Solemnidad sa pagsaka sa langit sa Ginoo

SOLEMNIDAD SA PAGSAKA SA LANGIT SA GINOO 

a. BASAHON I

Buhat 1: 1-11

Kinutlo gikan sa basahon sa Buhat sa mga Apostoles.

Sa una kong sulat gihisgutan ko ang tanang mga butang nga gibuhat ug gitudlo ni Jesus, hangtud sa adlaw nga Siya gibayaw ngadto sa langit. Sa wala pa Siya bayawa gipahimangnoan Niya pinaagi sa Espiritu Santo ang mga tawo nga Iyang napili nga mga apostoles. Sulod sa kap-atan ka adlaw human Siya mamatay nagpakita Siya kanila sa makadaghan, sa mga paagi nga nagmatuod nga Siya buhi gayud. Siya nakita nila ug nakigsulti kanila mahitungod sa Gingharian sa Dios. Ug samtang si Jesus uban pa kanila Siya Iyang gitugon nga nag-ingon: "Ayaw kamo pagbiya sa Jerusalem, kondili hulata ninyo ang gasa nga gisaad sa Akong Amahan, sumala sa Akong gisulti kaninyo. Kay si Juan nagbunyag pinaagi sa tubig, apan pipila na lamang ka adlaw gikan karon bunyagan kamo pinaagi sa Espiritu Santo."

Sa nagtigom na ang mga apostoles uban kang Jesus, nangutana sila Kaniya, "Ginoo, Imo bang tukoron pag-usab niining panahona ang Gingharian sa Israel?" Si Jesus mitubag kanila: "Ang mga panahon ug mga adlaw gilatid nang daan sa pagbuot sa Akong Amahan; dili kamo angay nga magpakisayod kon kanus-a kini mahitabo. Apan kon ang Espiritu Santo mokunsad na kaninyo, kamo makadawat og gahum ug mahimo kamo nga Akong mga sa Jerusalem, sa tibuok Judea ug Samaria ug sa tibuok kalibutan." Human kini Niya isulti, Siya gibayaw ngadto sa langit samtang nagtan-aw sila Kaniya ug usa ka panganod mitabon Kaniya ug wala na Siya nila makita.

Samtang nagtutok sila sa langit sa pagkayab ni Jesus, may duha ka tawo nga nagbistig puti mitungha pagkalit ug mitindog tupad kanila. Sila miingon, "Mga taga Galilea, nganong nagbarog man kamo dinhi ug nagsigig hangad sa langit? Si Jesus nga gibayaw ngadto sa langit mobalik sa samang paagi nga inyong nakita sa Iyang pagkayab ngadto sa langit."

Ang Pulong sa Ginoo.

SALMO RESPONSORYO

Salmo 47:2-3,6-7,8-9

Tubag (R)

Misaka ang Dios sa Iyang trono uban sa mga singgit sa kalipay, usa ka tingog sa mga trompeta alang sa Ginoo.

Kamong tanan mga tawo, pamakpak kamo, singgit kamo ngadto sa Dios sa mga singgit sa kalipay. Kay ang Ginoo, ang labing halangdon, ang katahaan, dakung hari sa tibuok nga kalibutan. (R)

Kay hari sa tibuok yuta ang Dios; awiti Siyag mga imno sa pagdayeg. Maghari ang Dios diha sa kanasuran, magalingkod ang Dios diha sa Iyang balaang trono. (R)

c. BASAHON II

Efeso 1: 17-23

Kinutlo gikan sa sulat ni San Pablo ngadto sa taga Efeso.

