IKANAPULOG UNOM NGA DOMINGO

IKANAPULO'G UNOM NGA DOMINGGO

a. BASAHON I

Kinaadman 12; 13, 16-19

Kinutlo gikan sa basahon sa Kinaadman.

Walay laing Dios gawas Kanimo, nga nagaatiman sa tanan, aron Imong mapasundayag nga wala Ka magpakanaog hukom sa di- minatarung. Kay ang Imong gahum maoy tinubdan sa hustisya; ug mao kini nga Ginoo Ka sa tanan, ug maoy naghimo nga magapasaylo Ka sa tanan. Kay magapasundayag Ka sa Imong gahum, kon Ikaw dili toohan nga hingpit diha sa gahum, ug gibadlong Mo ang kamapangahason niadtong wala makaila Kanimo. Apan bisan Ikaw tag-iya sa gahum, nagahukom Ka nga maloloy- on, ug inubanag dakung kaayo gidumala Mo kami; kay nagauban Kanimo ang gahum, kon Ikaw magbuot niini.

Ug Imong gitudloan ang Imong lungsod pinaagi sa Imong mga buhat, nga kinahanglan nga ang matarung magmaloloy-on usab; ug Imong gihatagan ang Imong mga anak og maayong katarungan sa paglaum nga hatagan Mog luna ang paghinulsol tungod sa ilang mga sala.

Ang Pulong sa Ginoo.

b. SALMO RESPONSORYO

Salmo 86: 5-6,9-10,15-16

Tubag (R) Ginoo, maayo Ikaw ug mapasayloon.

Ikaw, O Ginoo, maayo ug mapasayloon, puno sa kalooy alang sa tanan nga magasangpit Kanimo. Patalinghogi, O Ginoo, ang akong pag-ampo ug pamatia ang tingog sa akong pangamuyo. (R)

Ang tanang mga nasud nga Imong gibuhat moabot ug mosimba Kanimo, O Ginoo, ug maghimaya sa Imong ngalan. Kay halangdon Ka man ug naghimo Ka og katingalahang mga buhat; Ikaw lamang mao ang Dios. (R)

Ikaw, O Ginoo, maoy usa ka Dios nga maloloy-on ug mahigugmaon, dugay nga masuko, puno sa kalooy ug kamatinumanon. Lingia ako ug kaloy-i ako: ihatag ang Imong kusog ngadto sa Imong sulugoon. (R)

c. BASAHON II

Roma 8: 26-27

Kinutlo gikan sa sulat ni San Pablo ngadto sa taga Roma.

Sa samang pagkaagi, sa atong pagkamahuyang tabangan kita sa Espiritu, kay wala kita masayud unsaon nato pag-ampo; ang Espiritu mismo mangaliyupo sa Dios alang kanato uban sa mga pag-agulo nga dili ikasaysay. Ug ang Dios nga nasayud sa kasingkasing sa tawo, nasayud unsay gihunahuna sa Espiritu, kay ang Espiritu mangaliyupo sa Dios alang sa Iyang katawhan sumala sa Iyang kabubut-on.

Ang Pulong sa Ginoo.

d. EBANGHELYO

Mt. 13:24-43 o 13:24-30

Ang Santos nga Ebanghelyo sumala ni San Mateo..

(Tinaas)

Unya misugilon si Jesus kanilag laing sambingay: "Ang Gingharian sa langit sama sa usa ka tawo nga nagpugas og maayong binhi didto sa iyang uma. Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya. Sa nakatubo na ang mga tanum ug misugod na pagbuswak ang mga uhay, diha pa mailhi ang mga sagbot. Ang mga sulugoon sa tag-iya miduol kaniya ug miingon, 'Sir, maayong binhi ang gipugas mo sa imong uma, busa diin man gikan ang mga sagbot?' Siya mitubag, 'Usa ka kaaway ang naghimo niini. Sila nangutana kaniya, "Gusto ka bang pangibton namo ang mga sagbot?" Siya mitubag, 'Ayaw! Kay sa inyo unyang pagpangibot sa mga sagbot, maapil unyag kaibot ang trigo. Pasagdi ninyo nga ang trigo ug ang mga sagbot magdungag tubo hangtud sa ting-ani, kay ingnon ko ra unya ang mga mangangani: Ibta ninyo pag-una ang mga sagbot, bugkosa kini ug ilabay ngadto sa kalayo; apan tigoma ang trigo ug hiposa didto sa akong kamalig."

