IKANAPULO'G DUHA NGA DOMINGO SA ORDINARYONG PANAHON

Ikanapulog-duha nga Domingo Sulod sa Tuig

PASIUNA

Hunyo 25, 2023

Ania na kita sa Ikanapulo'g duha nga Domingo sa Ordinaryong Panahon.

Ang Unang Pagbasa gikuha gikan sa Basahon ni Propeta Isaias. Kini naghisgot nga kanunay niyang makita ngadto sa Ginoo ang tinubdan sa iyang nabag-ong kusog.

Ang Ikaduhang Pagbasa gikuha gikan sa Sulat ni San Pablo ngadto sa taga-Roma. Dinhi atong madungog nga "si Adan naghulagway sa usa ka tawong umaabot. Apan dili managsama silang duha."

Ang Ebanghelyo sumala ni San Mateo naghisgot mahitungod sa pagpahinumdom ni Jesus ngadto sa iyang mga apostoles nga dili mahadlok.

Palihug manindog alang sa pagsugod sa Santos nga Eyukaristiya.

BASAHONI

Jer. 20: 10-13

KINUTLO GIKAN SA BASAHON NI PROPETA JEREMIAS

Nabati ko ang hagawhaw sa katawhan.

Gianggaan ako nilag, "Ang Gikalisangan sa Tanang Dapit!" Miingon sila, "Ato siyang pakaulawan!"

Bisan ang suod kong mga higala nagtinguha nga mapukan ako.

Matod nila, "Basin pag malingla ta siya aron ato siyang madakop ug makapanimalos kita kaniya."

Apan ikaw, GINOO, dapig kanako ug gamhanan kaayo; mangapukan ug mangapakyas gayod sila nga naglutos kanako, ug dili gayod modaog, maulawan sila pag-ayo kay dili man sila molampos. Ug ang ilang kaulawan walay katapusan ug dili gayod hikalimtan. Apan ikaw, Labing Gamhanang GINOO, matarong ang pagsulay mo sa mga tawo, kay nasayod ka man sa ilang kasingkasing ug hunahuna.

Busa pakit-a ako sa imong pagpanimalos sa akong mga kaaway, kay gitugyan ko ang akong mga mulo sa imong mga kamut.

Pag-awit ug dayga ang GINOO! Giluwas niya ang mga dinaugdaog gikan sa mga tawong dautan.

ANG PULONG SA GINOO

SALMO RESPONSORYO

Ps. 69:8-10, 14, 17, 33-35

R. Ginoo, sa imong dakong gugma, tubaga ako.

Tungod kanimo giantus ko ang insulto, ug nalumos ang akong nawong sa kaulaw. 

Nahimo akong sinalikway sa akong mga igsuon, usa ka langyaw alang sa mga anak sa akong inahan, Kay ang gugma ko sa imong templo nagadilaab daw kalayo, ug ang mga insulto kanila nga nangulipas kanimo natingob diri kanako.

R. Ginoo, sa imong dakong gugma, tubaga ako.

Nangamuyo ako kanimo, O Ginoo, nga imo ako nga kaloy-an, O Dios! Sa imong dakong gugma tubaga ako uban sa imong makanunayong panabang.

Tubaga ako, O Ginoo, kay dako man ang imong kaayo; diha sa imong dakong kaluoy lingia ako.

R. Ginoo, sa imong dakong gugma, tubaga ako.

"Tan-awa, kamong mga mapaubsanon, ug pagsadya;

kamo nga nangita sa Ginoo malipay unta ang inyong mga kasingkasing.

Kay ang Ginoo magpatalinghug sa mga kabus, ug ang mga iyaha nga gibilanggo dili niya tamayon.

Magdayeg unta kaniya ang mga langit ug ang yuta, ang kadagatan ug ang nagalihok diha kanila."

R. Ginoo, sa imong dakong gugma, tubaga ako.

BASAHON II

Rom. 5:12-15

KINUTLO GIKAN SA SULAT NI SAN PABLO NGADTO SA TAGA-ROMA

Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Dinhi na sa kalibutan ang sala sa wala pa gani ihatag ang Balaod; apan sanglit wala may balaod, wala isipa ang mga sala. Apan sukad sa panahon ni Adan hangtod sa panahon ni Moises ang tanang tawo gigamhan sa kamatayon, lakip kadtong wala makasala sama sa pagpakasala ni Adan sa iyang paglapas sa sugo sa Dios.

