IKATULO NGA DOMINGGO SA KWARESMA

IKATULONG DOMINGGO SA KWARESMA

a. BASAHON I

Ex. 17:3-7

Kinutlo gikan sa basahon sa Exodus.

Apan giuhaw pag-ayo ang mga tawo ug nagbagulbol sila kang Moises. Miingon sila, "Nganong gidala mo man kami gawas sa Ehipto? Aron ba kami ug ang among mga anak, ug ang among mga kahayopan mamatay sa kauhaw?" Unya nag-ampo si Moises sa Ginoo, "Unsa may akong buhaton niining mga tawhana? Hapit na ako batoon nila." Ang Ginoo miingon kang Moises, "Dad-a ang pipila ka pangulo sa Israel, ug pag-una kamo sa katawhan. Dad a ang imong sungkod nga gibunal mo sa suba; lakaw na. Ubanan Ko ikaw didto sa bato sa Horeb. Bunali ang bato ug mogula ang tubig nga mainom sa mga tawo." Gibuhat kini ni Moises atubangan sa mga pangulo sa Israel. Kadtong dapita ginganlag "Pagsulay" ug "Paglalis" kay nakiglalis man ang mga Israelita ug gisulayan nila ang Ginoo sa ilang pagpangutana, "Nagauban ba kanato ang Ginoo, o wala ba?"

Ang Pulong sa Ginoo.

b. SALMO RESPONSORYO

Salmo 95: 1-2, 6-7, 8-9

Tubag (R) - Kon karon makadungog kamo sa Iyang tingog, ayaw patig-aha ang inyong mga kasingkasing.

Umari kamo, awitan ta nga malipayon ang Ginoo; isangyaw ta ang Bato sa atong kaluwasan. Yukboan ta Siya uban sa pasalamat; awitan ta Siya nga malipayon og mga salmo. (R)

Umari kamo, manghapa kita sa pagsimba; mangluhod kita atubangan sa Ginoo nga nagbuhat kanato. Kay Siya man ang atong Dios, ug kita ang katawhan nga Iyang gidumala, ang panon nga Iyang gitultolan. (R)

Hinaut unta nga karon mamati kamo sa Iyang tingog. "Ayaw tig-aha ang inyong mga kasingkasing sama didto sa Meriba, sama sa adlaw ni Massah didto sa kamingawan, diin gisulayan ako sa inyong mga katigulangan; ila akong gisuta bisan nakakita sila sa akong mga buhat."(R)

c. BASAHON II 

Rom. 5: 1-2, 5-8

Kinutlo gikan sa sulat ni San Pablo ngadto sa taga Roma.

Sanglit gihimo na man kitang matarung sa Dios pinaagi sa pagtoo, may panagdait na kita ug ang Dios pinaagi sa atong Ginoong Jesukristo. Pinaagi sa pagtoo gidala kita Niya ngadto sa grasya sa Dios diin nagkinabuhi kita karon, ug nagmalipayon diha sa paglaum nga makaambit gayud kita sa himaya sa Dios.

Kining paglauma dili gayud mapakyas, kay gibubo man sa Dios ang Iyang gugma sulod sa atong mga kasingkasing pinaagi sa Espiritu Santo nga gasa sa Dios kanato.

Kay sa panahon nga wala pa kitay mahimo, nagpakamatay si Kristo alang sa mga dautan sa panahon nga gipili sa Dios. Malisod sa usa ka tawo ang pagpakamatay tungod sa usa ka tawong matarung. Tingalig adunay magpakamatay tungod sa usa ka maayong tawo. Apan gipakita sa Dios kanato ang gidak-on sa Iyang paghigugma kanato, kay sa makasasala pa kita nagpakamatay si Kristo alang kanato.

Ang Pulong sa Ginoo.

d. EBANGHELYO

Juan 4: 5-42 o 4: 5-15,19-26,39,40-42

Ang Santos nga Ebanghelyo sumala ni San Juan.

(Tinaas)

Nahiabot si Jesus sa usa ka lungsod sa Samaria nga ginganlag Sikar, nga dili layo sa yuta nga gihatag ni Jacob sa iyang anak nga si Jose. Didto nahimutang ang atabay ni Jacob, ug si Jesus milingkod tupad sa atabay sanglit gikapoy Siya gumikan sa panaw. Hapit na kadto maudto.

