KASAULOGAN SA PULONG

IKA-KAWHAA'G PITO NGA DOMINGGO

a. UNANG BASAHON Habacuc 

1:2-3, 2:2-4

Ang pagbasa gikuha gikan sa basahon ni Propeta Habacuc.

O Ginoo, kanus-a pa ba nimo patalinghogi ang pagpakitabang ko kanimo? Mituaw ako kanimo sa pag ingon, "Gidaogdaog ako!" apan wala mo ako luwasa. Nganong kadaut ug kasamok man ang gipakita mo kanako? Kanunay'ng makita ko ang pinatyanay, ang kagubot ug panagbingkil.

Unya mitubag kanako ang Ginoo sa pag-ingon: "Isulat ang panan-awon sa tataw kaayo diha sa mga papan aron makalikay ang makabasa niini. Kay may panahon nga gitagal alang sa katumanan sa panan-awon ug mahitabo gayud kini. Busa bisa'g ingon og dugay kining matuman, paabota lang. Ug mao kini ang mensahe, `Kadtong mga dautan dili mabuhi, apan ang mga matarong mabuhi kay matinumanon man sila sa Dios!"

Mga igsoon, ang Pulong sa Ginoo.

b. SALMO RESPONSORYO

Salmo 95:1-2,6-7,8-9

Tubag (R)-Kun karon makadungog kamo sa iyang tingog, ayaw gahi-a ang inyong mga kasingkasing.

Umari kamo, awitan ta nga malipayon ang Ginoo; ilhon ta ang Bato sa atong kaluwasan. Yukboan ta siya uban sa pasalamat; awitan ta siya nga malipayon og mga salmo. (R)

Umari kamo, moduko kita aron pagsimba kaniya; mangluhod kita sa atubangan sa Ginoo nga nagbuhat kanato. Kay siya man ang atong Dios ug kita ang katawhan nga iyang gidumala, ang panon nga iyang gitultolan. (R)

Hinaut unta nga karon mamati kamo sa iyang tingog, "ayaw patig-aha ang inyong mga kasingkasing sama didto sa Meriba, sama sa adlaw ni Massah didto sa kamingawan. Diin gisulayan ako sa inyong mga katigulangan; ila akong gisuta bisa'g nakakita sila sa akong mga buhat. (R)

c. IKADUHANG BASAHON

2 Timoteo 1:6-8, 13-14

Ang pagbasa gikuha gikan sa ikaduhang sulat ni San Pablo ngadto kang Timoteo.

Tungod niini, pahinumduman ko ikaw sa paggamit sa gasa nga gihatag sa Dios kanimo sa dihang gipandongan ko ikaw sa akong mga kamot. Kay ang Espiritu nga gihatag sa Dios kanato dili espiritu sa katalaw, kondili Espiritu sa gahum ug gugma ug pagpugong sa kaugalingon.

Busa ayaw kaulaw sa pagsaksi sa atong Ginoo, ug kanako nga iyang binilanggo. Hinonoa, pakig-ambit sa mga pag-antus tungod sa Maayong Balita, sumala sa kusog nga ihatag sa Dios kanimo.

Sunda nga panig-ingnan ang matuod nga mga pagtulon an nga gitudlo ko kanimo, ug pabilin diha sa pagtoo ug gugma nga naato sa atong pagkahiusa kang Kristo Jesus. Ampingi ang maayong mga butang nga gipiyal kanimo pinaagi sa gahum sa Espiritu Santo nga nagpuyo dinhi kanato.

Mga igsoon, ang Pulong sa Ginoo.

d. EBANGHELYO

Lucas 17:5-10

Ang pagsangyaw sa Maayong Balita sumala ni San Lucas.

Ang mga apostoles miingon sa Ginoo, "Dugangi ang among pagtoo." Ug ang Ginoo mitubag, "Kon duna kamoy pagtoo nga ingon kadako sa liso sa mustasa makasugo kamo sa kahoy nga sikomoro, `Maluka ka ug balhin ngadto sa dagat!' ug kini motuman kaninyo. Pananglitan adunay usa kaninyo nga may sulugoon nga nagdaro o nag-atiman sa mga karnero. Inig-abot niya gikan sa uma, ingnon ba nimo siya, `Pagdali diha aron mokaon ka.' Ang usa ka sulugoon dili angayang pasalamatan tungod sa iyang pagtuman sa sugo, dili ba?

Mao usab kamo; kun nakabuhat na kamo sa tanan nga gisugo kaninyo, ingna ninyo, Mga sulugoon kami ug nagbuhat lamang sa among katungdanan.""

Mga igsoon, ang Maayong Balita sa atong Ginoo.

e. KOMENTAYO

Tema: Ang Suluguon nga Malipayon

Daghan sa atong mga higala ug mga kaila nga milangyaw sa ubang nasud aron sa pagpanarbaho. Gani ang uban kanila miyembro sa atong pamilya ug mga mahal sa kinabuhi. Sa panahon karon daghan kanato ang adunay katabang sa balay nga maoy tigluto, tiglaba, tigplantsa, tighugas ug uban pa.

Dili lalim ang kinabuhi sa usa ka sulugoon, ilabina kon makatunong ka og amo nga estrikto ug maot og batasan. Hinuon aduna may katabang usab nga mapahimuslanon. May agalon usab nga ang pagtagad sa ilang katabang daw kauban sa banay.

