IKANAPULO'G PITO NGA DOMINGGO

IKANAPULO'G PITO NGA DOMINGGO

a. BASAHON I

1 Mga Hari 3:5,7-12

Kinutlo gikan sa unang basahon sa mga Hari. 

Ang Ginoo nagpakita kang Salomon pinaagi sa usa ka damgo sa gabii. Ang Dios miingon: "Pangayo Kanako ug ihatag Ko kanimo." Si Salomon mitubag: "O Ginoo nga akong Dios, gihimo Mo ang Imong ulipon nga hari ilis ni David akong amahan: apan ako usa lamang ka batan-on, wala akoy kalibutan unsaon pagpamuhat.

Nagaalagad ako Kanimo sa kinataliwad-an sa katawhan nga Imong gipili, usa ka dakung katawhan, nga dili maisip ni maihap tungod sa kadaghan.

Busa hatagi ang imong ulipon og usa ka masinabtanong kasingkasing aron sa paghukom sa imong katawhan, aron maila Ko ang kalainan sa maayo ug sa dautan; kay kinsay makahimo sa pagdumala niining imong daku nga katawhan?" Ug nakapahimuot sa Ginoo, nga si Salomon naghangyo niining butanga.

Busa ang Dios miingon kaniya: Tungod kay nangayo ka niining butanga, ug wala ka mangayo alang sa imong kaugalingon sa hataas nga kinabuhi, ni sa mga bahandi ni sa kinabuhi sa imong mga kaaway, kondili nangayo ka alang sa imong kaugalingon ug salabutan aron mahibalo ka unsa ang matarung, buhaton Ko sumala sa imong gipangayo.

Ihatag Ko kanimo ang usa ka maalamon ug masinabtanong kasingkasing; sa ingon nga walay sama Kanimo sa mga nanghiuna kanimo, ug sunod kanimo walay makatupong kanimo.

Ang Pulong sa Ginoo.

b. SALMO RESPONSORYO

Ps. 119: 57,72,76-77,127,129-130

Tubag (R) Ginoo, gihigugma ko ang Imong mga sugo.

Nagaingon ako, O Ginoo, nga ang akong bahin mao ang pag- amping sa Imong mga pulong. Ang balaod sa Imong baba mas bililhon alang kanako kay sa linibo nga salapi nga bulawan ug plata. (R)

Maghupay unta kanako ang Imong kalooy sumala sa Imong saad ngadto sa Imong mga sulugoon. Padangata kanako ang Imong kalooy aron mabuhi ako kay ang Imong balaod maoy akong kalipay. (R)

Kay gihiguma ko ang Imong sugo labaw sa bulawan bisan unsa katahum. Kay diha sa tanan mong mga kasugoan nagapadayon ako paglakaw; kaaway ko ang tanang dautan nga agianan. (R)

Katingalahan ang imong mga gimbut-an busa ako silang gituman. Ang pagpadayag sa Imong mga pulong nagahatag og kahayag, nagahatag og salabutan sa tawo nga yano. (R)

с. BASAHON II

Roma 8: 28-30

Kinutlo gikan sa sulat ni San Pablo ngadto sa taga Roma.

Nasayud kita nga diha sa tanang butang nagbuhat ang Dios alang sa kaayohan niadtong nahigugma Kaniya ug sa Iyang mga tinawag sumala sa Iyang tuyo. Kadtong gipili nang daan sa Dios, gilain Niya aron mahisama sa Iyang Anak, aron ang Iyang Anak mahimong kamagulangan sa daghang mga magsoon. Ug busa gitawag sa Dios kadtong Iya nang gilain; wala lamang Niya tawga sila kondili gihimo usab Niyang matarung ug gipaambit sa Iyang himaya.

Ang Pulong sa Ginoo.

d. EBANGHELYO

Mt. 13:44-52 o 13:44-46

Ang Santos nga Ebanghelyo sumala ni San Mateo.

(Tinaas)

Si Jesus miingon sa katawhan: "Ang Gingharian sa langit sama sa usa ka bahandi nga gilubong didto sa usa ka uma. Ug nahitabo nga hikalotan kini sa usa ka tawo, apan iyang gilubong pag-usab. Hilabihan niyang lipaya ug tungod niini milakaw siya ug iyang gibaligya ang tanan niyang katigayonan ug unya mibalik siya ug iyang gipalit ang uma."

