IKAKATLOAN NGA DOMINGO

IKAKATLOAN NGA DOMINGGO SA ORDINARYONG PANAHON

a. BASAHON I

Ex. 22: 20-26

Kinutlo gikan sa Basahon sa Exodo

Ang maghalad ngadto sa laing dios gawas kanako, ang Ginoo, kinahanglan patyon."

"Ayaw ninyo palabilabihi o daugdaoga ang usa ka langyaw, kay kamo usab mga langyaw man kaniadto didto sa Ehipto. Ayaw ninyo daugdaoga ang mga biyuda ug mga ilo. Kon daugdaogon ninyo sila, tabangan ko sila inig- pakitabang nila kanako, ug masuko ako pag-ayo ug patyon ko kamo pinaagi sa gubat. Mabiyuda ang inyong mga asawa ug mailo ang inyong mga anak."

"Kon magpahulam kamog salapi sa akong katawhan nga mga kabus, ayaw kamo pagpangayog tubo sama sa gihimo sa uban. Kon kuhaon ninyo ang kupo sa usa ka tawo ingon nga garantiya nga mobayad siya kaninyo, kinahanglan nga iuli ninyo kini kaniya sa dili pa mosalop ang adlaw."

Ang pulong sa Ginoo.

b. SALMO RESPONSORYO

Salmo 18: 2-3,3-4,47-51

Tubag (R) - Gihigugma ko Ikaw, Ginoo, akong kusog.

Gihigugma ko Ikaw, O Ginoo, akong kusog, O Ginoo, akong Bato, akong kota, akong manluluwas. (R)

Akong Dios, akong Bato nga dalangpanan, akong taming, ang gahum sa akong kaluwasan, ang akong kota. Dayegon unta ang Ginoo, nagatuwaw ako, ug seguro ako sa akong mga kaaway. (R)

Mabuhi ang Ginoo! Ug dayegon ang akong Bato! Bayawon unta ang Dios nga akong manluluwas. Ikaw nga naghatag og dagkung kadaugan sa imong hari ug nagpakitag kalooy sa imong gidihogan. (R)

c. BASAHON II

1 Tes. 1:5-10

Kinutlo gikan sa unang sulat ni San Pablo ngadto sa taga Tesalonica.

Nagwali kami sa Maayong Balita dili sa pulong lamang kondili sa gahum sa Espiritu Santo. Hugot ang among pagtoo nga kini matuod gayud. Nasayud kamo giunsa namo pagkinabuhi samtang kami uban pa kaninyo tungod lamang sa inyong kaayohan. Giawat ninyo kami ug ang Ginoo, ug bisag nag-antus kamo pag-ayo gumikan sa inyong pagdawat sa mensahe, nalipay lang gihapon kamo sa kalipay nga gikan sa Espiritu Santo. Tungod niini nahimo kamong panig-ingnan sa tanang magtutuo sa Macedonia ug sa Grecia. Kay pinaagi kaninyo ang mensahe mahitungod sa Ginoo mikaylap sa Macedonia ug sa Grecia. Mikaylap usab sa tanang dapit ang balita mahitungod sa inyong pagtoo sa Dios. Busa wala nay kinahanglan nga amo pa kining isulti, kay sila mismo nagbalita giunsa ninyo kami pagdawat sa among pagduaw kaninyo, ug nga mibiya kamo sa mga diosdios aron pag-alagad sa matuod ug buhi nga Dios. Nagbalita usab sila sa inyong pagpaabot sa Iyang Anak nga moanhi gikan sa langit. Gibanhaw Siya sa Dios ug maoy nga si Jesus magluwas kanato sa umaabot sa kasuko sa Dios. Suko sa

Ang Pulong sa Ginoo.

d. EBANGHELYO

Mt. 22: 34-40

Ang Santos nga Ebanghelyo sumala ni San Mateo.

Sa pagkadungog sa mga Pariseo nga ang mga Saduseo gilupig ni Jesus sa katarungan, nagpanon sila pagduol Kaniya, ug unya usa kanila, nga magtutudlo sa Balaod, misulay pagbitik Kaniya pinaagig pangutana. "Magtutudlo", nangutana siya. "Unsa man ang labing dakung sugo sa Balaod?" Si Jesus mitubag, "Kinahanglan nga higugmaon mo ang Ginoo nga imong Dios sa tibuok mong kasingkasing, sa tibuok mong kalag, ug sa bug-os mong hunahuna. Kini ang labing daku ug ang labing importanteng sugo. Ang ikaduha nga labing importanteng sugo sama sa una: 'Kinahanglan higugmaon mo ang imong isigkatawo ingon sa imong kaugalingon.' Nagsukad niining duha ka sugo ang tibuok Balaod ni Moises ug ang pagtulun-an sa mga propeta.

Ang Ebanghelyo sa Ginoo.

e. KOMENTARYO

Tema: Gugma sa Dios ug sa Usag-usa, Palamboon Ta!

Unsa ba ang kahulogan niining pulong nga GUGMA? Ang gugma usa ka pulong nga naghatag og daghang kahulogan. Kini nagdependi kung giunsa nato paggamit ang maong pulong. Sumala sa deksyonaryo, ang pulong gugma usa ka pagbati o usa ka kasinatian nga ipaambit ngadto sa uban. Pagbati nga ipadangat ngadto sa uban ug sa isigkatawo. Mao nga giingon: kung adunay gugma aduna usab kitay pagtoo ug pagsalig dili lang sa uban kon dili lakip na sa atong labaw nga Makagagahum.