Naghulagway si Adan sa usa ka tawong umaabot. Apan dili managsama silang duha; kay dili sama sa sala ni Adan ang gasa sa Dios. Kay kon daghan ang nangamatay tungod sa pagpakasala sa usa ka tawo, labi pang dako ang grasya ug ang gasa sa Dios nga mabatonan sa daghang tawo pinaagi sa usa ka tawo nga mao si Jesucristo.

ANG PULONG SA GINOO.

EBANGHELYO

Mt. 10:26-33

Kinutlo gikan sa Balaan nga Ebanghelyo sumala ni Mateo

Miingon si Jesus sa Napulog-duha:

“Busa ayaw kamo kahadlok kanila, kay walay tinakpan dili mabuksan ug walay tinagoan nga dili mahibaloan. Unsa ang gisulti ko kaninyo diha sa kangitngit, isulti ninyo diha sa kahayag, ug unsa ang nadungog ninyo sa tago, ipahibalo gikan sa mga atop.

"Ug ayaw kamo kahadlok sa mga nagapatay sa lawas, apan dili makahimo pagpatay sa kalag; hinunoa, kahadloki ninyo siya nga makahimo paglaglag sa kalag ug lawas didto sa Gehenna.

Dili ba gibaligya ang duha ka langgam sa pipila ka sensilyo?

Gani bisan usà kanila dili mahulog diha sa yuta nga walay pagtugot sa inyong Amahan.

Bisan gani ang inyong mga buhok sa ulo inihap man ang tanan. Busa ayaw kamo kahadlok; labaw pa kamo ka bililhon sa daghang langgam.

"Busa, si kinsa nga moila kanako atubangan sa mga tawo, ilhon ko usab atubangan sa akong Amahan nga atoa sa langit; apan siya nga mosalikway kanako atubangan sa mga tawo, isalikway ko usab siya atubangan sa akong Amahan nga atoa sa langit."

Ang Ebanghelyo sa Ginoo.

KATILINGBANONG PAG-AMPO Hunyo 25, 2023

Pari: Mga igsuon, mag-ampo kita sa atong Langitnong Amahan nga iyang dunggon ang aotng mga pag-ampo ug panginahanglan. Sa matag pangamuyo kita motubag:

GINOO, DUNGGA KAMI.

1. Ginoo, naga-ampo kami alang sa mga namunoan sa Simbahan ilabina si Santo Papa Francisco, mga Obispo, Kapariam, Relihiyoso ug mga Diyahono, sa kanunay panalipdan mo sila sa mga tentasyon ug mga pagsulay diha sa ilang pagpangalagad ug hatagan mo sila og dugang kaalam ug kaisog sa pagsangyaw sa Maayong Balita nga walay kahadlok. Mag- ampo kita.

2. Ginoo, naga-ampo kami alang sa mga lideres sa kanasuran, dasiga sila sa ilang pagserbisyo ug pagpangalagad sa tanang katawhan nga walay gipihig. Mag-ampo kita.

3. Ginoo, naga-ampo kami alang sa Gagmay'ng Kristohanong Katilingban, makaangkon unta sila og kalig-on sa hunahuna og lawas, ug mapaubsanong kasingkasing sa pag-alagad sa ilang katawhan nga gipiyal kanila sa ilang katilingban. Mag-ampo kita.

4. Ginoo, naga-ampo kami alang sa mga mipadayag sa ilang pagdayeg ug pasalamat nganha Kanimo, ilabina nila hatagi sila og kasingkasing nga kanunay nga mapaubsanon ug maalagaron. Mag-ampo kita.

5. Ginoo, naga-ampo kami alang sa mga nangamatay ilabina sila makasulod ug makaambit na unta sila sa pahulay nga dayon. Mag-ampo kita.

Pari: Among Dios nga Amahan, tuburan sa kaluoy ug gugma, imong nadungog ang among pag-ampo. Tabangi kami nga makabaton kanunay sa makaligon, matuohon ug mahigugmaon nga kasingkasing sama kanimo, pinaagi ni Cristo among Ginoo. Amen.