29th Sunday in Ordinary Time

IKAKAWHAAG SIYAM NGA DOMINGO SA ORDINAYONG PANAHON

BASAHON I

Ex. 17:8-13

KINUTLO GIKAN SA BASAHON SA EXODO

Misulong ang mga Amalekanhon sa mga Israelita didto sa Repidim. Si Moises miingon kang Josue, "Pagpilig pipila ka tawo ug pakig-away kamo ugma sa mga Amalekanhon. Magbarog ako sa tumoy sa bungtod nga maggunit sa sungkod nga gihatag sa Dios kanako." Gituman ni Josue ang gisugo ni Moises kaniya ug nakig-away sila sa mga Amalekanhon, samtang si Moises, si Aaron ug si Hur miadto sa tumoy sa bungtod. Samtang giisa pa ni Moises ang iyang mga bukton, nagpadayon ang pagdaog sa mga Israelita, apan kon ipaubos niya ang iyang mga bukton modaog usab ang mga Amalekanhon. Sa dihang gikapuyan na ang mga bukton ni Moises, si Aaron ug si Hur nagkuhag bato aron palingkoran ni Moises. Milingkod si Moises samtang si Aaron ug si Hur nagbarog tupad kaniya aron pagsagang sa iyang mga bukton. Gigunitan nila kini hangtod sa pagsalop sa adlaw, ug gibuntog ni Josue sa hingpit ang mga Amalekanhon.

ANG PULONG SA GINOO.

SALMO RESPONSORYO

Ps. 121:1-2, 3-4, 5-6, 7-8

R. Ang atong hinabang gikan sa Ginoo nga nagabuhat sa langit ug sa yuta.

Giyahat ko ang akong mga mata ngadto sa kabukiran; asa man maggikan ang hinabang alang kanato?

Ang akong hinabang gikan sa Ginoo, nga nagbuhat sa langit ug sa yuta. 

R. Ang atong hinabang gikan sa Ginoo nga nagabuhat sa langit ug sa yuta.

Dili unta siya motugot nga ikaw madakin-as dili unta siya makatagpilaw nga nagabantay kanimo. Sa tinuoray wala siya matagpilaw ni matulog, ang magbalantay sa Israel.

R. Ang atong hinabang gikan sa Ginoo nga nagabuhat sa langit ug sa yuta.

Ang Ginoo mao ang imong magbalantay; ang Ginoo mao ang imong

panalipod; tupad siya kanimo sa imong kamut

nga tuo.

Ang adlaw dili makadaut kanimo sa adlaw, ni ang bulan sa gabii.

R. Ang atong hinabang gikan sa Ginoo nga nagabuhat sa langit ug sa yuta. 

Ang Ginoo magbantay kanimo sa tanang dautan; magbantay siya sa imong kinabuhi.

Ang Ginoo magbantay sa imong pag-abot ug sa imong paggikan, karon ug hangtod sa kahangturan.

R. Ang atong hinabang gikan sa Ginoo nga nagabuhat sa langit ug sa yuta.

BASAHON II

2 Tm. 3:14- 4:2

KINUTLO GIKAN SA IKADUHANG SULAT NI SAN PABLO NGADTO KANG TIMOTEO

Apan ikaw, pabilin diha sa mga kamatuoran nga gitudlo ko kanimo ug hugot mong gituohan. Kay nakaila ka man sa nagtudlo kanimo niini, ug nasayod ka nga sukad pa sa imongpagkabata nagbasa ka na sa Balaang Kasulatan nga arang makahatag kanimog kaalam nga maghatod ngadto sa kaluwasan pinaagi sa pagtuo kang Cristo Jesus. Ang tibuok Kasulatan gisulat uban sa lamdag gikan sa Dios ug mapuslanon kini alang sa pagtudlo sa kamatuoran, sa pagbadlong, sa pagsaway, ug sa pagtudlo unsaon pagkinabuhig matarong, aron ang nag alagad sa Dios masangkap pag-ayo ug maandam sa tanang maayong buhat.

Awhagon ko ikaw atubangan sa Dios ug ni Cristo Jesus nga maoy maghukom sa tanang tawo, buhi kon patay, nga tungod kay mobalik man siya ug tungod sa iyang Gingharian, pagkugi kanunay pagwali sa mensahe. Daniha, badlonga, dasiga ug tudloi nga mapailubon ang mga tawo.

ANG PULONG SA GINOO.

EBANGHELYO

Kinutlo gikan sa Ebanghelyo sumala ni Lucas 18:1-8

Ug misugilon siya kanila og sambingay mahitungod sa panginahanglan nga sila mag-ampo kanunay ug dili mawad-an og kadasig.

Miingon siya, "Dihay usa ka maghuhukom sa usa ka lungsod nga walay kahadlok sa Dios ni pagtahod sa tawo. Ug dihay balo niadtong lungsora ug nagpunay og adto kaniya nga nagaingon, 'Labani ang akong katungod batok sa akong kaatbang? Ug nagdumili siya sa taas nga panahon.

Apan sa kadugayan, miingon siya sa iyang kaugalingon, 'Bisan pa og wala akoy kahadlok sa Dios ni pagtahod sa tawo, apan tungod kay gisamoksamok akò niining maong balo, labanan ko ang iyang katungòd

kondili mabun-og akò sa iyang pagpunay og balik." Ug miingon ang Ginoo, "Pamati kamo unsay gisulti sa daotang maghuhukom. Ug dili ba diay molaban ang Dios sa iyang mga pinili nga nagtukaw kaniya adlaw ug gabii? Ug maglangan ba siya pagtubag kanila?

Nagaingon ako kaninyo nga magdali siya paglaban kanila. Luyo niining tanan, inig-abòt sa Anak sa Tawo, makakaplag kaha siya og pagtúo dinhi sa yuta?"

Ang Ebanghelyo sa Ginoo.