1st Sunday of Lent

LENTEN SEASON

Unang Domingo sa Kwaresma

Pasiuna

Pebrero 26, 2023

Maayong buntag mga igsuon ko diha ni Cristo.

Karong Domingoha mao ang Unang Domingo sulod sa Kwaresma.

Ang unang Pagbasa gikan sa Basahon sa Genesis. Kini nagsaysay mahitungod sa sinugdan sa sala, ang pagkapukan sa tawo.

Ang Ikaduhang Pagbasa gikan sa Sulat ni San Pablo ngadto sa taga- Roma. Siya nagpahinumdum kanila mahitungod sa kaluwasan nga gipaambit ni Cristo ngadto kanila bisan pa man sa pagka dili masinugtanon sa tawo.

Ang Ebanghelyo gikan sa Santos nga Ebanghelyo sumala ni San Mateo. Kini nagsaysay mahitungod sa pagtintal ni satanas kang Cristo, ug nga si Cristo nagmadaugon niini.

BASAHON I

Gn. 2:7-9; 3:1-7

KINUTLO GIKAN SA BASAHON SA

GENESIS

Unya mikuha ang GINOONG DIOS og yuta ug nagbuhat siyag tawo gikan niini; gihuypan niya ang buho sa ilong sa tawo sa makapabuhing gininhawa ug ang tawo nakabaton og kinabuhi.

Unya naghimo ang GINOONG DIOS og tanaman didto sa Eden, sa silangan, ug gibutang niya didto ang tawo nga iyang gibuhat. Gipatubo sa GINOONG DIOS ang tanang matang sa mga kahoy nga maanindot ug mamungag mga bunga nga maayong kan-on. Sa taliwala sa tanaman diha ang kahoy nga naghatag og kinabuhi ug ang kahoy nga naghatag og kahibalo unsay maayo ug unsay dautan.

Sa tanang mananap nga gibuhat sa GINOONG DIOS, ang bitin mao ang labing abtik. Gipangutana sa bitin ang babaye, "Gidid-an ba diay kamo sa Dios pagkaon sa bunga sa tanang kahoy sa tanaman?"

Mitubag ang babaye, "Makakaon kami sa bunga sa tanang kahoy sa tanaman, gawas sa kahoy nga anaa sa taliwala niini. Gidid-an kami sa Dios sa pagkaon og bisan gani sa paghikap nianang kahoya; kon supakon namo kini, mamatay kami."

Miingon ang bitin, "Dili tinuod nga mamatay kamo! Gisulti kini sa Dios kaninyo kay nasayod man god siya nga kon mokaon kamo niini, maabli ang inyong salabotan ug mahisama kamo kaniya nga nasayod unsay maayo ug unsay dautan."

Sa pagkakita sa babaye nga ang maong kahoy maanindot kaayo ug laming kan-on ang bunga niini ug makapahimo kaniyang maalamon, mikuha siyag bunga ug gikaon niya kini. Unya gihatagan niya ang iyang bana ug mikaon usab siya. Pagkahuman gayod nilag kaon, naabli ang ilang salabotan ug nakita nila nga hubo diay sila; busa naghimo silag mga tapis gikan sa mga dahon sa kahoyng igera aron itabon sa ilang lawas.

ANG PULONG SA GINOO.

SALMO RESPONSORYO

Ps. 51:3-4, 5-6, 12-13, 14, 17

R. Maluoy ka, Ginoo, kay nakasala kami.

Kaloy-i ako, O Dios, diha sa imong kaayo; sa kadako sa imong kaluoy papasa ang akong kalapasan.

Hugasi akog maayo sa akong kasaypanan ug linisi ako sa akong kasal-anan.

R. Maluoy ka, Ginoo, kay nakasala kami.

Kay giila ko ang akong kalapasan, ug ang akong sala kanunay ania sa akong atubangan: "Kanimo lamang nakasala ako, ug nakabuhat og dautan sa imong atubangan."

R. Maluoy ka, Ginoo, kay nakasala kami.

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa kanako ang imong balaang espiritu.

R. Maluoy ka, Ginoo, kay nakasala kami. Ibalik kanako ang kasadya sa imong kaluwasan, ug padayona dinhi kanako ang mauyonong espiritu. O Ginoo, ablihi ang akong mga ngabil, ug ang akong baba magsangyaw sa imong kadayganan.

R. Maluoy ka, Ginoo, kay nakasala kami.

BASAHON II

Rom. 5:12-19

KINUTLO GIKAN SA SULAT NI SAN PABLO NGADTO SA TAGA-ROMA

(TINAAS)

Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo. Dinhi na sa kalibutan ang sala sa wala pa gani ihatag ang Balaod; apan sanglit wala may balaod, wala isipa ang mga sala. Apan sukad sa panahon ni Adan hangtod sa panahon ni Moises ang tanang tawo gigamhan sa kamatayon, lakip kadtong wala makasala sama sa pagpakasala ni Adan sa iyang paglapas sa sugo sa Dios.

