagmaya tungod kay ikasal na ang iyang pinalanggang anak nga lalaki. Nga siya nangandam sa pinakadako nga selebrasyon, ug nanawag siya sa tanang katawhan aron moambit sa dakong kalipay. Ingon niini ka daku ang paghigugma sa atong Langitnong Amahan, ang Makagagahum sa tanan. Walay laing gusto ang Ginoo kon dili nga mahatagan og kalipay ang iyang katawhan.

Sa laing bahin, dili usab nato ikalimud nga diha usab sa tawag ug imbitasyon sa Ginoo, daghan usab ang modumili ug dili mosunod sa iyang gusto. Kongkreto kining gipadayag diha sa Ebanghelyo nga diin ang mga gidapit sa hari kadaghanan midumilii ug wala motambong sa selebrasyon. Matuod nga adunay mitubag sa pagdapit sa hari ug mitambong sa kombira apan dili kinasingkasing kon dili napugos lamang. Wala kini magsukad sa iyang kagustuhan o wala kini gugma sa iyang gihimo. Nga kon hatagan nato og kahulugan, dili klaro ang iyang pagtubag sa maong imbitasyon. Mao kini gipadayag sa tawo nga misulod sa kombira nga wala nagsul-ob sa bisti nga pangkasal. Ug sa maong hinungdan gipalabay siya sa hari ngadto sa kangitngit.

Mga igsoon, mao kini ang atong kinabuhi! Sa atong paglawig diha sa dalan sa kinabuhi gihatagan kita sa Dios sa tanan nga atong gikinahanglan aron sangkap kita sa atong panaw. Gihatagan kita sa Ginoo sa iyang mga grasya. Gitawag kita niya sa hiniusang gugma aron magsaulog kita sa dakung kombira nga ang tanan puno sa kalipay ug pagmaya. Apan, kining mahigugmaong tawag sa atong Ginoo wala lamang kini magpasabot kanato sa pagtubag kon dili naghagit usab kini kanato sa pagtubag nga adunay dakung gugma. Ngano man? Tungod kay ang iyang tawag dili sayon ang paghatag sa atong dakung pag-uyon. Adunay daghang babag. Matud pa sa usa ka awit: "Daghan tunok ang dalan nga agian mo. Bug-at ang krus nga pas-anon ug kamatayon naa naghulat kanimo". Lisod ang kinabuhi. Lisod ang pagtuman sa maong tawag. Apan, kon adunay tinuoray nga gugma ang atong pagtubag ug pagsunod sa kabubut-on sa Ginoo, sa walay duhaduha, dayag kaayo nga kita makatagamtam ug makasinati sa kahimayaan nga gitagana kanato sa atong Amahan isip ganti sa atong mga maayong binuhatan ug pag-alagad sa walay kinutuban.

Kay matuod man, ang kalipay nga walay kinutuban sa naghupot sa gugma sa Ginoo. Kay tungod sa gugma kita gitawag, tungod sa gugma kita mitubag ug tungod sa gugma kita magmaya ug magmalipayon diha sa Ginoo. Kay ang Ginoo man ang tinubdan ug gigikanan sa dili hitupngan nga gugma. Kay siya man mismo ang gugma! Nan, atong saulogon ang gugma'ng Diosnon. Amen.

Giya alang sa pamalandong:

1. Nadungog ba nako ang tawag o imbitasyon sa Ginoo? 

2. Unsa may akong gihimo sa dihang nabati nako ang tawag sa Dios? 

3. Gihimo ba kini nako tungod sa gugma?

f. PANGALIYA

Pangulo: Kitang tanan gidapit sa bangkite sa Ginoo nga maoy tinubdan sa atong lawasnon ug espirituhanon nga kinabuhi. Busa atol niining maong kasaulogan atong ihalad karon ang atong mga pag-ampo ug mga panginahanglan ug sa matag pag-ampo kita motubag: GINOO, DUNGGA KAMI.

1. Alang sa nagdumala sa Simbahan, atong Santo Papa, mga Obispo ug kaparian, magmakahuluganon ug anon matinud- unta nilang ipaambit sa tanang katawhan ang mga Sakramento subay sa Kristohanong diwa. Mag-ampo kita.

2. Alang sa mga gitugyanan sa atong nasud ug sa uban, nga unta mabati nila ang giva ug lamdag sa Espiritu Santo aron ang ilang mga plano ug mga gimbuhaton makahatag og kasulbaran sa mga suliran nga gisagubang sa tanang katawhan, Mag-ampo kita.

3. Alang sa mga batan-on nga gitawag sa Dios ngadto sa bokasyon sa pagkapari o sa pagkarelihiyoso, unta ilang mabati ug mahatagan og bili ang tawag sa Dios sa pag-alagad sa Iyang katawhan. Mag-ampo kita.

4. Alang kanatong tanan nga unta ang mga mensahe sa Dios nga atong nabati no magdala kanato sa pagbuhat ug pagpuyo Apil nga nahisubay sa kabubut-on sa Dios. Mag-ampo kita.

5. Alang sa atong mga mahal sa kinabuhi nga mipanaw na, makadawat na unta sila sa ganti nga gitagana sa Dios kanila nga makapuyo na sa puloy-anan nga diin ilang matagamtaman ang kalipay'ng walay katapusan. Mag-ampo kita.

6. Alang sa atong personal nga katuyuan atong i-ampo sa hilum.

Pangulo: Amahang Langitnon, amo nang gikahalad Kanimo ang among mga pag-ampo ug panginahanglan. Uban sa dakung pagsalig ug pagtoo sa Imong gahum, kami nagalaum nga kami makadawat sa mga grasya subay sa Imong kabubut-on. Kini among gipangayo pinaagi ni Kristo among Ginoo. Amen.