IKATULONG DOMINGGO SA PAGKABANHAW

Ikatulong Domingo sa Pagkabanhaw

Pasiuna 

April 23, 2023

Maayong buntag/hapon mga igsuon ko diha ni Cristo

Ania na kita sa ikatulong Domingo sa Pasko sa Pagkabanhaw sa atong Ginoo.

Ang unang pagbasa gikuha gikan sa Buhat sa mga Apostoles Dinhi atong madungog si San Pedro nga nagsangyaw sa propesiya nga si Jesus mao Mesiyas, ang gisaad sa Dios.

Ang ikaduhang pagbasa gikuha gikan sa Unang Sulat ni San Pedro Siya mipahinumdum sa mga katawhan sa dakong bili nga gibayad ni Jesuscristo alang sa ilang kaluwasan.

Ang ebanghelyo gikuha gikan sa Santos nga Ebanghelyo sumala ni San Lukas. Kini nagsaysay mahitungod sa panaw sa duha ka mga disipulo ni Jesus ngadto sa usa ka balangay nga gitawag og Emmaus.

Palihug manindog alang sa pagsugod sa Santos nga Eyukaristiya

BASAHON I

Acts 2:14, 22-28

KINUTLO GIKAN SA MGA BUHAT SA MGA APOSTOLES

Unya mitindog si Pedro uban sa napulog-usa ka apostoles ug sa makusog nga tingog miingon kanila, "Mga igsuon kong Judio, ug kamong tanan nga nagpuyo sa Jerusalem, pamati-a ninyo ang akong isulti karon."

"Mga taga-Israel, pamati kamo! Si Jesus nga Nazaretnon, usa ka tawo kansang diosnong buluhaton sa matin-aw gipadayag kaninyo pinaagi sa mga milagro ug sa mga katingalahang butang, ug mga ilhanan nga gibuhat sa Dios pinaagi kaniya. Kamo mismo nasayod niini, kay dinhi man kini mahitabo. Ang Dios, sumala sa kaugalingon niyang laraw ug pagbuot, mitugyan kang Jesus nganha kaninyo; ug gipapatay ninyo siya sa mga makasasala pinaagi sa paglansang kaniya sa krus. Apan gibanhaw siya sa Dios ug giluwas gikan sa gahom sa kamatayon, kay dili mahimo nga bilanggoon siya sa kamatayon. Kay si David miingon mahitungod kaniya:

'Nakita ko kanunay ang Ginoo sa atubangan ko, Kay ania man siya sa akong tuo aron dili ako matarog.

Tungod niini masaya ang akong kasingkasing ug ang akong mga pulong puno sa kalipay;

Ug ako, bisan tuod mamatay, magmalaumon, Kay dili mo biyaan ang akong kalag didto sa kalibutan sa mga patay, dili mo itugot nga madugta ang buotan mong sulugoon. Imong gipakita kanako ang mga agianan paingon sa kinabuhi, Ug pinaagi sa imong pagpakig-uban kanako ako mapuno sa kalipay.""

ANG PULONG SA GINOO.

SALMO RESPONSORYO

Ps. 16:1-2, 5, 7-8, 9-10, 11

R. Ginoo, tudloan mo kami sa dalan sa kinabuhi.

Bantayi ako, O Dios, kay nagadangop ako kanimo; nagaingon ako sa Ginoo, "Ikaw ang akong Ginoo." O Ginoo, Ikaw ang akong bahin ug ang akong kopa, Ikaw mao ang nagalig-on sa akong suwerte.

R. Ginoo, tudloan mo kami sa dalan sa kinabuhi.

Daygon ko ang Ginoo nga nagatambag kanako; bisan sa kagabhion nagapahimangno kanako ang akong kasingkasing.

Gibutang ko kanunay ang Ginoo sa akong atubangan; kon anaa siya sa akong tuong kamut wala akoy kabalak-an.