Mao kini ang gipadayag sa atong unang pagbasa karon nagkanayon, si kinsa kadtong maghalad sa laing dios gawas sa Ginoo kinahanglan patyon. Kini nagpasabot nga kita adunay usa ra ka Dios nga mao ang atong Ginoo. Makita ug mabasa usab nato kini sa napulo ka sugo sa Dios. Mao nga ang atong gugma kinahanglan nato ipatigbabaw sa tanan nga panahon alang sa kaayohan natong tanan. Unsaon man nato pagpadayag nga kita nahigugma sa Dios? Aron atong ikapakita nga kita nahigugma sa Dios ato kining ipadayag dili lang sa pulong kon dili lakip na sa buhat pinaagi diha sa atong paghigugma ngadto sa atong isigkatawo. Pinaagi sa pagtabang sa uban nga nanginahanglan ug dili sa pagdaug-daog sa uban. Kining tanan atong ipadangat sa tibook banay aron kita magkaangkon og kahusay ug magpuyo nga malinawon sa atong tagsa tagsa ka puloy-anan.

Ang sulat ni San Pablo ngadto sa taga Tesalonica nagpadayag og usa ka hugot nga pagtoo ngadto sa Ginoo pinaagi sa Espiritu Santo nga tungod niini mibiya sila sa pag- alagad sa mga dios-dios aron sa pag-alagad sa matuod ug buhi nga Dios. Kining tanan alang sa kapasayloan sa usag-usa kanato nga nagtuo. kaniya nga buhi ug makagagahum nga Dios. Mao usab kini ang pulong nga gibungat sa Ginoo sa atong Ebanghelyo karon mahitungod sa dakong sugo nga angay natong batonan sa inadlaw-adlaw nato nga kinabuhi dinhi sa kalibutan. Mao kini ang paghigugma sa Dios ug sa atong isigkatawo. Niining duha ka dagkong sugo sa Dios kini naglangkob na sa napulo ka sugo ni Moises. Sa pagtuman niining maong mga kamanduan sa Dios, nanginahanglan kita og dakong paghigugma ug pagtoo ngadto sa atong Dios aron kini magmalamboon sa atong kinabuhi aron ato usab kini ikapaambit sa uban.

Mao nga kinahanglan atong palamboon ang atong gugma sa Dios ug sa usag-usa. Kay tungod lamang niining paagiha atong ikapadayag ang atong dakong gugma sa Dios bisan pa sa atong mga kasaypanan nga nabuhat dinhi sa kalibutan. Kita nasayod nga tungod sa dakong gugma sa Dios natong mga katawhan iyang gipadala ang iyang bugtong Anak nga si Jesus aron sa pagluwas kanato sa atong mga sala. Aron kita makasinati og kinabuhi nga walay katapusan kon makadangat kita sa iyang gingharian sa langit.

Sa katapusan, angay lamang nga atong padayon ug palamboon ang atong paghigugma sa Dios ug sa matag usa diha sa atong mapadayonong paglawig sa atong kinabuhi bisan pa og adunay dagkong bul-og nga unos nga modangat kanato aron kita makadangat sa kinatumyan sa dalan nga dili mapukan uban sa panabang ug grasya sa Dios. Sa kanunay atong batunan ang GUGMA SA DIOS UG SA USAG-USA PALAMBOON TA. Hinaut pa unta.

Giya alang sa pamalandong:

1. Giunsa man nako pagpadayag ang akong paghigugma sa Dios?

2. Nakatuman ba ako sa mga kasugoan sa Dios?

3. Nakasinati ba ako sa dakung gugma sa Dios sa akong kinabuhi?

f. PANGALIYA

Pangulo: Mga igsoon, atong daygon ug pasalamatan ang Ginoo nga maoy tuburan sa gugma ug kalooy. Busa atong ipadangat Kaniya ang atong mga pag-ampo ug panginahanglan. Ug matag pangamuyo sa kita motubag: AMAHAN, DUNGGA ANG AMONG PAG-AMPO.

1. Alang sa atong Santo Papa, mga Obispo, mga kaparian ug mga relihiyoso, nga unta madasigon ug mahigugmaon nilang isangyaw ang Maayong Balita uban sa kinasingkasing nga pagsaksi ug pagpuyo diha sa ilang kinabuhi. Mag-ampo kita.

2. Alang sa nagdumala sa atong nasud, nga unta magmatinud-anon sila diha sa ilang pagserbisyo sumala sa kabubut-on ug paagi sa Ginoo. Mag-ampo kita.

3. Alang sa atong mga igsoon nga nag-antus sa nagkadaiyang kasakitan sa kinabuhi, makabaton unta sila sa Diosnong kalooy, kaangayan ug kalinaw. Mag-ampo kita.

4. Alang sa mga magtiayon, makabaton unta sila og kalinaw diha sa ilang panimalay ug maghari ang pagsinabtanay ug paghinigugmaay. Mag-ampo kita.

5. Alang sa atong katilingban dinhi sa mabati unta nato ang presensya sa Dios pinaagi sa atong mahigugmaong pagtagad sa usag-usa ilabina sa mga nanginahanglan natong mga kaigsoonan. Mag-ampo kita.

6. Alang sa atong kaugalingon nga katuyuan atong i-ampo sa hilum.

Pangulo: Amahan namong langitnon tan-awa kanunay kining Imong katawhan nga nangandoy kanunay sa Imong grasya ug panabang. Sa tumang pagsalig kami naglaum nga Imong dunggon ang mga pag-ampo nga among gihalad karon pinaagi ni Kristo among Ginoo. Amen.