Unya misugilon si Jesus kanilag laing sambingay: "Ang Gingharian sa langit sama sa liso sa mustasa, ang labing gamay sa tanang liso. Gikuha kini sa usa ka tawo ug gipugas didto sa iyang uma, ug sa pagtubo na sa maong binhi, nahimo kini nga labing daku sa tanang tanum. Kini nahimong kahoy, ug nanugpa ang mga langgam ug nagsalag sa iyang mga sanga."

Si Jesus misugilon na usab kanila og laing sambingay: "Ang Gingharian sa langit sama sa igpapatubo sa pan. Gikuha kini sa usa ka babaye ug gisagol sa usa ka takos nga harina, hangtud mitubo ang tibuok minasa." Si Jesus migamit og mga sambingay aron pagsugilon niining mga butanga ngadto sa mga tawo; wala Siyay gisulti kanila bisag unsa kondili pinaagig sambingay. Gihimo Niya kini aron matuman ang giingon sa propeta: "Mogamit Akog mga sambingay kon makigsulti Ako kanila. Suginlan Ko silag mga butang nga wala pa hibaloi sukad mabuhat ang kalibutan."

Unya mibiya si Jesus sa mga tawo ug misulod sa balay. Ang Iyang mga tinun-an miduol Kaniya ug miingon, "Sultihi kami sa kahulugan sa sambingay mahitungod sa mga sagbot sa uma." Si Jesus mitubag: "Ang tawo nga nagpugas sa maayong binhi mao ang Anak sa Tawo; ang uma mao ang kalibutan; ang maayong binhi mao ang mga tawo nga sakop sa Gingharian; ang mga sagbot mao ang mga tawo nga sakop sa Yawa; ug ang kaaway nga nagsabod sa mga sagbot mao ang Yawa. Ang pangani mao ang katapusan sa kalibutan, ug ang mangangani mao ang mga anghel. Maingon nga ang mga sagbot hipuson ug sunogon, mao usab kini ang mahitabo sa katapusan sa kalibutan: ang Anak sa Tawo magsugo sa lyang mga anghel sa paghipos gikan sa Iyang Gingharian sa tanan nga maoy nakaangin sa mga tawo sa pagpakasala, ingon man ang tanan nga nagbuhat og dautan, ug itambog sila ngadto sa hudno nga nagdilaab, diin maghilak sila ug magkagot sa ilang ngipon. Unya ang katawhan sa Dios modan-ag sama sa adlaw didto sa Gingharian sa ilang Amahan. Busa pamati kon may dalunggan kamo!"

Ang Ebanghelyo sa Ginoo.

(Minubo)

Unya misugilon si Jesus kanilag laing sambingay: "Ang Gingharian sa langit sama sa usa ka tawo nga nagpugas og maayong binhi didto sa iyang uma. Usa niana ka gabii, samtang nangatulog ang tanan, usa ka kaaway miadto ug misabod og liso sa mga sagbot sagol sa trigo, ug unya mibiya. Sa nakatubo na ang mga tanum ug misugod na pagbuswak ang mga uhay, diha pa mailhi ang mga sagbot. Ang mga sulugoon sa tag-iya miduol kaniya ug miingon, 'Sir, maayong binhi ang gipugas mo sa imong uma, busa diin man gikan ang mga sagbot?' Siya mitubag, 'Usa ka kaaway ang naghimo niini. Sila nangutana kaniya, "Gusto ka bang pangibton namo ang mga sagbot?" Siya mitubag, 'Ayaw! Kay sa inyo unyang pagpangibot sa mga sagbot, maapil unyag kaibot ang trigo. Pasagdi ninyo nga ang trigo ug ang mga sagbot magdungag tubo hangtud sa ting-ani, kay ingnon ko ra unya ang mga mangangani: Ibta ninyo pag-una ang mga sagbot, bugkosa kini ug ilabay ngadto sa kalayo; apan tigoma ang trigo ug hiposa didto sa akong kamalig."