Ang Gingharian sa langit sama usab sa usa ka negosyante nga nangitag maanindot nga mga mutya. Sa dihang nakakaplag siyag usa ka mutya nga may talagsaong kaanindot, milakaw siya ug gibaligya ang tanan niyang katigayonan, ug unya gipalit ang mutya.'

Ang Gingharian sa langit sama usab sa usa ka baling nga gitaktak didto sa lanaw, nga nakakuha sa tanang matang sa isda. Inigkapuno na niini, bitaron kini sa mga mananagat ngadto sa daplin sa lanaw ug manlingkod sila aron paghagpat sa isda; ang mga maayong isda isulod nila sa ilang mga bukag, ug ang walay pulos ilang isalibay. Mao usab kini ang mahitabo sa katapusan sa kalibutan; moanhi ang mga anghel ug lainon nila ang mga dautang tawo gikan sa mga maayo, ug itambog sila ngadto sa hudno nga nagdilaab. Didto maghilak sila ug magkagot sa ilang ngipon."

"Nakasabot ba kamo niining mga butanga?" nangutana si Jesus kanila. "Oo", mitubag sila. Busa miingon Siya, "Sa ato pa, ang tanang magtutudlo sa Balaod nga nahimong tinun-an sa Gingharian sa langit, sama sa usa ka tagbalay nga nagkuhag bag-o ug karaang mga butang gikan sa iyang tipiganan."

Ang Ebanghelyo sa Ginoo

(Minubo)

Si Jesus miingon sa katawhan: "Ang Gingharian sa langit sama sa usa ka bahandi nga gilubong didto sa usa ka uma. Ug nahitabo nga hikalotan kini sa usa ka tawo, apan iyang gilubong pag-usab. Hilabihan niyang lipaya ug tungod niini milakaw siya ug iyang gibaligya ang tanan niyang katigayonan ug unya mibalik siya ug iyang gipalit ang uma."

Ang Gingharian sa langit sama usab sa usa ka negosyante nga nangitag maanindot nga mga mutya. Sa dihang nakakaplag siyag usa ka mutya nga may talagsaong kaanindot, milakaw siya ug gibaligya ang tanan niyang katigayonan, ug unya gipalit ang mutya.”

Ang Ebanghelyo sa Ginoo.

e. KOMENTARYO

Tema: Paghupot sa Bililhong Bahandi.

"Sa dihang nakakaplag siyag usa ka mutya nga may talagsaon kaanindot, milakaw siya ug gibaligya ang tanan niyang katigayonan, ug unya gipalit ang mutya" (Mt. 13:46).

Karon ania na kita sa ikanapulo'g pito nga Dominggo sa Ordinaryong Panahon. Ang unang pagbasa naghisgot mahitungod sa pagkamapaubsanon ni Salomon gipangayo siya sa Ginoo og bisan unsa nga iyang nga bisan gusto apan ang iya lang gayod nga gipangayo mao ang mapaubsanong kasingkasing aron siya makahibalo kon unsa ang husto ug sayop. Kini nagpahinumdom kanato nga bisan anaa kita sa hataas nga posisyon o nahisakop kita sa hataas nga hut-ong sa katilingban, dili kita makapasigarbo niini tungod kay kini grasya nga atong nadawat gikan sa labaw nga makagagahum. Nga magpabilin unta kanato ang mapaubsanon nga kasingkasing sama ni Salomon.

Ang atong ikaduhang pagbasa naghisgot kon unsa ka maayo ang Dios alang niadtong nahigugma Kaniya. Ug ang mga maayo gipili nang daan sa Dios ug Iyang gilain daan aron mahisama sa Iyang anak.

Diha sa Ebanghelyo naghisgot sa tulo ka sambingay. Ang una ug ang ikaduha nga sambingay nagpadayag kini kung unsa kabililhon ang Gingharian sa Langit nga kon kini makaplagan na ibaligya nila ang tanan nilang mga bahandi aron mahuptan ang maong bahandi. Ang ikatulo nga sambingay naghisgot kini sa unsay nahitabo sa katapusan sa adlaw. Ang mga maayo ilain ug ang dautan ilain ug itambog nila ang mga dautan ngadto sa hudno nga nagdilaab. Didto maghilak sila ug magkagot ang ilang ngipon.

