Ikakawhaan nga Domingo Sulod sa Tuig

Ikakawhaan nga Domingo Sulod sa Tuig

PASIUNA

Agosto 20, 2023

Maayong buntag/hapon mga igsuon diha ni Cristo.

Karong Domingoha mao ang Ikakawhaan nga Domingo sa Ordinaryong Panahon.

Ang Unang Pagbasa gikuha gikan sa Basahon ni Propeta Isaias. Dinhi atong madungog nga ang Ginoo nagkanayon, "Sunda ang hustisya ug buhata ang matarong, kay sa dili madugay luwason ko na kamo."

Ang Ikaduhang Pagbasa gikuha gikan sa Sulat ni San Pablo ngadto sa taga-Roma. Siya miingon kanila, "Kay dili gayod mag-usab-usab ang Dios sa iyang hunahuna labot sa iyang pillion ug panalanginan."

Ang Ebanghelyo gikuha gikan sa Santos nga Ebanghelyo sumala ni San Mateo. Kini nagsaysay mahitungod sa usa ka babaye nga nagpakitabang kang Jesus.

Palihug manindog alang sa pagsugod sa Santos nga Eyukaristiya.

BASAHON I

Is. 56:1, 6-7

KINUTLO GIKAN SA BASAHON NI PROPETA ISAIAS

Nag-ingon ang GINOO sa iyang katawhan, "Sunda ang hustisya ug buhata ang matarong, kay sa dili madugay luwason ko na kamo, ug ipaila ko ang akong katarong.

"Ang mga langyaw nga miduol sa GINOO aron pag-alagad kaniya, ug nagtamod sa Adlawng Igpapahulay ug nagtuman sa iyang mga sugo

panad-on ko sa balaan kong bukid, ug lipayon ko sila didto sa akong Templo. Ang ilang mga halad-sinunog ug mga halad-inihaw dawaton ko didto sa akong halaran; kay ang akong Templo nganlan mag balay-alampoanan alang sa tanang katawhan."

ANG PULONG SA GINOO.

SALMO RESPONSORYO

Ps. 67:2-3, 5, 6, 8

R. O Dios, magadayeg unta kanimo ang tanang mga nasod.

Kaloy-an unta kita sa Dios ug bendisyonan niya; ipadan-ag unta kanato ang iyang nawong.

Mahibaw-an unta ang imong dalan

dinhi sa yuta; diha sa tanang mga nasod ang imong kaluwasan. 

R. O Dios, magadayeg unta kanimo ang tanang mga nasod.

Maglipay unta ang mga nasod ug magsadya tungod kay nagamando ka sa kanasuran diha sa katarong; ang mga nasod dinhi sa yuta imong agakon.

R. O Dios, magadayeg unta kanimo ang tanang mga nasod.

Daygon unta ikaw sa katawhan, O Dios; ang tanang kalungsuran magdayeg unta kanimo.

Panalanginan unta kita sa Dios, ug ang tanang kautlanan sa yuta mahadlok unta kaniya.

R. O Dios, magadayeg unta kanimo ang tanang mga nasod.

BASAHON II

Rom. 11:13-15, 29-32

KINUTLO GIKAN SA SULAT NI SAN PABLO NGADTO SA TAGA-ROMA

Karon, bahin kaninyong mga dili Judio: ipasigarbo ko ang akong bulohaton ingon nga apostol ako sa mga dili Judio, aron masina ang akong isigka-Judio ug maluwas ko ang pipila kanila. Kon sa dihang gisalikway sila, ang kalibutan napasig-uli ngadto sa Dios, unsa pa kaha kon dawaton sila? Kinabuhi alang sa mga patay! Kay dili gayod mag-usab-usab ang Dios sa iyang hunahuna labot sa iyang pilion ug panalanginan. Kamong mga dili Judio misupil sa Dios kaniadto, apan karon gikaluy-an kamo sa Dios tungod kay misupil man ang mga Judio. Sa maong pagkaagi, tungod sa kaluoy nga nadawat ninyo, ang mga Judio misupil sa Dios aron sila usab makadawat sa kaluoy sa Dios. Kay gihimo sa Dios ang tanang mga tawo nga masupilon aron ikapakita niya ang iyang kaluoy kanilang tanan.