Naghulagway si Adan sa usa ka tawong umaabot. Apan dili managsama silang duha; kay dili sama sa sala ni Adan ang gasa sa Dios. Kay kon daghan ang nangamatay tungod sa pagpakasala sa usa ka tawo, labi pang dako ang grasya ug ang gasa sa Dios nga mabatonan sa daghang tawo pinaagi sa usa ka tawo nga mao si Jesucristo. Ug may kalainan ang sangpotanan sa gasa sa Dios ug sa sala sa usa ka tawo. Kay gipahamtang ang silot tungod lamang sa usa ka sala, apan ang gasa nga gihatag tapos sa daghang pagpakasala naghimog matarong sa tawo. Kon tungod sa pagpakasala sa usa ka tawo naghari ang kamatayon pinaagi sa maong tawo, labi pang maghari kadtong nakadawat sa madagayaong grasya sa Dios ug sa gasa sa iyang pagkamatarong pinaagi kang Jesucristo.

Busa ingon nga ang pagpakasala sa usa ka tawo maoy nahimong hinungdan nga silotan ang tanan, pinaagi usab sa matarong buhat sa usa ka tawo maluwas ug makabaton sa kinabuhi ang tanan. Kay ingon nga pinaagi sa pagkama- supilon sa usa ka tawo daghan ang nahimong makasasala, pinaagi usab sa pagkamatinumanon sa usa ka tawo daghan ang gihimong matarong sa Dios.

ANG PULONG SA GINOO.

OR:

Rom. 5:12, 17-19

(MINUBO)

Nakasulod sa kalibutan ang sala pinaagi sa usa ka tawo, ug ang sala nagdalag kamatayon. Busa mikaylap ang kamatayon ngadto sa tanang katawhan kay nakasala man ang tanang tawo.

Kon tungod sa pagpakasala sa usa ka tawo naghari ang kamatayon pinaagi sa maong tawo, labi pang maghari kadtong nakadawat sa madagayaong grasya sa Dios ug sa gasa sa iyang pagkamatarong pinaagi kang Jesucristo.

Busa ingon nga ang pagpakasala sa usa ka tawo maoy nahimong hinungdan nga silotan ang tanan, pinaagi usab sa matarong buhat sa usa ka tawo maluwas ug makabaton sa kinabuhi ang tanan. Kay ingon nga pinaagi sa pagkama- supilon sa usa ka tawo daghan ang nahimong makasasala, pinaagi usab sa pagkamatinumanon sa usa ka tawo daghan ang gihimong matarong sa Dios.

ANG PULONG SA GINOO.

EBANGHELYO

Mt. 4:1-11

Kinutlo gikan sa Balaan nga Ebanghelyo sumala ni Mateo

Unya si Jesus gidala sa Espiritu ngadto sa kamingawan aron tentalon sa yawa. 

Nagpuasa siya sulod sa kap-atan ka adlaw ug kap-atan ka gabii, pagkahuman gigutom siya.

Ug midúol ang Maninental ug miingon kaniya, "Kon Anak ka sa Dios, ingna nga kining mga batò mamahimong pan."

Apan mitubag siya ug miingon, "Nahisulat kini: 'Dili sa pan lamang mabuhi ang tawo, kondili sa matag pulong nga mogula gikan sa baba sa Dios."

Unya gidala siya sa yawa ngadto sa lungsod nga balaan, ug gipahiluna siya sa kinatas-ang bahin sa templo, ug miingon siya kaniya, "Kon Anak ka sa Dios, ambak ngadto sa ubòs, kay nahisulat man kini: 'Ngadto sa iyang mga anghel magsugo siya bahin kanimo ug sapnayon ka nila sa ilang mga kamot, aron dili malambos sa batò ang imong tiil."

Miingon si Jesus kaniya, "Nahisulat usab kini, 'Dili gayod nimo tentalon ang Ginoo nga imong Dios."

Unya gidala na usab siya sa yawa ngadto sa taas kaayong bukid ug gipakita kaniya ang tanang gingharian sa kalibotan ug ang ilang kahimayaan.

Ug miingon siya kaniya, "Kining tanan ihatag ko kanimo kon mohapa ka ug mosimba kanako."

Unya miingon si Jesus kaniya, "Pahawa, Satanas! Kay nahisulat man kini: 'Ang Ginoo nga imong Dios imong simbahon ug siya lamang ang imong alagaran."

Busa mibiya ang yawa kaniya, ug unya nangabòt ang mga anghel ug ming-atiman kaniya.

Ang Ebanghelyo sa Ginoo.