Unya nahiabot ang usa ka Samaritana aron pagkalos og tubig. Si Jesus miingon kaniya, "Paimna Ako." (Niining tungora ang Iyang mga tinun-an didto sa lungsod aron pagpalit og pagkaon.) Ang Samaritana mitubag, "Ikaw Judio ug ako Samaritana, busa nganong nangayo Ka man kanakog tubig nga mainom?" (Kay ang mga Judio god ug ang mga Samaryanhon wala may panagsandurotay.) Si Jesus mitubag, "Kon nasayud ka pa unta sa gasa sa Dios, ug kinsa kining nangayo kanimog tubig, mangayo gayud ikaw Kaniya ug Iya kang hatagan og buhing tubig." "Nyor," ang babaye miingon, "wala Kay timba ug lawom ang atabay. Asa Ka man mokuhag buhing tubig? Kining atabaya gihatag sa among katigulangan nga si Jacob, ug siya ug ang iyang mga anak ingon man ang iyang mga kahayopan miinom gikan niini. Labaw Ka ba diay kang Jacob?" Si Jesus mitubag: "Ang moinom niining tubiga uhawon pag-usab, apan ang moinom sa tubig nga Akong ihatag kaniya dili gayud uhawon. Kay ang tubig nga ihatag Ko kaniya mahimo diha kaniya nga usa ka tuburan nga mohatag og buhing tubig ug kinabuhing walay katapusan." Ang babaye miingon, "Nyor, hatagi ako niining tubiga aron dili na ako uhawon, ug dili na usab ako moanhi sa pagkalos." Ug giingnan siya ni Jesus, "Lakaw, tawga ang imong bana ug balik nganhi." "Wala akoy bana", miingon ang babaye. Si Jesus mitubag: "Husto ka sa imong pag-ingon nga wala kay bana. Kalima ka na maminyo ug ang lalaki nga imong gikaipon karon dili tinuod mong bana. Tinuod ang imong gitug-an Kanako." Ang babaye miingon, "Nyor, nakita ko nga usa Ikaw ka propeta. Ang among mga katigulangan nga Samaryanhon nagsimba sa Dios dinhi niining bukira, apan kamong mga Judio nagaingon nga ang Jerusalem mao ang dapit diin magsimba kita sa Dios." Si Jesus miingon kaniya: "Babaye, tuohi Ako nga moabot ang panahon nga ang mga tawo dili na magasimba sa Amahan dinhi niining bukira ni sa Jerusalem. Kamong mga Samaryanhon wala gayud makaila sa inyong gisimba, apan kaming mga Judio nakaila sa among gisimba, kay ang kaluwasan nagagikan man sa mga Judio. Apan taliabot ang panahon ug karon ania na, nga ang matuod nga mga magsisimba magasimba sa Amahan diha sa espiritu ug sa kamatuoran. Kini sila mao ang mga magsisimba nga gusto sa Amahan nga maoy magsimba Kaniya. Ang Dios Espiritu ug kadtong magasimba kinahanglan magasimba Kaniya diha sa espiritu ug sa kamatuoran."

Ang babaye miingon kaniya, "Nasayud ako nga moanhi ang Mesiyas nga ginganlag Kristo. Inig-abot Niya, Iya kitang sultihan sa tanan." Si Jesus mitubag, "Ako mao Siya nga nakigsulti kanimo."

Niadtong higayona nahibalik ang mga tinun-an ni Jesus ug natingala sila pag-ayo sa pagkakita nila nga nakigsulti Siya sa usa ka babaye. Apan walay usa kanila nga nakapangutana sa babaye kon unsay iyang gusto, ni nangutana sila kang Jesus nganong nakigsulti Siya sa babaye.

Unya gibiyaan sa babaye ang iyang banga ug mibalik siya sa lungsod, ug miingon sa mga tawo: "Ngari kamo ug tan-awa ninyo ang tawo nga misulti kanako sa tanan nga akong nabuhat. Siya na ba kaha ang Mesiyas?" Busa namiya sila sa lungsod ug nangadto kang Jesus.

