KASAULOGAN SA PULONG

IKAUPAT NGA DOMINGGO SA ADBIYENTO

a. BASAHON I

Is. 7:10-14

Kinutlo gikan sa basahon ni Propeta Isaias.

Midugang ang Ginoo pagsulti kang Akas, nagaingon: Pangayo alang kanimog tilimad-on gikan sa Ginoong Dios nimo,dinha sa ilawom sa kahiladman, kun dinha sa kahitas-an sa ibabaw. Ug miingon si Akas: Dili ako mangayo, ug dili ko sulayon ang Ginoo. Unya mitubag siya: Pamati kamo, balay ni David. Diyutay ba gud kaninyo ang pagkamahasolon sa mga tawo. kay usab magmahasolon man kamo sa akong Dios? Tungod niini ang Ginoo mismo magahatag kaninyog tilimad-on: Ania, ang birhen manamkon; ug magapahimugso og anak nga lalaki, ug pagatawgon ang iyang ngalag Emmanuel.

Ang Pulong sa Ginoo.

b. SALMO RESPONSORYO

Salmo 24:1-2.3-4.5-6

Tubag (R) Pasudla ang Ginoo kay Siya ang Hari sa himaya.

Sa Ginoo ang yuta ug ang iyang kapuno; ang kalibutan ug sila nga nagpuyo niini, kay iya kining gitukod ibabaw sa kadagatan, ug iya kining gibuhat ibabaw sa kasubaan. (R)

Kinsay makatungas sa bukid sa Ginoo? o kinsay makabarog sa iyang balaang dapit? Siya kansang mga kamot walay mga sala kansang kasingkasing malinis. Siya nga wala magtinguha sa mga butang nga makawang. (R)

Makadawat siya ug panalangin gikan sa Ginoo, ganti gikan sa Dios nga iyang manluluwas. Mao kini ang kaliwat nga nangita kaniya nga nangita sa nawong sa Dios ni Jacob. (R)

c. BASAHON II

Roma 1:1-7

Kinutlo gikan sa sulat ni San Pablo ngadto sa taga Roma.

Gikan kang Pablo nga sulugoon ni Kristo Jesus ug gipili pagka- apostol, ug gitawag sa Dios aron magwali sa iyang Maayong Balita.

Ang Maayong Balita dugay nang gisaad sa Dios pinaagi sa Iyang mga propeta, ug gisulat diha sa Balaang Kasulatan. Mahitungod kini sa Iyang Anak, ang atong Ginoong Jesukristo: sa Iyang pagkatawo, kaliwat Siya ni David; sa Iyang pagka- espirituhanon, gipadayag Siya nga Anak sa Dios uban sa dakong gahom pinaagi sa Iyang pagkabanhaw. Pinaagi Kaniya ug tungod sa Iyang ngalan gihatagan ako sa Dios og katungod sa pagka- apostol aron pagkabig sa tanang katawhan aron motuo sila ug motuman, lakip kamo nga anaa sa Roma nga gitawag sa Dios aron maiya ni Jesukristo.

Ug busa gisulatan ko kamong tanan diha sa Roma, nga gihigugma ug gitawag sa Dios aron mahimong Iyang katawhan, Hatagan unta kamog grasya ug kalinaw sa Dios nga atong Amahan ug sa Ginoong Jesukristo.

Ang Pulong sa Ginoo.

d. EBANGHELYO

Mt. 1:18-24

Ang Santos nga Ebanghelyo sumala ni San Mateo.

Mao kini ang kaagi sa pagkatawo ni Jesukristo. Ang Iyang inahan nga si Maria sinayuran ni Jose, apan sa wala pa sila makasal si Maria nakamatikod nga siya moanak pinaagi sa Espiritu Santo. Si Jose nga iyang pamanhonon, tawo nga matarong, apan dili siya buot nga pakaulawan niya si Maria atubangan sa mga tawo, busa naglaraw siya sa pagpakigbulag kaniya sa hilom. Samtang siya naghunahuna niini, usa ka anghel sa Ginoo mipakita kaniya pinaagi sa damgo ug miingon: "Jose, kaliwat ni David, ayaw kahadlok pagpangasawa kang Maria, kay ang iyang gisabak lalang sa Espiritu Santo. Siya manganak og bata nga lalaki ug hinganlan mo siyag Jesus kay siya magluwas sa Iyang katawhan sa ilang mga sala."

Ug kining tanan nahitabo aron matuman ang giingon sa Ginoo pinaagi sa propeta: "Ang birhen magmabdos ug manganak og lalaki, ug siya pagahinganlag Emmanuel" (nga sa ato pa, "Ang Dios ania uban kanato").

Busa sa pagmata ni Jose iyang gituman ang gisugo sa anghel sa Ginoo kaniya ug nangasawa siya kang Maria.

Ang Ebanghelyo sa Ginoo.

e. KOMENTARYO

Tema: Salig ug Laum sa Dios!

Kanunay nato madungog ang pulong nga "salig apan ayaw laum". Apan niining ikaupat nga Dominggo sa Adbiyento kita gitawag sa pagsalig ug paglaum sa Dios. Sa atong Ebanghelyo karon naghisgot sa tulo ka importanting tawo sa kasaysayan sa atong kaluwasan kung diin nagtudlo kanato sa pagsalig ug paglaum sa Dios.

