KASAULOGAN SA PULONG

IKA-KAWHAA'G UNOM NGA DOMINGGO

a. UNANG BASAHON

Amos 6:1,4-7

Ang pagbasa gikuha gikan sa basahon ni Amos.

Alaot gayud kamo nga nagpuyo nga haruhay diha sa Sion, ug kamo nga nagtoo nga halayo kamo sa kakuyaw diha sa bukid sa Samaria-kamong mga dagkong tawo sa nasud sa Israel, nga maoy dangpanan sa mga tawo. Alaot gayud kamo nga naghigda sa mga mahalon nga mga katre, ug naghay-adhay-ad sa inyong mga kama, ug nagkaon sa karne sa mga nating baka ug nating karnero. Gusto kamong magtagik og mga awit, sama sa gihimo ni David, ug magtugtog sa mga alpa. Nagpatuyang kamo'g inom og bino, ug gidihog ninyo ang inyong kaugalingon sa labing maayo nga lana, apan wala kamo magbangotan sa pagkalaglag sa Israel. Busa kamo maoy unang mabihag, ug ang inyong mga pista ug mga kombira matapos.

Mga igsoon, ang Pulong sa Ginoo.

b. SALMO RESPONSORYO

Salmo 146:8-9,10

Tubag (R)-Dayega ang Ginoo, kalag ko.

Bulahan siya nga matinumanon hangtud sa kahangturan; nga nagapadangat sa katarong alang sa gidaugdaug, nagahatag og pagkaon sa gigutom. Ang Ginoo nagahatag og kagawasan sa mga bihag. (R)

Ang Ginoo nagahatag og pagtan-aw sa buta, Ang Ginoo nagabangon kanila nga nahilukapa; ang Ginoo nahigugma sa matarong, ang Ginoo nanalipod sa mga langyaw. (R)

lyang gibuhi ang mga ilo ug ang balo apan iyang gibalo ang paagi sa dautan. Ang Ginoo maghari hangtud sa kahangturan; ang imong Dios, O Sion, latas sa tanang kaliwatan. Aleluya. (R)

c. IKADUHANG BASAHON

1 Timoteo 6:11-16

Ang pagbasa gikuha gikan sa unang sulat ni San Pablo ngadto kang Timoteo.

Apan kay ikaw iya man sa Dios, likayi kining tanan. Paningkamoti nga mahimo kang matarong, diosnon, may pagtoo, may paghigugma, mainantuson ug maaghop. Paningkamoti kutob sa imong mahimo nga makadaog ka sa bugno sa pagtoo ug makadawat sa ganti nga mao ang kinabuhing walay katapusan; kay gitawag ka man sa Dios alang sa maong kinabuhi sa pagsugid mo sa imong pagtoo atubangan sa daghang mga saksi. Atubangan sa Dios nga maoy naghatag og kinabuhi sa tanan, ug atubangan ni Kristo Jesus nga misaksi sa kamatuoran atubangan ni Poncio Pilato, gisugo ko ikaw pagtuman sa tanan nga gipabuhat kanimo.

Ug matngoni nga dili kini kabulingan ug dili masaway hangtud sa pagbalik sa atong Ginoong Jesukristo. Ang iyang pagpadayag himoon sa Dios sa hustong panahon, ang Dios nga dalaygon ug bugtong Magbubuhat, ang Hari sa mga hari ug ang Ginoo sa mga Ginoo. Siya lamang ang walay kamatayon ug nagpuyo sa kahayag nga dili maduol. Wala pa gayoy nakakita kaniya ug wala gayoy makakita kaniya. Ipahinungod kaniya ang dungog ug walay katapusang gahum! Amen.

Mga igsoon, ang Pulong sa Ginoo.

d. EBANGHELYO

Lucas 16:19-31

Ang pagsangyaw sa Maayong Balita sumala ni San Lucas.

