30th Sunday in Ordinary Time

IKA-KATLOAN NGA DOMINGO SA ORDINARYONG PANAHON

PASIUNA 

OCTOBER 22, 2022

Maayong buntag /hapon mga igsoon diha ni Kristo.

Ania na kita sa Ikakatloan nga Domingo sa Ordinaryong Panahon.

Gisaulog usab nato karon ang World Mission Sunday, diin sulod niining Santos nga Misa atong iapil sa atong mga pag-ampo ang tanang mga misyonero.

Ang unang pagbasa gikan sa Basahon ni Sirac. Siya nagkanayon. "Ang pag-ampo sa usa ka tawo nga mapaubsanon mosaylo sa mga panganod."

Ang ikaduhang pagbasa gikan sa ikaduhang sulat ni San Pablo ngadto kang Timoteo. Siya mipadayag, giampingan ko ang akong pagtoo. Ug karon gitagana alang kanako ang ganti sa kadaogan."

Ug ang ebanghelyo gikan sa ebanghelyo sumala ni San Lucas. Kini mahitungod sa sambingay sa pag-ampo sa Pariseo ug kubrador sa buhis."

Palihug manindog ang tanan alang sa pagsugod sa Santos nga Eyukaristiya.

BASAHON I

Sir. 35:12b-14, 16-17

KINUTLO GIKAN SA BASAHON NI SIRAC

Ang Ginoo makiangayon ug dili siya magpakita og pinalabi. Wala siya magbaton og daang panghukom batok sa kabus; kon may usa ka tawo nga mag ampo nga siya gilupigan, ang Ginoo mamati kaniya. Kon ang mga ilo ug mga biyuda mag-ampo, sila iyang tagdon.

Alagari nga mahinangpon ang Ginoo ug dawaton ka niya; ang imong mga pag ampo moabot hangtod sa kapanganoran. Ang pag-ampo sa usa ka tawo nga mapaubsanon mosaylo sa mga panganod ug magpadayon pagsaka hangtod moabot sa Ginoo nga Labing Halangdon, diin magpabilin kini hangtod iyang tubagon pinaagi sa paghimo nga ang hustisya matuman ug nga ang sad-an silotan.

ANG PULONG SA GINOO.

SALMO RESPONSORYO 

Ps. 34:2-3, 17-18, 19, 23

R. Ang Ginoo nagpatalinghug sa singgit sa kabus.

Daygon ko ang Ginoo sa tanang panahon; ang iyang kadayganan maania kanunay sa akong ba-ba. Maghimaya ang akong kalag diha sa Ginoo; makabati kanako ang mapaubsanon ug malipay.

R. Ang Ginoo nagpatalinghug sa singgit sa kabus.

Ang Ginoo nakigharong sa mga nagbuhat og dautan, aron mapapas ang ilang handomanan dinhi sa yuta.

Sa pagtuwaw sa matarong nagapatalinghug kanila ang Ginoo, ug sa tanan nilang mga kalisdanan giluwas niya sila. 

R. Ang Ginoo nagpatalinghug sa singgit sa kabus.

Ang Ginoo haduol sa mahinulsolon og kasingkasing; ug luwason niya ang mga naguol. Luwason sa Ginoo ang kinabuhi sa iyang mga sulugoon; walay makasala kanila nga modangop kaniya.

R. Ang Ginoo nagpatalinghug sa singgit sa kabus.

BASAHON II

2 Tm. 4:6-8, 16-18

KINUTLO GIKAN SA IKADUHANG SULAT NI SAN PABLO NGADTO KANG TIMOTEO

Bahin kanako, miabot na ang takna iula ang akong dugo; panahon na nga nga mobiya ako niining kinabuhia. Gihimo ko kutob sa akong maabot ang pagpakig lumba, ug natapus ko gayod kini; giampingan ko ang akong pagtuo. Ug karon gitagana alang kanako ang ganti sa kadaogan, ang purongpurong sa pagkamatarong nga niadto unyang adlawa iganti kanako sa Ginoo, ang matarong nga Maghuhukom ug dili kanako lamang kondili sa tanan gayod nga nagpaabot sa iyang pagpadayag.

Sa una kong pag-atubang sa hukmanan, wala gayoy mibulig kanako; gitalikdan ako sa tanan. Hinaut unta nga dili sila pakasad-on sa Dios niini. Apan ang Ginoo miunong kanako ug mihatag kanakog kusog aron ikasangyaw ko ang tibuok mensahe ngadto sa mga dili Judio, ug giluwas ako gikan sa baba sa liyon. Ug luwason ako sa Ginoo gikan sa tanang kadaotan ug dad-on ngadto sa iyang langitnong Gingharian. Kaniya ang himaya hangtod sa kahangturan. Amen.

ANG PULONG SA GINOO. 

EBANGHELYO

Lukas 18:9-14

Kinutlo gikan sa Ebanghelyo sumala ni Lucas

Ug misugilon usab siya niining sambingaya ngadto sa pipila nga nagtuo nga sila mga matarong ug nagtamay sa ubàn.

"Adunay duha ka mga tawo nga mitungas ngadto sa templo aron pag-ampo; Pariseo ang usà ug ang usà kobrador sa buhis.

Ang Pariseo nagtindog ug nag-ampo sa ingon ngadto sa iyang kaugalingon, 'O Dios, nagapasalamat ako kanimo nga dili akò sama sa ubang mga tawo - kawatan, daotan, mananapaw - o gani sama niining kobrador sa buhis.

Nagpuasa akò kaduha sa usa ka semana, nagahatag akò og ikanapulo sa tanan nakong abòt. Apan ang kobrador sa buhis nagtindog sa halayo, dili gani buòt moyahat sa mga mata ngadto sa langit, apan nagpunay og nagpamukpok sa iyang dughan nga nagaingon,

'O Dios, kaloy-i intawon akò nga makasasálâ.

Sultihan ko kamo, nga kining tawhana miuli ngadto sa iyang balay nga gipakamatarong, kaysa niadtong usà; kay ang tanan nga magpataas sa ilang kaugalingon ipaubos, apan ang magpaubòs sa iyang kaugalingon ipataàs."

Ang Ebanghelyo sa Ginoo.

PANGALIYA 

OCTOBER 22, 2022

PARI: Mga igsoon, mag-ampo kita sa Dios Amahan, kinsa naminaw sa mga pagtuwaw sa kabus. Sa matag pag-ampo moingon kita.

GINOO, PATALINGHUGI, NANGAMUYO KAMI KANIMO.

1. Alang sa tibuok Simbahan ug sa tanang mga misyonero, nga ang grasya sa Dios ilang maangkon aron lig-on sila kanunay sa pagsangyaw sa Maayong Balita ngadto sa Katawhan. Mag-ampo kita.

2. Alang sa mga pangulo sa kanasuran, nga ang lamdag sa Espiritu Santo ilang madawat aron ang ilang mga plano ug buhat magdalag kalamboan sa katilingban. Mag-ampo kita.

3. Alang sa mga masakiton, mga tigulang ug mga kabus, ayohon ug panalanginan unta sila sa Dios. Mag-ampo kita.

4. Alang sa mga nagpasalamat ngadto sa Ginoo hilabina nila _________ madawat pa unta og dugang nga grasya diha sa ilang mga paningkamot. Mag-ampo kita.

5. Alang sa mga kalag nila ________ dawaton na unta sa Ginoo sa iyang langitnong gingharian. Mag-ampo kita.

PARI: Langitnong Amahan, nagpasalamat ug misalig kami kanimo nga imo untang hatagan ug katumanan ang among mga pag ampo, pinaagi ni Kristo among Ginoo, Amen.