Naghangyo ako sa Dios sa atong Ginoong Jesukristo, ang mahimayaong Amahan, nga hatagan unta kamo sa Espiritu nga maghimo kaninyo nga maalamon ug magpadayag sa Dios kaninyo aron makaila kamo Kaniya. Naghangyo usab ako nga malamdagan unta ang inyong mga salabutan aron masayud kamo unsa ang paglaum nga alang niini gitawag kamo. Ug hinaut usab unta nga masayud kamo sa kahupong sa katingalahang mga panalangin nga Iyang gisaad sa Iyang katawhan. Dugang pa niini, gipanghinaut ko nga masayran ninyo ang kadaku sa Iyang gahum nga nagapalihok kanato nga nagtoo. Kining gahuma nga ania kanato mao ang gigamit Niya pagbanhaw kang Kristo ug pagpalingkod Kaniya sa Iyang tuo didto sa langit. Didto naghari si Kristo labaw sa tanang mga hari ug sa mga anaa sa gahum ug sa mga punoan ingon man sa mga kaginoohan; labaw Siya sa tanan bisan unsa pa ang ilang katungdanan niining kalibutana ug sa sunod. Gibutang sa Dios ang tanan ubos sa pagmando ni Kristo ug alang sa Iglesia gihimo Siyang pangulo nga labaw sa tanan. Ang Iglesia mao ang lawas ni Kristo, ang kahingpitan Niya nga mao ang naghingpit sa tanang butang.

Ang Pulong sa Ginoo.

d. EBANGHELYO

Mt. 28: 16-20

Ang katapusan sa Ebanghelyo sumala ni San Mateo.

Ang napulog usa ka tinun-an miadto sa Galilea, didto sa bungtod nga paadtoan kanila ni Jesus. Ug sa ilang pagkakita Kaniya, ilang gisimba Siya, bisan tuod may pipila kanila nga nagduhaduha. Miduol si Jesus ug miingon kanila: "Gihatag Kanako ang tanang gahum sa langit ug sa yuta. Busa panlakaw kamo ngadto sa tanang katawhan sa tibuok kalibutan ug himoa sila nga Akong mga tinun- an, ug bunyagi sila sa ngalan sa Amahan ug sa Anak ug sa Espiritu Santo, ug tudloi sila pagtuman sa tanan nga Akong gisugo kaninyo. Ug hinumdomi! Ako magauban kaninyo sa kanunay hangtud sa katapusan sa kalibutan."

Ang Ebanghelyo sa Ginoo.

e. KOMENTARYO

Tema: "Ako Magauban Kaninyo sa Kanunay".

Malipayong pagsaulog sa Solemnidad sa Pagsaka sa Langit sa atong Ginoo.

Mga igsoon, karong adlawa napuno sa duha ka nagkadaiyang pagbati ang mga apostoles ug mga katawhan nga nakauban ni Jesus. Kasubo ug kalipay. Kasubo tungod kay si Jesus human sa iyang pagpakig-uban kanila ilabina sa mga apostoles, siya mobiya na kay mosaka na siya sa langit ug makig-uban sa Amahan. Dili na siya makita ug makauban nila. Apan sa laing bahin kalipay tungod kay bisan mibiya si Jesus apan siya nagpasalig kanila sa iyang pag-ingon: "Ako magauban kaninyo sa kanunay hangtod sa katapusan sa kalibutan."

Ang unang pagbasa gikan sa Buhat sa mga Apostoles nagsaysay nga sa Pagsaka ni Jesus sa Langit iyang gisalig ang iyang buluhaton sa apostoles ug nga ang Espiritu Santo maoy maghatag kanila og kalig-on sa pagsaksi ni Kristo ang atong nabanhaw nga Ginoo ngadto sa tibuok kalibutan. Diha sa ikaduhang pagbasa, si San Pablo nagsulat nga si Kristo karon mao ang mahimayaong Ginoo kinsa nagpuyo sa Simbahan. Maanaa unta kanato ang iyang Espiritu aron sa kanunay atong masinati ang Ginoo diha sa atong kinabuhi ug nga kita, ang Simbahan magpuyo diha sa kinabuhi ni Kristo. Labaw sa tanan, ang Ebanghelyo nagsaysay nga bisan si Kristo mawala na sa atong panan-aw, siya nagbilin kanato og usa ka tahas nga mao ang pagdala sa mensahe sa Maayong Balita sa Kay siya magauban kanato sa atong misyon.

