1st Sunday of Advent

Unang Dominggo sa Adbiyento

Nobiyembre 27, 2022

PASIUNA

Maayong buntag mga igsoon diha ni Cristo.

Karong Domingoha mao ang Unang Dominggo sa Adbiyento.

Ang unang pagbasa gikan sa Basahaon ni Propeta Isaias. Siya nanagna sa pag-ingon: "Sa umaabot nga adlaw ang bukid diin mahimutang ang Templo mahimong labing taas sa tanan; molabaw kini sa kabungtoran."

Ang ikaduhang pagbasa gikan sa Sulat ni San Pablo ngadto sa taga-Roma. Siya nagpahimangno kanato sa pag-ingon: "Mao na kini ang panahon nga angay kamong magmata. Magbinuotan kita sa atong pagkinabuhi ingon nga mga tawo nga anaa sa kahayag."

Ug ang ebanghelyo gikan sa Ebanghelyo sumala ni San Mateo. Dinhi atong madungog si Cristo nga nagkanayon: "Busa pagtukaw kamo, kay wala kamo mahibalo unsang adlawa moabot ang inyong Ginoo."

Palihug manindog ang tanan alang sa pagsugod sa Santos na Eyukaristiya.

BASAHON I

Is. 2:1-5

KINUTLO GIKAN SA BASAHON NI

PROPETA ISAIAS

Kini mao ang mensahe sa Dios nga iyang gihatag kang Isaias, anak ni Amos, bahin sa Juda ug sa Jerusalem.

Sa umaabot nga mga adlaw ang bukid diin mahimutang ang Templo mahimong labing taas sa tanan; molabaw kini sa kabungtoran. Daghang kanasuran mag-ambahan nu sa pag-adto didto, ug ang katawhan moingon, "Manungas kita sa bukid sa GINOO, ngadto sa Templo sa Dios ni Israel aron tultolan kita niya sa iyang mga dalan ug maglakat kita subay sa iyang agianan." Kay gikan sa Sion mogula ang balaod, ug sa Jerusalem makigsulti ang GINOO sa iyang katawhan.

Husayon niya ang kanasuran ug siyay maghusay sa daghang katawhan; ug ang ilang mga espada himoon nilang punta sa daro, ug himoong galab ang ilang mga bangkaw, dili na mag-away ang kanasuran ni magbansay pa sila sa pagpakiggubat.

O kaliwat ni Jacob, ngari, manlakaw kita diha sa kahayag sa GINOO.

ANG PULONG SA GINOO.

SALMO RESPONSORYO 

Ps. 122:1-2, 3-4, 4-5, 6-7, 8-9

R. Nalipay ako nga giingnan ako nila; Mangadto na kita sa balay sa Ginoo. 

Nalipay ako kay giingnan ako nila, "Mangadto na kita sa balay sa Ginoo." Ug karon nagabarog na kami sa tugkaran sa imong ganghaan, O Jerusalem.

R. Nalipay ako nga giingnan ako nila; Mangadto na kita sa balay sa Ginoo.

Jerusalem, nga gitukod ingog usa ka siyudad, nga gipundok sa kahiusa. Ngadto kaniya nanungas ang mga tribo, ang mga tribo sa Ginoo.

R. Nalipay ako nga giingnan ako nila; Mangadto na kita sa balay sa Ginoo. 

Sumala sa kasugoan alang sa Israel aron pagpasalamat sa ngalan sa Ginoo. Diha kaniya gipabarog ang mga lingkoranan sa Hukmanan, ang mga lingkoranan alang sa balay ni David.

R. Nalipay ako nga giingnan ako nila; Mangadto na kita sa balay sa Ginoo.

Pag-ampo kamo alang sa kalinaw sa Jerusalem.

Molampus unta sila nga nahigugma kanimo.

Maghari unta ang kalinaw sulod sa imong mga paril ang kauswagan diha sa imong kabalayan.

R. Nalipay ako nga giingnan ako nila;

Mangadto na kita sa balay sa Ginoo. Tungod sa akong mga kadugo ug mga higala, moingon ako, "Ang kalinaw maanaa kaninyo!"

Tungod sa balay sa Ginoo, atong Dios, mag-ampo ako alang sa imong kaayohan.