Niadtong higayona ang mga tinun-an miagda kang Jesus, "Rabi, kaon na!" Apan mitubag Siya, "May pagkaon Ako nga wala ninyo hisayri." Busa ang mga tinun-an nagpangutan-anay. "May nagdala ba kaha Kaniyag pagkaon?" Si Jesus miingon kanila, "Ang Akong pagkaon mao ang pagtuman sa kabubut-on sa nagpadala Kanako ug sa paghuman sa buluhaton nga Iyang gipabuhat Kanako."

"Dili ba nag-ingon man kamo: 'Upat pa ka bulan una moabot ang ting-ani? Sultihan Ko kamo, tan-awa ninyo ang kaumahan: hinog na ang mga bunga ug husto nang anihon! Ang nagaani suholan ug hiposon niya ang mga abot alang sa kinabuhing walay katapusan aron ang nagapugas ug ang nagaani mangalipay, kay husto ang ginaingon, 'Lain ang magpugas ug lain usab ang mag- ani. Gipadala Ko kamo aron mangani sa usa ka uma nga wala ninyo hagoi. Ang uban maoy naghago ug kamo nabulahan sa ilang hinagoan." 

Daghan sa mga Samaryanhon niadtong lungsora nanuo kang Jesus kay ang babaye miingon man, "Ako gisultihan Niya sa tanan nga akong nabuhat." Busa sa pag-abot sa mga Samaryanhon, gihangyo nila si Jesus nga magpabilin uban kanila ug nagpabilin Siya didtog duha ka adlaw.

Daghan pa gayud ang nanuo Kaniya tungod sa Iyang mensahe, ug ilang giingnan ang babaye, "Kami mituo na karon dili tungod sa imong gisulti, kondili tungod kay kami mismo nakadungog Kaniya, ug kami nasayud nga Siya mao gayud ang Manluluwas sa kalibutan."

Ang Ebanghelyo sa Ginoo.

(Minubo)

Nahiabot si Jesus sa usa ka lungsod sa Samaria nga ginganlag Sikar, nga dili layo sa yuta nga gihatag ni Jacob sa iyang anak nga si Jose. Didto nahimutang ang atabay ni Jacob, ug si Jesus milingkod tupad sa atabay sanglit gikapoy siya gumikan sa panaw. Hapit na kadto maudto.

Unya nahiabot ang usa ka Samaritana aron pagkalos og tubig. Si Jesus miingon kaniya, "Paimna Ako." (Niining tungora ang Iyang mga tinun-an didto sa lungsod aron pagpalit og pagkaon.) Ang Samaritana mitubag, "Ikaw Judio ug ako Samaritana, busa nganong nangayo Ka man kanakog tubig nga mainom?" (Kay ang mga Judio god ug ang mga Samaryanhon wala may panagsandurotay.) Si Jesus mitubag, "Kon nasayud ka pa unta sa gasa sa Dios, ug kinsa kining nangayo kanimog tubig, mangayo gayud ikaw Kaniya ug Iya kang hatagan og buhing tubig." "Nyor." ang babaye miingon, "wala Kay timba ug lawom ang atabay. Asa Ka man mokuhag buhing tubig? Kining atabaya gihatag sa among katigulangan nga si Jacob, ug siya ug ang iyang mga anak ingon man ang iyang mga kahayopan miinom gikan niini. Labaw Ka ba diay kang Jacob?" Si Jesus mitubag: "Ang moinom niining tubiga uhawon pag-usab, apan ang moinom sa tubig nga Akong ihatag kaniya dili gayud uhawon. Kay ang tubig nga ihatag Ko kaniya. mahimo diha kaniya nga usa ka tuburan nga mohatag og buhing tubig ug kinabuhing walay katapusan." Ang babaye miingon, "Nyor, hatagi ako niining tubiga aron dili na ako uhawon, ug dili na usab ako moanhi sa pagkalos."

