KASAULOGAN SA PULONG

IKA-KAWHAA'G UPAT NGA DOMINGGO

a. UNANG BASAHON

Exodo 32:7-11,13-14

Ang pagbasa gikuha gikan sa basahon sa Exodo.

Ang Ginoo miingon kang Moises, "Hala, pagdall'g lugsong, kay ang imong katawhan nga gipagawas mo sa Ehipto nagpakaulaw sa ilang kaugalingon. Dali ra silang mitipas sa dalan nga palaktan ko unta kanila. Naghimo sila og usa ka nating baka sa tinunaw nga bulawan ug nagsimba niini, ug naghalad usab sila'g mga sakripisyo alang niini. Miingon sila, Israel, mao kini ang atong dios nga nagkuha kanato gikan sa Ehipto.""

Ang Ginoo miingon kang Moises, "Nasayod ako nga gahi'g ulo kining maong katawhan. Karon, pasagdi ako aron laglagon ko sila sa nagdilaab kong kasuko. Unya himoon ko ikaw ug ang imong kaliwatan nga usa ka dakong nasud."

Apan si Moises nangaliyupo sa Ginoo nga iyang Dios, ug miingon, "Ginoo, nganong pasilaobon mo man ang imong kasuko batok sa imong katawhan nga giluwas mo gikan sa Ehipto pinaagi sa dako mong gahum? Hinumdumi ang imong mga alagad nga si Abraham, si Isaac, ug si Jacob, ug ang gisaad mo kanila nga gipanumpaan mo sa imong ngalan. Miingon ka kanila, `Pasanayon ko ang inyong kaliwatan sama kadaghan sa mga bitoon. Ihatag ko sa inyong mga kaliwat kining tanang yuta nga akong gisaad ug mapanag-iya nila kini hangtud sa kahangturan.""

Busa wala ipadayon sa Ginoo ang nahunahunaan niya nga buhaton ug wala niya pahamtangi ang iyang katawhan sa katalagman.

Mga igsoon, ang Pulong sa Ginoo.

b. SALMO RESPONSORYO

Salmo 51:3-4,12

13,17,19

Tubag (R)- Motindog ako ug moadto sa akong amahan.

Kaloy-l ako, O Dios, diha sa imong kaayo; sa kadako sa imong kalooy papasa ang akong kalapasan. Hugasi ako'g maayo sa akong kasaypanan ug linisi ako sa akong kasal anan. (R)

Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan ug ayaw kuhaa gikan kanako ang imong balaang espiritu. (R)

O Ginoo, ablihi ang akong mga ngabil, ug ang akong baba magsangyaw sa imong kadayeganan. O Dios, ang akong sakripisyo usa ka espiritu nga mahinulsolon; usa ka kasingkasing nga mahinulsolon ug mapaubsanon. O Dios, dili mo ako tamayon. (R)

c. IKADUHANG BASAHON

1 Timoteo 1:12-17

Ang pagbasa gikuha gikan sa unang sulat ni San Pablo ngadto kang Timoteo.

Nagpasalamat ako kang Kristo Jesus nga atong Ginoo nga naghatag kanako'g kusog alang sa akong buluhaton. Gipasalamatan ko siya kay iya man akong giila nga takos, ug gitudlo aron mag-alagad kaniya, bisan tuod kaniadto siya akong gipanamastamasan, gilutos, ug gibugalbugalan. Apan nalooy ang Dios kanako, kay dili pa man ako magtotoo ug wala ako masayud sa akong gibuhat. Ug gibuboan ako sa atong Ginoo sa iyang naghingaping grasya ug gihatagan ako niya sa pagtoo ug gugma nga naato diha sa pagkahiusa kang Kristo Jesus.

Tinuod ang giingon ug angay dawaton ug tuohan sa hingpit: nga mianhi si Kristo Jesus sa kalibutan aron pagluwas sa mga makasasala. Ako ang labing dautan kanila, apan tungod niini gikaloy-an ako sa Dios, aron ikapadayag ang hingpit nga pailob ni Kristo Jesus sa iyang pagtratar kanako, ang labing dautan sa mga makasasala, ingon nga panig-ingnan alang sa tanan nga motoo unya kaniya ug makadawat sa kinabuhing dayon. Alang sa Harl nga walay katapusan, walay kamatayon ug dili makita, ang bugtong Dios-kaniya ang dungog ug himaya hangtud sa kahangutran! Amen.

Mga igsoon, ang Pulong sa Ginoo.

d. EBANGHELYO

Lucas 15:1-32 o 15:1-10

Ang pagsangyaw sa Maayong Balita sumala ni San Lucas.

Usa niana ka higayon may daghang mga kobrador sa buhis ug mga makasasala nga miadto kang Jesus aron pagpamati kaniya. Unya ang mga Pariseo ug ang mga magtutudlo sa Balaod nagbagulbol nga nag-ingon, "Kining tawhana nag-abi-abi sa mga makasasala ug nakigsalo pa gani kanila!" Tungod niini misugilon kanila si Jesus og usa ka sambingay: "Pananglit usa ka kaninyo may usa ka gatud ka karnero ug nawala ang usa niini, unsa may iyang buhaton? lyang biyaan ang nobenta i-nuybe didto sa sibsibanan, ug pangitaon niya ang nawala nga karnero hangtud nga kini iyang makaplagan. Ug inigkakaplag niya niini, malipay siya pag-ayo ug iya kining pas-anon, ug dad on pagbalik ngadto sa ila.