Si Jesus miingon sa mga Pariseo, "May usa ka dato nga nagsul-ob sa labing mahal nga bisti ug nagpuyo nga luho kaayo. May usa usab ka kabus nga gihinganla'g Lazaro, kansang lawas nalukop sa mga nuka, ug pagadad-on siya ngadto sa pultahan sa balay sa dato, basin na lang makakaon siya sa mga mumho nga mangatagak gikan sa lamisa sa dato. Ug bisan ang mga iro manuol ug motilap sa iyang mga nuka. Unya namatay si Lazaro ug gidala sa mga anghel ngadto sa kiliran ni Abraham, didto sa kombira sa langit; ang dato usab namatay ug gilubong, ug nag-antus pag-ayo didto sa Hades. Unya miyahat siya ug iyang nakita si Abraham didto sa layo, ug si Lazaro sa tupad niya. Busa misinggit siya ngadto kang Abraham, 'Amahan! Kaloy-i intawon ako, ug ipadala si Lazaro diri aron itunlob ang iyang tudlo sa tubig ug pabugnawan ang akong dila, kay nag-antus ako pag-ayo sa kainit niining kalayo!' Apan si Abraham mitubag, 'Anak, hinumdumi nga sa didto ka pa sa kalibutan, nabuhong ka sa tanang maayong butang, samtang si Lazaro lunlon lamang dautan ang nahiagoman. Apan karon malipayon na siya dinhi, samtang ikaw diha nag-antus. Gawas pa niana, anaay lawom nga bung-aw nga nag-ulang kanato, aron kadtong buot motabok nganha kanimo gikan dinhi dili makahimo, ni ang anaa diha makatabok nganhi kanamo.' Ang dato mitubag, 'Kun mao kana, Amahan, hangyoon ko ikaw nga imo untang ipadala si Lazaro ngadto sa amo, diin ako may lima ka igsoong lalaki. Paadtoa siya aron sila kapasidan-an ug dili mahianhi niining dapit sa kasakitan.' Si Abraham miingon, 'Atua didto si Moises ug ang mga propeta nga magpasidaan kanila; sila nay mahibalo sa pagpamati sa ilang isulti.' Ang dato mitubag,"Apan Amahan, kana dili pa igo! Kun adunay mabanhaw ug moadto kanila, mamiya gayud sila sa ilang mga sala.' Apan miingon si Abraham, 'Kun dili sila mamati kang Moises ug sa mga propeta, dili gayud sila makabig bisan pa'g may mabanhaw."

Mga igsoon, ang Maayong Balita sa atong Ginoo.

e. KOMENTARYO

Tema: Ang Sambingay sa Datu nga Tawo ug ni Lazaro

Usa sa mga apostolado sa seminaryo kada Dominggo mao ang pag-adto sa Missionary of Charity diin, mahimamat nila ang mga tigulang nga masakiton nga kinahanglan nga hatagan og pagtagad. Didto nakita nila kung giunsa pag atiman sa mga madre ang mga masakiton ug giunsa kini nila pagpangga. Ilang gipakaon ug gialagaran ug ilang gitambalan pinaagi sa tabang sa mga layko nga nagasuporta kanila. Samtang ang mga seminarista mitabang kanila sa mga buluhaton sama sa paglaba sa mga hinubuan sa mga pasyente, paghatag og katesismo ug pag andam sa ilang paniudto. Naluoy sila pag-ayo kanila labi na kadtong mga gipasagdan sa ilang mga pamilya tungod sa ilang mga sakit ug kahimtang. Usahay dili nila mapugngan ang ilang luha tungod kay usa sa mga seminarista nahinumduman pa niya ang iyang pinanggang lola nga mipanaw na.

Ang atong Ebanghelyo karon naglarawan pagbalik sa kapalaran ni Lazaro ug sa tawong adunahan nga gitudlo ni Jesus diha sa wali sa kapatagan. Si Lazaro usa ka tawo nga kabus nga napuno sa nuka nga naglubog didto sa ganghaan sa adunahan nga si Dives nga bisag kausa wala gayud niya tawga si Lazaro sa iyang ngalan. Nagpaabot lang intawon ang kabus nga adunay matagak nga mumho gikan sa kan-anan sa adunahan. Apan miabot ang panahon namatay silang duha. Si Lazaro gidala siya sa mga anghel ngadto sa sabakan ni Abraham. Samtang ang adunahan nga si Dives naadto ngadto sa Hides ug nag-antus pag-ayo sa kalisud sa iyang kahimtang.

Ang sambingay ni Jesus nagpunting sa usa ka punto nga mao ang pagbaliwala sa mga tawong kabus, sama sa gibuhat ni Dives kang Lazaro nga iya lang gipasagdan sa iyang ganghaan. Wala man lamang niya pasudla, pakan-a ug atimana si Lazaro nga klaro man kaayo nga nagkinahanglan kini og tabang. Wala may nabuhat nga laing dautan si Dives nga sukwahi sa pagtulun-an sa Hudeyo gawas sa kahimtang ni Lazaro.