Ang babaye miingon, "Nyor, nakita ko nga usa Ikaw ka propeta. Ang among mga katigulangan nga Samaryanhon nagsimba sa Dios dinhi niining bukira, apan kamong mga Judio nagaingon nga ang Jerusalem mao ang dapit diin magsimba kita sa Dios." Si Jesus miingon kaniya: "Babaye, tuohi Ako nga moabot ang panahon nga ang mga tawo dili na magasimba sa Amahan dinhi niining bukira ni sa Jerusalem. Kamong mga Samaryanhon wala gayud makaila sa inyong gisimba, apan kaming mga Judio nakaila sa among gisimba, kay ang kaluwasan nagagikan man sa mga Judio. Apan taliabot ang panahon ug karon ania na, nga ang matuod nga mga magsisimba magasimba sa Amahan diha sa espiritu ug sa kamatuoran. Kini sila mao ang mga magsisimba nga gusto sa Amahan nga maoy magsimba Kaniya. Ang Dios Espiritu ug kadtong magasimba kinahanglan magasimba Kaniya diha sa espiritu ug sa kamatuoran."

Ang babaye miingon kaniya, "Nasayud ako nga moanhi ang Mesiyas nga ginganlag Kristo. Inig-abot Niya, Iya kitang sultihan sa tanan." Si Jesus mitubag. "Ako mao Siya nga nakigsulti kanimo."

Daghan sa mga Samaryanhon niadtong lungsora nanuo kang Jesus kay ang babaye miingon man, "Ako gisultihan Niya sa tanan nga akong nabuhat." Busa sa pag-abot sa mga Samaryanhon, gihangyo nila si Jesus nga magpabilin uban kanila ug nagpabilin Siya didtog duha ka adlaw.

Daghan pa gayud ang nanuo Kaniya tungod sa Iyang mensahe, ug ilang giingnan ang babaye, "Kami mituo na karon dili tungod sa imong gisulti, kondili tungod kay kami mismo nakadungog Kaniya, ug kami nasayud nga Siya mao gayud ang Manluluwas sa kalibutan."

Ang Ebanghelyo sa Ginoo.

e. KOMENTARYO

Tema: Ang Ginoo Nagauban Kanunay.

Kasagaran kon maghisgot na gani kita mahitungod sa mga problema, pagsulay, ug kalisod sa kinabuhi, makaingon dayon kita paita pud aning kinabuhi-a, ug dali lang dayon kita mosurender ug mawad-an sa paglaum sa atong kinabuhi. Dinhi usab, atong makita ug masukod ang atong mga kinaiya isip tawo. Adunay mga kinaiya nga pasensyoso sa pagsagubang sa mga pagsulay ug kalisod sa kinabuhi. Ang uban andam nga magsakripisyo ug modawat sa maong mga pagsulay sa kinabuhi. Kini nga kinaiya sa tawo adunay hugot nga pagtoo ug misalig nga ang Ginoo kanunay nagauban kanila. Apan aduna usab ubang tawo nga kanunay nga hamubo lamang og pasensiya ug dili makalahutay kung sila makasinati og mga pagsulay ug kalisod sa kinabuhi.

Ang atong mga pagbasa karon naghulagway ug nagpamatuod nga ang Ginoo anaa gayod kanunay nagauban sa Iyang katawhan. Diha sa unang pagbasa ang mga Israelita gisulayan sa Dios didto sa kamingawan; hangtod kanus-a kaha nga ang nahiusang katawhan maandam na pagsubay nga gihatag sa Dios kanila? Hangtod asa kutob ang ilang pagtoo? Ug tungod niini, nangayo sila'g mga timaan kay dili hugot ug hingpit ang ilang pagsalig ngadto sa Dios. Ang mga Israelita nagbagulbol batok kang Moises nga nag-ingon "Nganong gipahawa mi nimo didto sa Ehipto? Aron ba lamang patyon sa kauhaw uban sa among mga anak ug kahayopan"? Apan bisan taliwala pa man niining mga bagulbol sa katawhan, ang Dios wala gayod mibiya sa Iyang katawhan, anaa siya nagauban kanunay kanila. Busa gisultihan si Moises sa Dios sa pag-una sa katawhan ngadto sa Horeb ug didto may usa ka bato, gipabunalan ni Moises ang bato gamit ang sungkod aron moagas ang tubig aron aduna nay mainom ang katawhan. Ang maong panghitabo nagpamatood nga ang Ginoo nagauban gayod kanunay sa Iyang katawhan. Ang bato nga maoy tinubdan sa tubig nagsimbolo kini sa Dios, ang tuburan sa kinabuhi sa Iyang katawhan, ang milagrosong bato nga nag-uban sa ilang panaw. Ug diha sa atong Ebanghelyo naghisgot usab kini mahitungod sa buhing tubig. Ang tubig nga maoy makatagbaw sa atong kauhaw ug tuburan sa atong kinabuhi. Kining buhing tubig nagsimbolo sa mga pulong sa Dios. Ang nahitabo sa atabay ni Jacob naghulagway usab sa kaugalingon natong pagpakigtagbo ni Jesus; ang pamaagi nga gigamit ni Jesus pagdala sa babaye sa pag- ila ug paghigugma kaniya maoy nagpadayag og usa ka pamaagi nga gigamit usab ni Jesus alang sa kaugaliongon natong pagbag-o.