Unya iyang dapiton ang iyang mga higala ug mga silingan, ug moingon siya kanila, 'Maglipay kita kay akong nakaplagan ang nawala kong karnero!' Sa ingon usab niini, sultihan ko kamo nga mas dako ang kalipay didto sa langit tungod sa usa ka makasasala nga maghinulsol, kay sa nobenta i-nuybe ka tawo nga matarong nga wala magkinahanglan nga maghinulsol." "O pananglit usa ka babaye nga may napulo ka tagsa ka dako kawad-an og usa, unsa may iyang buhaton? Magdagkot siya og suga ug manllhig sa iyang balay, uglya kining pangitaon pag-ayo hangtud makaplagan. Ug inigkakaplag niya niini, tawgon niya ang iyang mga higala ug mga silingan, ug moingon siya kanila, Maglipay kita, kay akong nakaplagan ang nawala kong usa ka dako!' Sa ingon usab niini, sultihan ko kamo nga mangalipay ang mga anghel sa Dios tungod sa usa ka makasasala nga maghinulsol."

SI Jesus mipadayon sa pag-ingon, "Dihay usa ka tawo nga may duha ka anak nga lalaki. Ug usa ka adlaw niana, ang manghod miingon sa iyang amahan, Tay, hatagi na ako sa akong bahin sa katigayonan.' Busa gibahin sa amahan ang katigayonan tali sa duha niya ka anak. Tapos sa pipila ka adlaw, gibaligya sa manghod ang iyang bahin ug milangyaw siya sa layong dapit diin giusikan niya ang iyang salapi sa mga kahilayan, hangtud nga nahurot ang tanan. Unya miabot ang usa ka dakong gutom niadtong dapita, ug gihatod siya ngadto sa pagkawala gayoy nahot. Busa mialagad siya sa usa sa mga molupyo niadtong dapita, ug gipadala siya ngadto sa iyang uma aron pag atiman sa mga baboy. Tungod sa kagutom, buot unta siyang mokaon sa bunga sa kahoy nga gilawog sa mga baboy, apan walay mihatag kaniya. Sa katapusan, nakaamgo siya, Nagsobra ang pagkaon sa tanang sinulohan sa akong amahan, apan ako ania hapit na mamatay sa kagutom! Busa mopahawa ako niining dapita ug mopauli ngadto sa akong amahan ug sultihan ko siya, "Tay, nakasala ako sa Dios ug kanimo. Dili na ako angayang tawgon nga imong anak; isipa na lang ako nga usa sa imong mga sinuholan." Busa milakaw siya ug mipauli ngadto sa iyang amahan. Apan layo pa gani kaayo siya sa ilang balay, nakakita na ang iyang amahan kaniya; nalooy siya sa iyang anak ug midagan siya aron pagtagbo kaniya, ug unya migakos ug mihalok kaniya. Ang anak miingon sa amahan, 'Tay, nakasala ako sa Dios ug kanimo. Dili na ako angayang tawgon nga imong anak." Apan ang amahan mitawag sa iyang mga sulugoon. 'Dalil' mlingon siya, 'Dad-a ngari ang labing maanindot nga bisti ug isul-ob kaniya. Sul-obi usab og singsing ang lyang tudlo ug sapotosi siya! Ug kuhaa ang linaming nga nating baka ug ihawa, kay magkombira kita! Kay kining akong anak, namatay na, apan karon nabuhi; nawala siya, apan karon hikaplagan na.' kombira. Busa gisugdan nila ang

"Niining higayona, didto sa uma ang anak nga magulang. Sa iya nang pagpauli, ug sa diha nga duol na siya sa balay, nabati niya ang huni ug ang panagsayaw. Busa iyang gitawag ang usa sa mga sulugoon ug iyang gipangutana, `Nag-unsa man kamo diha?' Mitubag ang sulugoon, `Ang imong manghod mipauli na ug gipaihaw sa imong amahan ang linaming nga nating baka tungod kay nahiuli na nga maayong lawas ang imong igsoon'. Nasubo pag-ayo ang magulang ug midumili siya pagsulod sa balay. Busa migula ang iyang amahan ug gialam-alaman siya aron mosulod. Apan mitubag siya, Tay, hunahunaa ra god. Sulod sa daghang mga tuig nagsilbi ako kanimo ingon sa usa ka ulipon, ug wala ako makasupak sa imong mga sugo bisan makausa. Apan unsa may imong gihatag kanako? Wala gayod! Bisa'g kanding na lang unta aron maglipay ako uban sa akong mga higala! Apan kanang imong anak nag-usik-usik sa tanan mong katigayonan uban sa mga dautang babaye, ug sa iyang paghiuli imo hinoong giihawan sa linaming nga nating baka!'Ang amahan mitubag, 'Dong, ikaw kanunay uban kanako ug imo ang tanan kong katigayonan. Apan kinahanglan gayud nga magkombira ug maglipay kita, kay ang imong igsoon namatay na, ug karon nabuhi; nawala siya, ug karon hikaplagan na."