R. Ginoo, tudloan mo kami sa dalan sa kinabuhi.

Busa ang akong kasingkasing nalipay ug ang akong kalag nagsadya, ang ako usab nga lawas nagapabilin diha sa pagsalig; Kay dili nimo biyaan ang akong kalag didto sa kahiladman, ni itugot mo nga ang imong buotang alagad modangat sa pagkadunot.

R. Ginoo, tudloan mo kami sa dalan sa kinabuhi.

Tudloan mo ako sa dalan sa kinabuhi, ang bug-os nga kalipay diha sa imong atubangan, ang mga kalipayan diha sa imong tuong kamut

hangtod sa kahangturan.

R. Ginoo, tudloan mo kami sa dalan sa kinabuhi.

BASAHON II

1 Pt. 1:17-21

KINUTLO GIKAN SA UNANG SULAT NI SAN PEDRO

Kon gitawag ninyo nga Amahan ang Dios nga maghukom sa tanang mga tawo sa walay pagpinig sumala sa ilang binuhatan, tahora ninyo siya sa tibuok ninyong kinabuhi. Kay nasayran ninyo nga ang gibayad aron pagluwas kaninyo gikan sa dautang pagkinabuhi nga inyong nasunod sa inyong mga katigulangan, dili butang nga kawad-an og bili sama sa salapi o bulawan, kay giluwas man kamo sa bililhong dugo ni Cristo kinsa, sama sa nating karnero, walay buling o mansa. Gipili siya sa Dios sa wala pa buhata ang kalibutan, ug gipadayag siya niining katapusang mga adlaw tungod kaninyo. Pinaagi kaniya nagtuo kamo sa Dios nga maoy nagbanhaw ug nagpasidungog kaniya aron ang inyong pagtuo ug paglaum adto ninyo ibutang sa Dios. ANG PULONG SA GINOO.

EBANGHELYO

Lc. 24:13-35

Kinutlo gikan sa Balaan nga Ebanghelyo sumala ni Lucas

Ug tan-awa duha kanila niana mismong adlawa nagpadulong sa usa ka balangay nga ginganlan og Emaus nga napulog-usà ka kilometro gikan sa Jerusalem, ug sila nagsultihanay mahitungod niining tanang mga panghitabo.

Ug nahitabo nga sa ilang pagsultihanay, si Jesus mismo midúol ug mikuyog kanila, apan gipugngan ang ilang mga mata sa pag-ila kaniya.

Ug miingon siya ngadto kanila, "Unsa man kining mga butanga nga inyong gipanaghisgotan samtang kamo nagalakaw?"

Ug mihunong sila nga nahugno ang mga panagway. Ug mitubag ang usà, nga ginganlan og Cleopas ug miingon ngadto kaniya, "Ikaw ra ba ang bugtong dumuduong sa Jerusalem nga walâ mahibalo sa mga nahitabo didto niining mga adlawa?"

Ug miingon siya kanila,

"Unsang mga butanga?"

Ug sila miingon ngadto kaniya, "Ang mahitungod kang Jesus nga taga Nazaret, nga usa ka propeta gamhanan diha sa buhat ug pulong atubangan sa Dios ug sa tanang katawhan, ug kon giunsa siya pagtugyan sa among mga pangulong pari ug kadagkoan aron silotan sa kamatayon ug gilansang nila sa krus.

Apan kami naglaom nga siya mao ang umaabot nga motubos sa Israel.

Labot pa niining tanan, ikatulong adlaw na karon sukad kini nahitabo. Apan dugang pa niini, nahibulong kami sa mga babaye nga among mga kauban.

Sayo kaayo sa kaadlawon miadto sila sa lubnganan ug sa dihang walâ hikaplagi ang iyang lawas, mibalik nga nanugilon gani nga nakakita sila og panan-awon sa mga anghel, nga nagaingon nga siya buhi.

Ug adunay pipila sa among mga kauban nga nangadto sa lubnganan ug nakaplagan nila kini sama gayod sa gisulti sa mga babaye, apan siya wala nila makit-i."

