IKADUHANG DOMINGO SA PAGKABANHAW

Ikaduhang Domingo sa Pagkabanhaw

PASIUNA

April 16, 2023

Maayong buntag/hapon mga igsuon ko diha ni Cristo.

Karong adlawa mao ang ikaduhang Domingo sa Pasko sa Pagkabanhaw sa atong Ginoo. Karong Domingoha usab mao ang Domingo sa Diosnong Kaluoy.

Ang unang pagbasa gikuha gikan sa Buhat sa mga Apostoles. Dinhi atong madungog nga gihulagway ni San Lukas ang unang Kristiyanong Katoliko ingon nga matinud-anon sa pagtulun-an nga gipaambit sa mga Apostoles.

Ang ikaduhang pagbasa gikuha gikan sa Unang Sulat ni San Pedro. Dinhi atong madungog ang pahinumdum ni San Pedro nga "Magpasalamat kita sa Dios ug Amahan sa atong Ginoong Jesucristo kay tungod sa iyang dakong kaluoy gihatagan kita niya og bag-ong kinabuhi pinaagi sa pagkabanhaw ni Jesucristo."

Ang ebanghelyo gikuha gikan sa Santos nga Ebanghelyo sumala ni Juan. Dinhi atong madungog nga mipakita si Jesus sa iyang mga tinun-an ug miingon, "Ang kalinaw maanaa kaninyo. Ingon nga ang Amahan nagpadala kanako, ako usab nagpadala kaninyo."

Palihug manindog alang sa pagsugod sa Santos nga Eyukaristiya.

BASAHON I

Acts 2:42-47

KINUTLO GIKAN SA MGA BUHAT SA MGA APOSTOLES

Ug gigamit nila ang ilang panahon pagpamati sa mga gitudlo sa mga apostoles, sa inigsuon nga pagpakig- uban kanila, ug sa pagpakig-ambitay sa pagpangaon ug sa mga pag-ampo.

Daghang mga milagro ug mga buhat nga katingalahan nahimo pinaagi sa mga apostoles ug tungod niini ang tanan giabot og katingala ug kahadlok. Ang tanang mga magtutuo nagpadayon sa inigsuon nga panag-uban ug ang kab- tangan sa matag usa kanila gipanag-iya nilang tanan. Ug gipamaligya nila ang ilang mga katigayonan ug ang halin ilang giapud-apod ngadto sa tanan sumala sa gikinahanglan sa usag-usa. Nagpadayon sila pagtigom kada adlaw didto sa templo, ug naghiusa sila pagpangaon uban sa masadya ug mapa- ubsanong kasingkasing didto sa ilang mga puloy-anan. Gidayeg nila ang Dios ug gikahimut-an sila sa katawhan. Ug sa matag adlaw gidugangan sa Ginoo ang ilang pundok og mga tawo nga nangaluwas.

ANG PULONG SA GINOO.

SALMO RESPONSORYO

Ps. 118:2-4, 13-15, 22-24

R. Pasalamati ang Ginoo kay siya maayo, ang iyang gugma walay katapusan.

Pasultiha ang balay ni Israel, "Ang iyang kaluoy nagalungtad sa kahangturan." Pasultiha ang balay ni Aaron, "Ang iyang kaluoy nagalungtad sa kahangturan.

Pasultiha sila nga mahadlokon sa Ginoo, "Ang iyang kaluoy nagalungtad sa kahangturan."

R. Pasalamati ang Ginoo kay siya maayo, ang iyang gugma walay katapusan.

Nagkalisod-lisod ako ug nasukamod, apan gitabangan ako sa Ginoo. Ang akong kusog ug akong kaisog mao ang Ginoo, ug siya kanhi ang akong manluluwas. Ang malipayong singgit sa kadaugan diha sa mga tolda sa matarong.

R. Pasalamati ang Ginoo kay siya maayo, ang iyang gugma walay katapusan.

Ang bato nga gisalikway sa mga magtutukod nahimong bato sa kanto. Sa Ginoo gihimo kini; kahibulongan kini atubangan sa atong mga mata.

Mao kini ang adlaw nga gihimo sa Ginoo; maglipay kita ug magsadya dinhi niini.

R. Pasalamati ang Ginoo kay siya maayo, ang iyang gugma walay katapusan.

BASAHON II

1 Pt. 1:3-9

KINUTLO GIKAN SA UNANG SULAT NI SAN PEDRO

Magpasalamat kita sa Dios ug Amahan sa atong Ginoong Jesucristo kay tungod sa iyang dakong kaluoy gihatagan kita niya og bag-ong kinabuhi pinaagi sa pagbanhaw kang Jesucristo. Ang iyang pagkabanhaw maoy naghatag kanatog dili matarog nga paglaum, ug sa pa- nulondon nga dili madunot ni mahugaw ni mahanaw. Gitagana niya kini didto sa langit alang kaninyo. Pinaagi sa pagtuo gipanalipdan kamo sa gahom sa Dios alang sa kaluwasan nga andam nang ipadayag sa katapusan sa panahon.