Ang atong Ebanghelyo nagpahinumdom kanatong tanan kon unsa ka mahinungdanon ug kabililhon ang Gingharian sa Langit labaw pa sa tanan natong mga bahandi. Ug mao kini ang atong gitinguha nga mahuptan inig-abot na hustong panahon. Matag usa kanato nangandoy nga mahidangat kita sa Gingharian nga gitagana kanato sa Dios diin makatagamtam kita sa lunlon kalipay ug wala gayoy mga kasakitan ug mga kagul-anan. Apan dili sayon nga kita makahupot sa maong bahandi. Mag-agi pa kita og daghan kaayong mga pagsulay sa kinabuhi. Nagkinahanglan kini sa hugot natong pagtoo ug pagsalig sa Dios aron makalahutay kita sa atong panaw sa kinabuhi.

Sama pananglit sa kasamtangang panahon karon nga kusog kaayo ang haylo sa materyal nga butang sa atong kinabuhi. Kusog kaayo ang pagpakibugno nato sa modernong teknolohiya nga maoy nakapaluya kanato nga mopadayon kita sa atong panaw subay sa dalan nga gipasubay kanato sa Ginoo. Kasagaran mosimang kita og dalan nga masayon sama sa kalingawan, paglulinghayaw, mga bisyo ug uban pang babag sa atong dalan. Ang pagsubay sa dalan sa Ginoo dili sayon. Sigpit ang dalan nga atong pagalaktan. "Daghang tunok ang dalan nga agian mo", matod pa sa usa ka awit.

Nagpahinumdom kini nga unahon nato pagpangita ug pag-angkon ang Gingharian sa Langit kay mao man kini ang atong "passport" nga makasulod sa gingharian. Kay ang mga kalibutanong mga bahandi dili nato madala ngadto sa gingharian nga atong pagasudlan. Mag-unsa man kita kon maangkon nato ang tanang bahandi sa kalibutan apan wala makaila si Kristo kanato? Kawang ang pagpaningkamot kon dili kita mahiusa kang Kristo sa atong kinabuhi. Kon anaa si Kristo sa atong kinabuhi wala na kitay pangitaon pa. Makabaton kita og hingpit nga kalinaw.

Kung kita nagbuhat kanunay sa kabubut-on sa Dios dili kita mahiuban niadtong mga dautan nga itambog sa hudno nga nagdilaab pag-abot sa katapusan sa panahon. Busa magpili na kita kon unsay angayan natong buhaton karon. Pamalandungan nato kini.

Giya alang sa pamalandong:

1. Unsang klase sa bahandi nga akong gihuptan karon?

2. Adunay ba akoy dakung kaisog sa pagpakig-atubang sa Dios ug paghatag sa saktong husay sa akong kaugalingon inig-abot sa hustong panahon?

f. PANGALIYA

Pangulo: Mag-ampo kita sa atong Langitnong Amahan uban sa hingpit nga pagsalig nga Iya kitang dunggon sa atong mga panginahanglan. Busa sa matag pag-ampo kita motubag: GINOO PATALINGHUGI KAMI.

1. Alang sa kinatibuk-a -ang Simbahan nga iya untang mabatunan ang mga bahandi ug hiyas ni Jesukristo diha sa iyang makanunayong pagsangyaw sa Maayong Balita. Mag-ampo kita.

2. Alang sa mga lideres sa atong nasud nga modan-ag unta kanila ang pagkamatinud- anon nga pagpangalagad subay sa Kristohanong diwa ngadto sa tanang katawhan. Mag-ampo kita.

3. Alang sa mga biktima sa mga nagkalainlaing kalamidad, nga magmaisogon ug magmalaumon unta sila sa pagbarog alang sa bag-ong sinugdanan sa ilang pagpakabuhi ug nga dili sila mawad-an sa paglaum nga ang Dios anaa kanunay aron sa pagtubag sa ilang mga panginahanglan. Mag-ampo kita.

4. Alang sa mga masakiton, nga ila untang masinati ang kabaskog ug kahupayan sa ilang kasamtangang gi-antus. Mag-ampo kita. 

5. Alang kanatong tanan nga ato untang mapaambit ngadto sa uban ang mga bahandi nga atong nahuptan aron sa ingon atong mapalambo ang gugma ug kaayo sa Dios. Mag-ampo kita.

6. Alang sa atong personal nga katuyuan atong i-ampo sa hilum.

Pangulo: Ginoo among Dios, hugot ang among pagtoo ug pagsalig nga Imong patalinghugan ang mga pag-ampo nga among gipadangat Kanimo karon pinaagi ni Kristo Imong Bugtong Anak ug among Ginoo uban Espritu Santo Dios nga usa hangtud sa kahangturan. Amen.