ANG PULONG SA GINOO.

ANG EBANGHELYO

Mt. 15:21-28

Kinutlo gikan sa Balaan nga Ebanghelyo sumala ni Mateo

Ug human si Jesus mibiya niadtong dapita, mipahilayo siya ngadto sa kayutaan sa Tiro ug sa Sidon. 

Ug, tan-awa, usa ka babaye nga Canaanhon, nga gikan niadtong mga dapita, migula ug nagsinggit nga nagkanayon, "Kaloy-i intawon akò, Ginoo, Anak ni David; ang akong anak nga babaye giyawaan pag-ayo."

Apan walay gitubag nga pulong si Jesus kaniya.

Ug midúol ang iyang mga tinun-an ug naghangyo kaniya nga nag-ingon, "Papahawaa siya, kay nagpunay siya og singgit sunod kanato."

Apan mitubag si Jesus ug miingon,

"Wala akò gipadala gawas lamang

sa mga nawalang karnero sa balay sa Israel."

Apan midúol siya ug miluhod atubangan ni Jesus, ug miingon, "Ginoo, tabangi intawon ako."

Apan mitubag siya ug miingon,

"Dili maayo nga kuhaon ang pan sa mga anak ug ilabay sa mga iro."

Apan ang babaye miingon,

"Oo, Ginoo, apan bisan gani ang mga iro makakaon man sa mga mumho nga mahulog gikan sa lamesa sa ilang mga agalon."

Unya mitubag si Jesus ug miingon kaniya, "O babaye, pagkadako sa imong pagtuo! Mahitabo kanimo sumala sa imong gitinguha." Ug naayo ang iyang anak sukad niadtong taknaa.

Ang Ebanghelyo sa Ginoo.

KATILINGBANONG PAG-AMPO Agosto 20, 2023

Pari: Ang atong Langitnong Amahan nagdasig kanunay kanato sa pag-ila ug pagsinati sa iyang presensiya diha sa atong mga buluhaton ilabina diha sa atong mga panginahanglan. Busa ihalad nato kaniya ang atong mga pag-ampo ug sa matag pangaliya, kita moingon:

NANGAMUYO KAMI KANIMO, GINOO, PATALINGHUGI KAMI. 

1. Nga ang atong Santo Papa, mga Obispo, Kaparian ug mga Relihiyoso, mamahimong magmakanunayon sa ilang pag-alagad sa Simbahan, ang katawhan sa Dios. Mag-ampo kita.

2. Nga ang mga lideres sa atong panggamhanan dinasig sa lamdag sa Espiritu Santo, maglantaw sa kaayohan sa tanang katawhan ilabina gayod niadtong nanginahanglan sa hinanaling pagtagad ug pag-atiman. Mag-ampo kita.

3. Nga ang mga pangulo sa Gagmayng Kristohanong Katilingban, makabaton sa kalig-on sa pagtuo ug hingpit nga pagsalig sa gahum sa Dios nga maoy ilang gabayan sa ilang matinud-anon nga pag-alagad. Mag-ampo kita.

4. Nga ang mga nagmasakiton, tigulang ug himalatyon, makasinati sa presensya ug gugma ni Cristo pinaagi sa mga nag-amoma kanila. Mag-ampo kita.

5. Nga ang mga nagadayeg ug nagapasamalamat sa Ginoo ilabina nila _________ mahisama sa babaye sa Ebanghelyo nga maisugon ug mapaubsanon ngadto kang Cristo. Mag-ampo kita.

6. Nga ang tanang mipanaw na ngadto sa laing kalibutan ilabina sila  _______  makadawat na sa kinabuhing walay katapusan. Mag-ampo kita.

Pari: Langitnong Amahan, nasayod ka tanan namong mga sa panginahanglan bisan pa og dili namo ibungat kanimo. Sa tumang pagsalig, naglaum kami nga amo kining huptan subay sa imong kabubut-on ug paagi. Kini among gipangayo pinaagi ni Cristo nga among Ginoo. Amen