Mga igsoon, ang Pagsaka sa Langit sa atong Ginoo, alang kanato maoy usa ka kapistahan sa kalipay kay gisaulog nato ang kahimayaan ni nga atong Ginoo. Gikinahanglan gayud nga mobiya siya niining kalibutana aron dili lamang siya makauban sa gamay lamang nga pundok sa mga apostoles ug mga disipulos. Kay kon siya anaa na sa kahimayaan sa langit, siya mahisakop ug na sa tanan si kinsa kadtong andam sa pagdawat kaniya isip atong Ginoo. Sukad karon kita iyang ang hulagway sa iyang nawong, ang pinitik sa iyang kasingkasing, ang iyang matinabangong mga kamot, iyang kusog ug kalig-on. Dili kita angayan nga mabalaka ug mahadlok diha sa pagtuman nato sa gimbuhaton ug misyon nga iyang gisangon kanato tungod kay siya nagpasalig nga iya kitang pagaubanan sa kanunay hangtod sa katapusan sa kalibutan. Siya anaa kanunay ug nakig-uban kanato diha sa Santos nga Yukaristiya. Kay sa matag saulog nato sa Santos nga Misa ug pagdawat sa iyang lawas kita nahiusa kaniya ug siya anaa kanato kanunay. Busa unsa pa man ang angay natong kahadlokan ug kabalak-an. Ang pasalig ni Kristo maoy makahatag kanato og kalig-on sa pagpadayon sa iyang gimbuhaton nga mao ang pagsaksi sa iyang mga binuhatan. Ug walay laing paagi nga ato siyang makauban kanunay kon dili diha sa makanunayon natong pagdawat sa iyang lawas ug dugo diha sa Santos nga Yukaristiya. Mao kini ang dakung hagit alang kanato sa paggahin og panahon sa pagpakighimamat kaniya kanunay diha sa Yukaristiya. Hinaut pa unta.

Giya alang sa pamalandong:

1. Isip binunyagan ako bang natuman ang misyon nga gisangon ni Kristo kanako? 

2. Unsa man ang nakahatag kanako og kalig- on sa pagpadayon sa gimbuhaton ni Kristo?

f. PANGALIYA

Pangulo: Gitawag kita sa Dios sa pagsangyaw sa Maa- yong Balita sa kaluwasan apan wala gayud siya mobiya kanato hinoon ania Siya sa atong taliwala uban sa Espiritu Santo. Busa, atong ipadangat Kaniya ang atong mga pangi- nahanglan. Mga igsoon moingon kita: GINOO, HIMOA KAMING IMONG MGA SAKSI.

1. Alang sa atong Santo. Papa, obispo, kaparian, mga layko nga unta sa kanunay maningkamot nga mamahimong epiktibo sa ilang pagsaksi sa pagtulon-ang Kristohanon diha sa pagsangyaw sa pulong sa Dios sa tibuok kalibutan. Mag-ampo kita.

2. Alang sa tanang pangulo sa atong panggamhanan nga sa kanunay ilang masinati nga usa sila sa mga instrumento sa Dios nga mosaksi sa matuod nga kalinaw ug gugma pinaagi sa ilang kinasingkasing nga pag-alagad sa mga lumulopyo sa atong nasod. Mag- ampo Kita.

3. Alang sa mga binilanggo, mga nag-antus sa kalisod, mga masakiton ug kabus nga tabangan sila sa Dios nga pinaagi sa ilang pagtoo mamahimo silang matuod nga saksi sa hiyas sa pagkamapaubsanon ni Kristo. Mag-ampo kita.

4. Alang sa mga nag-alagad sa atong katilingban malung- taron unta silang mopadayag og maayong panig-ingnan diha sa ilang pagserbisyo nga tinuoray uban sa pana- bang sa Dios. Mag-ampo kita.

5. Alang sa ... (idugang ang panginahanglan sa katilingban). Mag-ampo kita.

6. Alang sa atong katuyoan i-ampo nato sa hilom. Mag-ampo kita.

Pangulo: Amahan masaligon sa Imong Diosnong pag- amoma, tabangi kami nga mamahimong matuod nga mga saksi sa Imong Gingharian ug patalinghugi ang among mga pag-ampo. Kini among gipangayo pinaagi ni Kristo among Ginoo. Amen.