Ang Dios wala magkinahanglan sa atong pag-ampo, apan gipangita Niya dinhi nato ang kayano, ang kaabli ug kamatinud-anon sa atong batok sa espiritu. Ang espiritu sa Dios maoy giya o lamdag sa mga nagpangita sa kamatuoran kalibutan nga anaa ang mga lansis ug bakak. Sa katapusan ato unta kanunay nga hinumduman ug mapuy-an sa atong kinabuhi ang kamaturan nga gipadayag na kanato sa atong Ginoo. Ug bisan magsagubang kita sa mga problema, pagsulay ug kalisod sa kinabuhi dili unta nato hikalimtan nga ang Dios anaa nagauban kanato kanunay ug dili Niya kita pasagdan sa atong tagsatagsa ka panaw niining kalibutana sama sa Iyang pag-uban sa mga Israelita.

Giya alang sa pamalandong:

1. Sa mga higayon nga makasinati ako og mga pag-antus ug kalisod, ako ba kining nadawat ug gihalad pagbalik sa Ginoo?

2. Kinasingkasing ba akong misalig ug mitoo nga ang Dios kanunay magauban kanako sa tanang higayon sa akong kinabuhi ilabina sa takna sa kalisod?

f. PANGALIYA

Pangulo: Mag-ampo kita ngadto sa Dios atong Amahan, ang tinubdan sa Espirituhanong kinabuhi nga Iyang tubagon ang atong mga panginahanglan. Sa matag pag-ampo kita moingon: 

DIOS SA KINABUHI, DUNGGA ANG AMONG PAG- AMPO.

1. Kun anaa kita sa kalibog, nga malamdagan unta kita sa mga mensahe sa Maayong Balita nga atong ma- dungog sa mga magsasangyaw nga mga tinugyanan sa atong Simbahan. Mag-ampo kita

2. Kun kita nakasaksi sa mga panghitabo nga walay kaa- ngayan ug hustisya, maisogon unta kitang mopadayag ug mobarog sa katarungan aron ang mga lideres sa atong nasud nga hingtungdan mahigmata ngadto sa kamatuoran. Mag-ampo kita.

3. Kun kita nangita sa kaayohan sa atong kinabuhi ilabina niining panahon sa kwaresma, nga unta maningkamot kitang mopuyo diha sa Espiritu ni Kristo aron sama Kaniya makalahutay kita taliwala sa mga pagsulay. Mag-ampo kita.

4. Kun kita nagkatigom sa Talad sa Dios, nga kining Iyang Pulong mamahimong buhing tingog ug ang Iyang Lawas ug Dugo maghatag ug Diosnong kinabuhi alang kanato. Mag-ampo kita.

5. Kun kita matuod nga mga Kristohanong katilingban, nga mamahimo kitang buhing tubig alang sa uban kinsa giuhaw sa tinubdan sa tubig sa kinabuhi. Mag-ampo kita.

6. Kun kita... (idugang ang panginahanglan sa katilingban). Mag-ampo kita.

7. Kun kita adunay personal nga katuyuan ato kining i- ampo sa kahilum.

Pangulo: Amahan ang tanang maayong butang nagagikan sa Imong mga kamot. Ipakita kanamo ang Imong kadayganan aron kami mahigmata sa kamatuoran ug makahatag og paghigugma sa uban pinaagi ni Kristo among Ginoo. Amen