Tungod niini paglipay kamo bisan tuod sa pagkakaron kinahanglan mag- subo kamo sa mubong panahon tungod sa daghan ninyong mga alantuson. Ang tuyo niini mao ang pagsulay kon tinuod ba gayod ang inyong pagtuo, kay bisan gani ang bulawan nga lumalabay lamang sulayan man pinaagi sa kalayo. Ang inyo usab nga pagtuo nga bililhon pa kay sa bulawan, labi pang sulayan aron malig- on. Unya makadawat kamo og mga pagdayeg, himaya, ug dungog sa Adlaw nga ipadayag na si Jesucristo. Gihigugma ninyo siya bisan wala kamo makakita kaniya, ug nagtuo kamo kaniya bisag wala kamo makakita kaniya hangtod karon. Busa nalipay kamo pag-ayo sa kalipay nga dili malitok sa pulong, tungod kay nakadawat man kamo sa bunga sa inyong pagtuo nga mao ang inyong kaluwasan.

ANG PULONG SA GINOO.

ANG EBANGHELYO

Jn. 20:19-31

Kinutlo gikan sa Balaan nga Ebanghelyo sumala ni Juan

Pagkagabii nianang adlawa, ang unang adlaw sa semana, samtang gitrangkahan ang mga pultahan diin nahimutang ang mga tinun-an tungod sa kahadlok sa mga Judio, miabòt si Jesus ug mibarog sa taliwala ug miingon kanila, "Ang kalinaw maanaa kaninyo." Sa pagkasulti niya niini, gipakita niya ang iyang mga kamot ug kilid ngadto kanila.

Busa nagmaya ang mga tinun-an sa pagkakita sa Ginoo.

Miingon si [Jesus] kanila pag-usab, "Ang kalinaw maanaa kaninyo.

Ingon nga ang Amahan nagpadala kanako, akò usab nagpadala kaninyo."

Ug human siya makasulti niini, mihuyop siya ug miingon kanila, "Dawata ninyo ang Espiritu Santo.

Kang bisan kinsang mga salâ nga inyong pasayloon, kini gipasaylo; kang bisan kinsang mga salâ nga dili ninyo pasayloon, kini dili pasayloon."

Apan si Tomas, usà sa Napulog-duha, nga ginganlan og 'Kaluha, wala mahiuban kanila sa dihang miabòt si Jesus.

Busa miingon kaniya ang ubang mga tinun-an, "Nakita namo ang Ginoo." Apan miingon siya kanila, "Gawas kon makita ko ang inagian sa mga lansang sa iyang mga kamot ug masulod ang akong tudlo sa inagian sa lansang ug masulod ang akong kamot sa iyang kilid, dili gayod akò motúo."

Human sa walo ka adlaw, nagkatigom na usab sa sulod sa balay ang iyang mga tinun-an, ug si Tomas uban kanila. Misulod si Jesus lapos sa mga pultahan nga gitrangkahan, ug mibarog sa taliwala ug miingon, "Ang kalinaw maanaa kaninyo."

Unya miingon siya kang Tomas,

"Ibutang ang imong tudlo dinhi, ug tan-awa ang akong mga kamot, ug ibutang ang imong kamot sa akong kilid, ug ayaw na pagduhaduha kondili túo."

Mitubag si Tomas ug miingon kaniya, "Ginoo ko ug Dios ko!"

Miingon si Jesus kaniya, "Mitúo ka ba tungod kay nakakita ka kanako? Bulahan ang mga walâ makakita apan mitúo."

Daghan pang ubang timaan nga gibuhat ni Jesus atubangan sa mga tinun-an nga walâ mahisulat niining libroha. Apan kining mga butanga nahisulat aron [mopadayon kamo] sa pagtuo nga si Jesus mao ang Mesiyas, ang anak sa Dios, ug sa inyong pagtuo makabaton kamog kinabuhi sa iyang ngalan.

Ang Ebanghelyo sa Ginoo.

PANGALIYA SA KATILINGBAN

April 16, 2023

Pari: Modangop kita ngadto sa Dios Amahan kansang gugma ug kaluoy molungtad hangtod sa kahangturan. Sa matag pag-ampo kita motubag:

DIOS NGA MALULUY-ON, DUNGGA KAMI.

1. Alang sa atong Santo Papa Francisco, mga kaobispohan ug kaparian sa Simbahan atol niining tuig sa Sinodo, masinati unta nila ang Diosnong Kaluoy sa ilang mapadayunong pagsangyaw sa Maayong Balita ngadto sa katawhan. Mag-ampo kita.

2. Alang sa tanang kanasuran sa tibuok kalibutan ug ang mga lideres niini, masinati unta nila si Cristo nga namatay ug nabanhaw alang sa kaluwasan sa tanang katawhan. Mag-ampo kita.

3. Alang sa tanang binunyagan sa ngalan sa Santisima Trinidad nga mamahimo unta kitang maluluy-on sa panginahanglan sa uban ug maghimo sa mga buhat sa kaluoy. Mag-ampo kita.

4. Alang sa tanang mga masakiton, tigulang ug himalatyon, nga matagamtaman na nila ang kahupayan nga nagsumikad sa kaluoy sa Dios. Mag-ampo kita.

5. Alang sa mga nagdayeg ug nagpasalamat sa Dios ilabina nila nga ang Diosnong Kaluoy maghari diha sa ilang kasingkasing ug mamahimong dayag diha sa ilang pulong ug buhat. Mag-ampo kita.

6. Alang sa mga nangamatay ilabina sila nga mituo kang Cristo bisan wala makakita kaniya, mabulahan unta sa gasa sa kinabuhing dayon. Mag-ampo kita.

Pari: Langitnong Amahan, ang imong Diosnong Kaluoy walay kinutoban. Itugot nga kami mahimong angayan sa mga saad ni Cristo nga among Ginoo ug Manunubos. Amen.