R. Nalipay ako nga giingnan ako nila; Mangadto na kita sa balay sa Ginoo.

BASAHON II

Rom. 13:11-14

KINUTLO GIKAN SA SULAT NI SAN PABLO NGADTO SA TAGA-ROMA

Nasayod kamo unsa nang taknaa karon. Mao na kini ang panahon nga angay kamong magmata. Kay mas duol na karon ang atong kaluwasan kay sa pagsugod ta sa pagtuo. Hapit na matapos ang kagabhion ug duol na ang kabun- tagon. Busa isalikway ta ang mga buhat nga iya sa kangitngit ug isul-ob ta ang armadura ingon nga mga sundalo nga iya sa kahayag. Magbinuotan kita sa atong pagkinabuhi ingon nga mga tawo nga anaa sa kahayag-dili sa hilabihang paghudyaka ug paghubog-hubog, ni sa pakighilawas o sa kalaw-ayan, ni sa pagpakig-away o sa pagkamasinahon. Hinonoa, isul-ob ang Ginoong Jesucristo ingon nga armadura ug ayaw kamo padaog sa lawasnong kaibog.

ANG PULONG SA GINOO.

EBANGHELYO

Mt. 24:37-44

Kinutlo gikan sa Balaan nga Ebanghelyo sumala ni Mateo

Miingon si Jesus sa iyang mga tinun-an: "Tungod kay sama sa mga adlaw ni Noe, mao usab ang pag-abòt sa Anak sa Tawo. Kay sama niadtong mga adlaw sa wala pa ang lunop nangaon sila ug nanginom, nangasawa ug gipangasawa, hangtod sa adlaw kanus-a misulòd si Noe sa arka. Ug walâ sila mahibalo hangtod nga miabòt ang lunop ug mibanlas sa tanan, mao usab unya ang pag-abot sa Anak sa Tawo. Unya, adunay duha ka tawo nga atoa sa umahan, ang usa sakmiton ug ang usà mahibilin. Duha ka babaye maggaling sa galingan, ang usa sakmiton ug ang usà mahibilin.

"Busa pagtukaw kamo, kay wala kamo mahibalo unsang adlawa moabot ang inyong Ginoo. Apan hibalo-i ninyo kini nga kon nahibalo pa lamang ang tagbalay unsang taknaa sa kagabhion moabot ang kawatan, magtukaw gayod unta siya ug dili motugot nga lungkabon ang iyang panimalay. Tungòd niini, kamo usab kinahanglan nga andam, tungod kay sa takna nga walâ ninyo palandonga moabot ang. Anak sa Tawo."

Ang Ebanghelyo sa Ginoo.

Katilingbanong Pag-ampo

Nobiyembre 27, 2022

Pari: Ang Ginoo moabot gayud sumala sa iyang gisaad. Ipadangat nato karon ngadto kaniya ang atong mga pag-ampo ug mga panginahanglan. Kita moingon:

GINOO, DUNGGA ANG AMONG PAG-AMPO

1. Alang sa mga pangulo sa Simbahan, dasigon unta sila kanunay sa Dios aron mahimo silang mga saksi sa kinabuhing Kristohanon nga malaumong nagpaabot sa Ginoo. Mag-ampo kita.

2. Alang sa mga opisyales sa atong gobiyerno, giyahan unta sila kanunay sa Dios, aron ang ilang mga plano ug buhat mahisubay sa kabubut-on sa Ginoo. Mag-ampo kita.

3. Alang sa mga kabus ug mga masakiton nga niining panahon sa Adbiyento, hatagan sila sa Dios og kadasig ug paglaum, nga taliwala sa ilang kasinatian malig-on ang ilang pagtoo. Mag-ampo kita.

4. Alang sa mga mapasalamaton sa Ginoo, hilabina nila,________________ panalipdan ug panalanginan kanunay sa Dios, Mag-ampo kita.

5. Alang sa atong kaigsoonan nga nangamatay, hilabina sa kalag nila, _______________ gantihan na unta sa Dios sa kinabuhing tunhay. Mag-ampo kita.

Pari: Langitnong Amahan, wala kami'y laing kadangpan gawas kanimo. Nangamuyo kami nga hatagan mo kami sa mga panalangin nga angay kanamo. Kini among gipangayo pinaagi ni Cristo among Ginoo. Amen.