Ang Ebanghelyo sa Ginoo.

e. KOMENTARYO

Tema: Ang Dios Matarung, ang Iyang Gahum hangtod sa kahangturan.

Adunay mga panahon sa atong kinabuhi nga kita maglibog ilabina gayod kon mag-atubang kita og mga problema, mga kahadlok, mga kasakit ug mga balatian sa atong kaugalingon. Usahay makapangutana kita, aduna pa bay Ginoo? Nganong nag-antus man ako sa hilabihan?

Apan gipahinumduman kita karon diha sa mga pagbasa. Ang unang pagbasa nagpadayag nga anaa gayod ang Dios. Dili usa ka halayong Dios, dili Dios nga way gahom. Kini nagsulti kanato nga ang atong giila nga Dios, makagagahum sa tanan.

Dios nga mahigugmaon, Dios nga nag-amuma kanato, kita Iyang mga anak nga Iyang giatiman pag-ayo. Ang Iyang kusog mao ang tinubdan sa mga matarong ug ang Iyang kagahuman nagpasaylo sa atong mga sala. Bisan og kitang lyang mga anak wala magpakabana Kaniya apan sa gihapon Siya nagpadayon sa paghigugma ug pag-atiman kanato. Ang atong Dios, nga bisan sa Iyang kagahuman, nag-atiman kanato nga walay pinalabi.

Diha sa ikaduhang pagbasa nagpadayag nga ang Dios uban kanato, diin ang Iyang Espiritu nagalihok sa matag usa kanato. Nagpahinumdom kini kanato nga ang Balaang Espiritu nagtabang kanato diha sa atong mga kahuyangan, mga kaguol ug mga problema. Siya mao ang atong lamdag ug kusog aron kita molahutay sa pagsagubang sa tanang mga panghitabo sa atong kinabuhi. Apan kita wala maghatag og bili niini. Wala na gani kitay panahon sa pag-ampo nga mao man unta kini ang hustong higayon nga kita mahiduol sa Ginoo.

Mao nga ang Balaang Espiritu ania gayud kanunay uban kanato kay Siya man ang naghatag kanato og kusog diha sa atong mga kahuyangan. Siya ang atong maglilig-on ug maglalamdag sa panahon nga kita huyang ug magul-anon. Dili kita angay nga makalimot sa kaayo sa Dios, kay anaa siya Dios uban kanato kanunay pinaagi sa Iyang Balaang Espiritu.

Ang Ebanghelyo ni San Mateo naghulagway sa usa ka Gingharian nga iyang gitandi sa usa ka magpupugas og maayong binhi, sama sa usa ka sa liso sa mustasa ug sama sa igpapatubo sa pan. Nagpadayag kini nga gitanyag na sa Dios ang tanang kaayohan ngadto sa Iyang katawhan tungod kay gihigugma man kita sa Dios sa walay kinutubang gugma. Ug gipamatud-an sa Dios ang maong gugma pinaagi sa pag-antus ug kamatayon sa Iyang Bugtong Anak. Kon giunsa nato pagdawat ang dakung paghigugma sa Dios kanato kita ra gayod ang makapamatuod niini atubangan sa Dios. Tataw kaayo nga gibuhat kita sa Dios sumala sa Iyang gugma. Apan tungod sa atong pagkamasinupakon sa Iyang kabubut-on mipahilayo kita kaniya gumikan sa atong pagkamakasasala. Apan bisan pa man sa atong mga kasal-anan, wala kita pasagdi sa Dios. Sa kanunay kita Iyang gitawag sa pagpaduol Kaniya nga miabot sa pagtahan sa kinabuhi sa Iyang Anak aron kita maluwas ug makabaton og kabanhawan ug aron kita makasinati sa ganti nga mao ang Gingharian sa Langit inig abot na sa gitakda nga panahon.