Una, mao si Maria. Siya usa ka dalaga nga sinayuran ni Jose. Siya ang gipili sa Dios nga mamahimong inahan sa batang Jesus. Atong nahibaluan nga sa dihang gipahibalo siya ni Anghel Gabriel nga siya manamkon sa lalang sa Espiritu Santo, siya wala masayod unsa ang angayan niyang buhaton. Apan puno sa pagsalig ug paglaum sa Dios miingon siya, "YES!" Sa pagdawat ni Maria isip inahan sa manunubos, iyang gidawat usab ang usa ka dakung responsibilidad nga gitahan sa Dios kaniya. Kini nagpamatuod sa iyang dakung pagsalig sa Dios ug paglaum nga dili siya pasagdan sa maong katungdanan.

Ikaduha, mao si Jose nga usa ka panday. Sa atong Ebanghelyo gipakita ang pagsunod ni Jose sa kabubut-on sa Dios. Si Jose usa ka maayong tawo nga naga-gikan sa banay ni Haring David aron matuman ang kasulatan nga nag-ingon, nga ang Mesiyas maga-gikan sa banay ni David. Sa sinugdanan nagdumili si Jose sa pagdawat kang Maria sa dihang nasayran niya nga si Maria nagsabak na. Apan sa pagpahibalo sa anghel kaniya pinaagi sa damgo, sa walay pagduha- duha iya kining gidawat. Kini nagpadayag sa dakung pagsalig ni Jose sa Ginoo ug sa paglaum nga siya dili pasagdan sa iyang katungdanan.

Ikatulo, mao si Jesukristo ang "Emmanuel." Tungod sa dakung gugma sa Dios kanato Iyang gipadala ang Iyang bugtong Anak aron sa pagsangyaw sa Maayong Balita ug alang sa atong kaluwasan. Ang pag-anhi sa Dios sa kalibutan dili lamang sulagma kun dili sa sinugdan pa lang daan na kining giplano sa Dios aron sa pagluwas sa Iyang katawhan. Kini tataw nga gipadayag ni propeta Isaias sa atong unang pagbasa. Si Jesus nagmatinumanon sa kabubut-on sa Amahan. Sa laktod nga pagkasulti, si Jesus misalig usab sa Amahan. Siya mituaw sa pag-ingon, "Amahan kuhaa kining kupa, apan dili ang akong pagbuot ang matuman."

Sa laing bahin, dili lamang sa pagkatawo ug pagkamatay sa krus sa atong Ginoo natapos ang kasaysayan sa atong kaluwasan. Kita isip mga sumusunod ni Kristo, gihatagan kita sa tahas sa pagpadayon sa makaluwasnong misyon sa atong Ginoo. Isip mga binunyagan kita nakadawat usab sa tahas sa pagpakaylap sa Maayong Balita sa tibuok kalibutan ug sa pagpuyo sa pagkabalaan. Kini tataw nga gipadayag ni San Pablo sa iyang sulat ngadto sa mga taga Roma diha sa atong ikaduhang pagbasa.

Mga igsoon ko diha ni Kristo, sa atong pagpaabot sa pagkatawo sa atong Manunubos, atong pamalandungan kung unsa ka hugot ang atong pagsalig sa Dios.

Giya alang sa pamalandong:

1. Nahisama ba kita kang Maria ug Jose diha sa atong pagsalig sa Dios?

2. Giunsa man nato pagpalambo sa atong pagsalig sa Dios?

3. Sa panahon sa kalisod ug kalipay, misalig ug milaum ba kita sa Dios?

f. PANGALIYA

Pangulo : Mga igsoon, agi'g paghandum sa pagpakatawo sa atong Manluluwas, mangaliyupo kita Kaniya nga dunggon ang atong mga pag-ampo ug panginahanglan. Ihalad nato karon ang atong katuyoan pinaagi sa pag-ingon: JESUS, LUWASA KAMI.

1. Nga ang mga pangulo sa Simbahan, ang Santo Papa, Juan Pablo II, ang atong obispo, ug sa tanang kaparian, nga hatagan unta sila sa kaalam nga Diosnon aron magpadayon sila pag-alagad sa Imong katawhan. Mag- ampo kita.

2. Nga ang gitugyanan sa atong nasud, ilabina ang mga lokal nga lideres, magmaaghop unta sila sa pagpa- ngalagad sa tanang katawhan aron ilang maangkon ang tawhanong tingusbawan. Mag-ampo kita.

3. Nga ang mga tawong wala nakadungog sa Pulong sa Dios, mahatagan unta sila og higayon nga makapami- naw sa Maayong Balita sa pagpakatawo sa Manunubos. Mag-ampo kita.

4. Nga ang mga gihikawan sa tawhanon nga katungod mahatagan unta og kaangayan ilabina niining panahon sa Pasko aron ilang matagamtaman ang diwa sa pagmaya ug kasadya. Mag-ampo kita.

5. Nga ang mga nakabsan sa pagpailob tungod sa ilang nahiaguman nga kasakitan, mahatagan unta og kadasig ug paglaum pinaagi sa atong mga kaigsoonan nga nag- hatag og dakung pagpakabana ngadto kanila. Mag-ampo kita.

6. Nga ang...(idugang dinhi ang panginahanglan sa katilingban). Mag-ampo kita.

7. Nga ang atong kaugalingong katuyoan atong ipadangat diha sa kahilom.

Pangulo : Ginoo, mao kini ang tingog sa Imong panon ug nasayud Ikaw nga daghan pa ang among mga tuyo nganha Kanimo nga makatabang kanamo sa pagtukod sa Imong Gingharian dinhi sa yuta ilabina niining among pagpaabot sa pagkatawo sa among Manunubos. Kini among gipangayo pinaagi ni Kristo among Ginoo. Amen.