Mga igsoon, ang Maayong Balita sa atong Ginoo.

e. KOMENTARYO

Tema: Gipangita sa Ginoo ang mga Nawala

Ang atong mga pagbasa karon naghisgot sa kinaiya sa tawo nga pagkagahig-ulo, pagka reklamador, pagkabuluyagon ug pagkaligoy. Apan sa laing bahin kini usab naghulagway sa kinaiya sa Ginoo nga matuohon, masinabtanon, mapasayloon ug maabi-abihon.

Sa atong unang pagbasa sa libro sa Exodo, naghisgot nga ang kinaiya sa tawo nakapalagot ug nakapasuko sa Ginoo, apan nahikaplagan nato, pinaagi ni Moises nga ang Ginoo dali maluoy ug mopasaylo.

Sa atong ikaduhang pagbasa, si San Pablo naghisgot diha sa iyang unang sulat kang Timoteo, nga bisan luyo sa iyang kahuyang ang Ginoo misalig gihapon kaniya ug nahimo siya nga usa sa mga magsasangyaw sa Maayong Balita. Ang grasya gayod sa Ginoong Jesus ang mitabang kaniya aron niyang makaplagan ang kamatuoran.

Sa atong Ebanghelyo atong nasinati gayod ang kaayo ug kabuotan sa Ginoo nga una nang gilarawan sa atong una ug ikaduhang pagbasa. Gilarawan sa Ebanghelyo ang tulo ka nawala, nawala nga karnero, nawala nga denaryo, ug ang nawala nga anak. Apan sa ato nang nasayran ang Ginoo wala gayod mohunong hinuon Iyang gipangita kining mga nawala ug Iyang gipasaylo ang anak nga nagniligoy.

Sama usab kini sa atong mga kasinatian. Sa daghang higayon kita usab nawala ug nahisalaag tungod sa sala. Sa makadaghan nga higayon kita usab mosimang og dalan palayo sa atong Langitnong Amahan. Apan si Jesus ang Dios nga nagpakatawo, nangita kanato aron kita mahibalik didto sa balay sa Iyang Amahan. Ang hagit kanato mga igsoon nga unta hatagan nato ang atong kaugalingon og panahon ug higayon aron kita makaplagan sa atong Ginoong Jesus. "Let us allow ourselves to be found by our Lord." Ug unta sama sa atong Salmo Responsoryo karon kitang tanan usab moingon, "Motindog ako ug moadto sa akong Langitnong Amahan". Panalanginan unta kitang tanan sa Ginoo.

Giya alang sa Pamalandong:

1. Ang paghigugma sa Dios kanatong mga makasasala walay puas. Mapasalamaton ba kita niining kamatuoran?

2. Gidawat ba nato nga puno sa pagtuo nga ang Dios kanunay naghatag sa panalangin aron maangkon nato ang kabag-ohan?

f. PANGALIYA

Pangulo: Puno sa pagsalig sa atong Langitnon nga Amahan, atong ipadayag Kaniya nang atong mga panginahanglan alang sa inadlaw-adlaw nato nga pagkinabuhi. Sa matag pag-ampo kita motubag: DIOS SA KINABUHI, DUNGGA KAMI.

1. Nga ang Simbahan sa Dios magdala kanunay sa Maayong Balita sa gugma, kalooy, pakig-uli ug kalinaw ngadto sa tanang katawhan. Mag-ampo kita.

2. Nga ang mga nagdumala sa atong Simbahan, makabaton sa hiyas sa pagkamapailubon, mainantuson ug matinud-anon diha sa pagdumala sa mga Sakramento nga gibilin ni Kristo. Mag-ampo kita.

3. Nga ang mga lideres sa tanang kanasuran mohatag og dakung bili sa gasa sa kinabuhi ug sa kinaiyahan nga gipiyal sa Dios kanila, kini atimanon ug palamboon alang sa kabulahanan sa tanan. Mag-ampo kita.

4. Nga ang mga pangulo sa matag Kristohanong katilingban maoy mahimong sumbanan sa ilang kaligdong sa pagtoo ug pagsalig ni Kristo aron mopatigbabaw ang gugma, kalinaw ug panaghiusa. Mag ampo kita.

5. Nga kitang tanan nga nakadungog sa mensahe sa Ebanghelyo motuhop kini sa atong galamhan aron mahimo kitang kongkreto nga mga saksi sa gugma ug pakigdait ni Kristo. Mag-ampo kita.

6. Nga ang atong personal nga katuyuan, ato kining ihalad sa Dios diha sa kahilum.

Pangulo: Mahigugmaong Amahan, amo nang gibungat diha Kanimo ang among mga pag-ampo. Itugot nga pinaagi sa Imong kalooy ug grasya amo na kining maangkon pinaagi ni Kristo Imong Anak uban sa kahiusahan sa Espiritu Santo, Dios hangtud sa kahangturan. Amen.