Kini usa ka hagit kanatong tanan, atong pamalandongan sa kinasingkasing gayod ang mga mensahe sa gitisok kanato sa Dios. Maanaa unta kanato ang hingpit nga pagsalig ug pagtuo sa Dios tungod kay puno Siya sa kaayo, ang Iyang gahom dili matupngan, Siya kauban nato hangtud sa kahangturan. Anaa ra sa atong tagsa tagsa ka kaugalingon sa pagbuhat sa mga butang nga gitudlo kanato sa giya sa Espiritu Santo aron kita magpuyo sa katarung ug gugma subay sa kabubut-on sa atong Amahan. Dili pa ulahi ang tanan. Matag higayon sa atong kinabuhi usa ka hagit sa kabag-ohan. Mao nga dili nato usikan ang panahon. Dili nato hulaton nga mobalik na ang Ginoo aron sa pagpangayo og husay sa tagsa tagsa nato ka binuhatan. Karon na ang takna sa pagpangandam.

Magsugod kita sa gagmay'ng mga butang. Dili kita pasagdan sa Dios. Siya kanunay magauban kanato, nagagiya kanato bisan pa sa atong pagkadili angayan tungod sa atong pagkamakasasala. Ania Siya uban kanato, samtang kita makigbugno sa pagpuyo ning kinabuhia isip Iyang mga anak. Ug samtang nagapadayon pa kita pagpanaw padulong sa kahingpitan. Hinaut pa unta.

Giya alang sa pamalandong:

1. Unsa man akong buhaton kon ang akong nahisalaag ako sa dalan nga gipasubay sa Ginoo kanako?

2. Nahimo ba akong maayong binhi sa katilingban o sagbot ba hinuon sa katilingban? Kon ugaling usa ako ka sagbot unsa man akong himoon sa akong kinabuhi?

f. PANGALIYA

Pangulo: Mga igsoon, diha sa hiniusang pag-ampo ug sa tumang pagsalig, ato karong ihalad sa atong Langitnong Amahan ang ato ug mga panginahanglan sa uban. Sa matag pangamuyo kita motubag: 

GINOO, DUNGGA KAMI.

1. Alang sa tibuok Simbahan nga ang grasya sa Ginoo mamahimong dayag diha sa iyang pagpakaylap sa Pulong sa Dios ngadto sa tanang katawhan. Mag-ampo kita.

2. Alang sa mga naghupot og katungdanan sa atong panggamhanan, nga pinaagi sa giya sa Espiritu Santo makahimo unta www.sila sa pagtubag sa mga panginahanglan sa katawhan. Mag-ampo kita.

3. Alang sa mga lideres sa atong tagsa tagsa ka katilingban nga makabaton sila og kadasig sa pagpadayon sa ilang pagpangalagad bisan pa man sa mga pagsulay nga ilang matagamtaman. Mag-ampo kita.

4. Alang sa atong mga kaigsoonan nga nag-antus sa tumang kalisod nga unta ilang masinati ang grasya sa Dios nga maoy makahatag og kabag-ohan sa ilang kinabuhi. Mag-ampo kita.

5. Alang kanatong tanan nga nagkatigum karon, motuhop unta sa matag usa kanato ang mga mensahe sa Dios nga atong nadungog ug ato kining paningkamutan nga atong mapuy-an ug makapaambit sa atong mga kaigsoonan. Mag-ampo kita.

6. Alang sa atong personal nga katuyuan, ato kining i-ampo diha sa kahilum.

Pangulo: Dios nga Amahan, ania kining Imong mga anak nga nangandoy sa Imong kalooy ug panabang. Puno sa pagtoo dungga ang among mga pag-ampo nga among gihalad karon pinaagi ni Kristo among Ginoo. Amen.