Sa atong Ebanghelyo karon gitandi ni Jesus ang magtutuo sa usa ka suluguon. Ang suluguon nga walay katungod sa pagpahulay samtang aduna pay buluhaton sa balay. Bisan pagkahuman sa tanan niyang buluhaton makaingon pa man siya sa iyang kaugalingon nga: "Mga ulipon kami nga dili takus; nagbuhat lamang kami sa angay namong buhaton".

Kini wala nagpasabot nga dili makapahimuot sa Ginoo ang tumutuo. Ni nagpasabot kini nga ang tawo walay kapuslanan, nga kawang lamang ang tanan niyang panlimbasog. Pagpaubos ang gipasabot ug gitagaan og pagtagad niining mga pagbasa. Ang magpaubos moila nga ang tanang kaayohan nga iyang nadawat o nahimo nagagikan sa Dios, mapasalamaton siya ug madasigong nagpuyo sa kasamtangan.

Ang mapaubsanon nasayod nga bisan og unsay iyang himoon, dili gayod niya mabaslan ang Dios. Nasayod siya nga taliwala sa iyang kahuyang ug kakulangan, pinili ug pinangga gihapon siya sa Ginoo. Tungod niini gaan ang iyang pamati ug siya malipayon. Sa ato pa, nag-agad ang tanan sa Dios. Ang panlimbasog sa Kristiyano, magdala sa pagtuo ug malinawon nga kinabuhi.

Ang pagbuhat sa atong tahas usa ka hagit natong tanan. Sayod kita nga ang mga ginikanan dili lalim ang magpadako ug mag-atiman og bata. Dili lalim sa batan-on ang mag-alagad sa simbahan ug magpuyo subay sa balaod sa Dios. Dili lalim ang magpabiling putli ug magpabiling matinud anon sa mga saad sa kaminyoon o sa ordinasyon. Dili sayon ang pagtukod og usa ka katilingban nga makiangayon ug makatarunganon.

Apan malaumon kita kay ang Ginoo maoy atong Amo. Diha sa pag-apil sa Misa una mangalawat kita moingon, "Ginoo, dili ako angay nga mokalawat kanimo apan ipamulong Mo lamang og mamaayo ako". Kon atong hinumduman ang sambingay sa anak nga nawala, sa dihang nakaamgo siya nga maayo nga mouli siya sa ilaha human sa iyang pagpakasala, paghurot sa iyang kwarta sa bisyo siya miingon; "Tay, nakasala ako batok sa langit ug batok kanimo, dili na ako takus nga pagatawgon nga imong anak; himoa ako sama sa imong usa sa imong sinuhulan." Ang mga "TIG" dili takos uyamot apan imo gihapon nga gipili ug gipangga.

Sa katapusan makaingon kita nga ang

tanan Iya sa Ginoo. Ang kalipay sa pag-alagad

dili kabayran og kwarta. Kini makab-ot sa tawo

nga kahibalo mopaubos ug nagtuo sa Dios ug ang iyang pagbuhat sumala sa kabubut-on sa Dios.

"Dios lang, igo na."

Mga igsoon ko diha ni Kristo, kumusta man ang atong relasyon sa Ginoo, sa katilingban ug sa kaugalingon, ato ba kining gialagaran o ato na bang napasagdan? Gaan ang buluhaton, kon maayo ang relasyon. Ang katilingban alagaran kay kita managsoon man. Kaugalingon ampingan aron mabulahan ang tanan sa atong mga tabang. Busa mag-ampo kita kanunay aron ang relasyon sa Ginoo anaa kanunay nga lig-on ug tunhay.

Giya alang sa Pamalandong:

1. Matinud-anon ba ako nga mituman sa kabubut-on sa Dios diha sa pag-alagad sa akong isigkatawo?

2. Diha sa akong pagkasumusunod ni Kristo malipayon ba akong nagsangyaw sa dakung gugma sa Amahan sa tanang katawhan?

f. PANGALIYA

Pangulo:

Uban sa dakung pagtoo, atong ihalad sa atong Makagagahum nga Dios ang atong mga pag-ampo ug panginahanglan. Sa matag pangamuyo kita moingon: DUNGGA ANG AMONG PAG-AMPO O DIOS.

1. Alang sa tanang nagdumala sa Simbahan nga sila mamahimo nga mga buhing saksi omin sa kalooy ug gugma ni Kristo sa tanang katawhan. Mag-ampo kita.

2. Alang sa tanang lideres sa kanasuran nga ilang mahatagan og dakung bili ang mga suliran nga gisagubang sa bagang panon sa katawhan tungod sa kawad-on ug walay klaro nga panginabuhian. Mag-ampo kita.

3. Alang sa mga Kristohanong banay nga mogahin og panahon sa pagpakighiusa sa Ginoo diha sa makanunayon nga pag ampo. Mag-ampo kita.

4. Alang sa nagmasakiton nga makasinati sila sa kalooy ug gugma sa Dios pinaagi sa mga instrumento nga mihatag sa ilang panahon ug bahandi aron matubag ang ilang mga panginahanglan. Mag-ampo kita.

5. Alang sa atong mga igsoon nga nag-una na kanato niining kalibutan sa mga buhi nga ila nang maangkon ang kinabuhing dayon. Mag-ampo kita.

6. Alang sa atong personal nga katuyuan, ato kining ihalad sa Dios diha sa kahilum.

Pangulo: Mahigugmaon nga Dios, Kanimo among gisalig ang among mga panginahanglan nga among gihalad karon. Itugot nga uban sa Imong walay puas nga kalooy among matagamtaman ang kalinaw pinaagi ni Kristo among Ginoo. Amen.