Sa atong katilingban karon, usahay naa kanato ang kinaiya sa usa ka adunahan sa Ebanghelyo nga si Dives. Usahay baliwalaon lang nato ang mga tawo nga nagkinahanglan sa atong tabang ilabina kadtong mga kabus. Usahay mahadlok kita nga motabang tungod kay mahadlok kita nga mahutdan o mawad-an sa atong mga tinigom. Nakalimot kita nga ang mga grasya nga nadawat nato gikan kini sa Ginoo ug kita igo lang gipiyalan niini ug angay kining ipaambit sa uban ilabina gayud kadtong nagkinahanglan.

Busa, atong nakita karon kung giunsa pagpangga sa Ginoo kadtong mga kabus nga pinasagdan ug gidaugdaug. Dako kaayo ang atong tulubagon sa Ginoo kung dili kita kahibalo motabang sa mga nagkinahanglan. Ang pagtabang dili lamang pinaagi sa bahandi apan pinaagi usab sa atong presensya ug pagtagad sa mga kabus. Atong ipabati kanila ang gugma sa Ginoo nga sila wala pasagdi pinaagi sa pag-atiman kanila ug pag ampo kanila. Pangayoon nato karon ang grasya sa Ginoo nga hatagan kita niya og kasingkasing nga puno sa kaluoy ug gugma ilabina ngadto sa mga kabus.

Karon atong pangutan-on ang tagsatagsa nato nga kaugalingon: Pila kahigayon nga akong gibaliwala ang mga kabus sama ni Lazaro nga nahimamat nako sa dalan? Pila ka kabus nga sama ni Lazaro nga akong gibalibaran nga nangayo sa ako og tabang?

Giya alang sa Pamalandong:

1. Ang tanan nga maayong binuhatan dinhi sa kalibutan adunay langit nga sangputanan. Mituo ba ako sa maong saad sa Ginoo?

2. Mapaubsanon ba kita diha pagpakiglambigit sa sa atong mga tawong nanginahanglan sa atong tabang?

f. PANGALIYA

Pangulo: Dios sa gugma ug panabang, sa tumang pagsalig ihalad namo Kanimo ang among mga pag-ampo ug panginahanglan. Sa matag pangamuyo kita motubag: GINOO, DUNGGA ANG AMONG PAG-AMPO.

1. Alang sa mga nangulo sa Simbahan nga sila molahutay ug matinud-anon sa ilang tawag sa pag-alagad alang sa katukuran sa Gingharian dinhi sa kalibutan. Mag ampo kita.

2. Alang sa mga nangulo tanang sa kanasuran, nga ang bahandi nga gipiyal sa Dios kanila ilang atimanon alang sa kabulahanan sa tanan. Mag-ampo kita.

3. Alang tanang kabatan-onan sa nga mabatunan mabatunan nila ang hiyas sa pagkamanggihatagon ug pagkamaalagaron ug andam itahan ang kaugalingon sa pagsulod sa bokasyon sa pagkapari ug pagkarelihiyoso. Mag-ampo kita.

4. Alang sa nagmasakiton natong mga kaigsoonan nga makabaton sila sa hiyas sa pagkamapailubon ug hingpit nga pagsalig sa Dios nga siya ra gayud ang makahatag og kahupayan sa ilang balatian. Mag ampo kita.

5. Alang kanatong tanan nga nakadungog sa mga mensahe sa Dios nga kini motuhop sa atong kasingkasing og mapuy-an ang hagit sa pagkamaalagaron ilabina sa nanginahanglan natong mga igsoon. Mag ampo kita.

6. Alang sa personal natong katuyuan, ato kining ipadayag diha sa kahilum.

Pangulo: Dios nga maloloy-on tabangi kami sa paghatag og dakung bili sa mga grasya nga among pagadawaton subay sa Imong kabubut-on ug tuguti nga amo kining ikapaambit sa among mga igsoon. Kini among gipangayo pinaagi ni Kristo Imong Bugtong Anak uban sa Espiritu Santo Dios nga usa hangtud sa Amen. kahangturan.