PANGALIYA SA KATILINGBAN

Pebrero 26, 2023

Pari: Mga igsuon, mag-ampo kita ngadto sa atong Makagagahum nga Amahan aron dili kita madaug sa mga pagsulay ug aron makita nato ang iyang kabubut-on alang kanato. Sa matag pag-ampo kita muingon:

GINOO, LUWASA KAMI SA IMONG GUGMA.

1. Alang sa Simbahan ug ang mga pangulo niini ilabina si Papa Francisco, mga Obispo, ug mga Pari, mamahimo unta silang panig-ingnan sa katawhan, aron magpabilin kini nga lig-on bisan taliwala sa daghang mga panghulga ug buot mobahinbahin sa katilingban. Mag-ampo kita sa Ginoo.

2. Alang sa mga tawo nga anaa sa kagamhanan ilabi na ang mga lideres sa atong nasud, makadawat unta sila ug igong kaalam diha sa pag-alagad sa mga katawhan. Mag-ampo kita sa Ginoo.

3. Alang niining tuig sa Sinodo nga mamahimo unta ang Gagmayng Kristohanong Katilingban nga instrumento sa pagpalig-on sa pagsalig sa Dios ngadto sa mga magtutuo nga nagduhaduha sa ilang pagtuo tungod sa daghang pagsulay nga miharong kanila. Mag-ampo kita sa Ginoo.

4. Alang sa mga nagmasakiton ug kadtong mga masakiton nga gitintal sa pagbiya sa ilang pagtuo sa Dios tungod sa maong kahimtang, makasinati unta sa makaluluwas nga gahum sa Dios pinaagi sa mga tawo nga nag- amoma kanila. Mag-ampo kita sa Ginoo.

5. Alang sa mga nagadayeg ug nagapasalamat sa Dios ilabina sila makadawat unta sa grasya nga ilang gikinahanglan sa matag adlaw. Mag- ampo kita sa Ginoo.

6. Alang sa atong mga igsuong nangamatay ilabina nila _nga pasayluon sila sa sala ug paambiton sa kinabuhing dayon uban ni Cristo. Mag-ampo kita sa Ginoo.

Pari: Mahigugmaong Dios, lig-ona kami kanunay. Ayaw itugot nga magapus kami sa mga butang ug tinguha nga alang lamang sa among kaugalingon. Tudlo-i kami sa tiunay nga paghigugma sa uban pinaagi ni Cristo among Ginoo ug Manluluwas. Amen.

PRAYER FOR THE ASIAN SYNODAL CONTINENTAL ASSEMBLY 

Ampoon human sa pagpangalawat

Loving Father,

We thank you for the gift of your Son, our Lord Jesus Christ. He lived among us and led us from darkness of sin to the light of your salvation. He has destroyed the barrier that separated us from each other. He has made us one through his loving obedience to you when he offered his life for us on the Cross.

We thank you for the gift of the Holy Spirit, who continues to guide us and teach us the way we must go as your Church.

We thank you for the fruits of the Synod on Synodality that have opened us to genuine communion, active participation and emboldened mission. We humbly pray for the success of the Asian Synodal Continental Assembly.

May your Spirit continue to set our hearts aflame with your love for all peoples and nations.

Continue to open our eyes and hearts to follow the way of Your Son, Jesus, who taught us to walk with each other as brothers and sisters, to be his body, his Church. We ask this through Christ our Lord. Amen

PAHIBALO 

PEBRERO 26, 2023

1. Gidasig ang tanan sa pag apil sa senimanang pag-ampo sa Dalan sa Krus o Via Crusis matag Biyernes sa alas 3:30 sa hapon. Sulod usab niining panahon sa kwaresma, wala nay misa sa ala 6:00 sa buntag matag biyernes, kini pagahimoom na sa alas 5:00 sa hapon pagkahuman sa Via Crusis.

2. Ang Regional Major Seminary (Remase) mopahigayon ug usa ka Dinner for a Cause karong umaabot nga Marso 25, 2023 sa alas 6:30 sa gabii diha sa Remase Gym. Ang mga ticket mamahimong makuha diha sa opisina sa atong parokya.

3. Ang Ministriya sa Lectors ug Commentators sa atong parokya nag-agni sa mga aspirants ilabina niadtong mga high school students nga antigong mobasa ug muistorya sa ingles ug binisayang pinulongan, sa pag-aply isip servers alang sa weekday masses sa buntag ug Anticipated Mass matag sabado. Ang application period hangtod Marso 17, 2023. Aduna usab pagahimoon nga series sa orientation ug screening-practicum sa dili pa ang acceptance ug sending forth sa mga bag-ong miyembro. Alang sa dugang kasayuran, palihug pagpakig-istorya ni Ms. Jelai Jarilla sa parish office o ni Ms. Pamela Dawn Patayon.

Daghang Salamat.