Ug siya miingon ngadto kanila,

"O pagkakulang sa inyong pagsabot ug pagkahinay ninyo motuo sa tanan nga gisulti sa mga propeta! Dili ba kinahanglan nga ang Cristo mag-antos niining mga butanga ug mosulod sa iyang himaya?"

Unya nagsugod kang Moises ug sa tanan nga mga propeta, gipasabot niya kanila ang tanan nga mga butang mahitungod kaniya diha sa tibuok nga Kasulatan.

Ug miabot na sila duòl sa balangay nga ilang gipadolngan, ug siya mora og nagpakita nga mopadayon paglakaw. Ug gihawiran nila siya sa pag-ingon, "Pabilin uban kanamo, kay padulong na sa kagabhion ug misalop na ang adlaw." Ug midayon siya aron pagpabilin ubàn kanila.

Ug nahitabo nga, sa dihang naglingkod siya sa talad kan-anan ubàn kanila, mikuha siya og pan, unya gibendisyonan, gipikaspikas, ug gihatag niya kanila.

Ug nabuka ang ilang mga mata ug nakaila sila kaniya ug nahanaw siya sa ilang atubangan.

Ug nag-ingnanay sila,

"Dili ba ang atong kasingkasing nagdilaab [dinhi kanato] samtang nagsulti siya kanato didto sa dalan diha nga giablihan niya kanato ang mga Kasulatan?"

Ug nanindog sila niadto mismong yugtoa, unya namalik ngadto sa Jerusalem, ug nakaplagan nila ang Napulog-usa nga nagkapundok ug kadtong uban kanila, nga nagaingon,

"Nabanhaw gayod ang Ginoo ug nagpakita kang Simon!" Ug sila misugilon sa mga nahitabo didto sa dalan ug giunsa nila siya pag-ilà diha sa pagpikaspikas sa pan.

Ang Ebanghelyo sa Ginoo.

Katilingbanong Pag-ampo:

April 23, 2023

Pari: Mga igsuon, ang Dios nakighiusa kanato sa matag adlaw sa atong kinabuhi. Inubanan sa atong matuohong kasingkasing, ipadangat nato karon kaniya ang atong mga panginahanglan sa pag-ingon:

GINOO, PAMINAWA ANG AMONG PAG-AMPO.

1. Alang sa atong Santo Papa Francisco, mga Obispo ug kaparian, nga ang Nabanhawng Jesus maghatag kanila og kasingkasing nga moila ug mopuyo sa kinabuhi ni Cristo diha sa ilang panaghiusa ug matinud-anong pag-alagad sa tanan. Mag-ampo kita.

2. Alang sa mga lideres sa gobiyerno, nga ang Nabanhawng Jesus ilang masinati diha sa mga panginahanglan sa katawhan nga ilang gialagaran. Mag-ampo kita.

3. Alang sa mga nag-antus sa mga nagkadaiyang kalisdanan sa kinabuhi, masakiton, himalatyon ug mga giabandona sa pamilya ug katilingban, makabaton unta sila og kahupayan pinaagi sa mga tawo nga gipadala sa Dios sa pagtabang kanila. Mag-ampo kita.

4. Alang sa mga pangulo sa tagsa-tagsa ka katilingban, matagamtaman unta nila ang Nabanawng Jesus diha sa ilang mga kaubanan. Mag-ampo kita.

5. Alang sa mga nagadayeg ug nagapasalamat sa Dios ilabina sila makadawat unta sila sa grasya nga ilang gikinahanglan ug mamahimong instrumento sa Dios ngadto sa mga nanginahanglan. Mag-ampo kita.

6. Alang sa mga magtutuong nangamatay ilabina nila, makasinati na unta sa makaluwasnong gahum sa Ginoo. Mag-ampo kita.

Pari: Dios nga Labing Gamhanan, gipadala mo ang imong Anak alang sa among kahiusahan ug kaluwasan. Malaumon kami nga dili nimo pakyason ang among gipangayo pinaagi ni Cristo nga amog Ginoo. Amen.