25th Sunday

Ikakawhaag-lima nga Domingo Sulod sa Tuig

BASAHON I

Am. 8:4-7

KINUTLO GIKAN SA BASAHON NI PROPETA AMOS

Pamati niini, kamong nagtamak sa mga timawa, ug naninguha paglaglag sa mga kabus. Nag-ingon kamo sa inyong kaugalingon, "Dili kami makahulat sa pagkatapus sa balaan nga adlaw aron makapamaligya kami ug mga trigo. Kanus-a man matapus ang Adlawng Igpapahulay aron makabaligya kami sa among trigo? Mahalon nato ang prisyo niini; gamiton ta ang dili hustong taksanan, ug usbon ang timbangan aron paglimbong sa pumapalit. Ibaligya tag mahal ang walay pulos nga trigo. Ug paliton ta ang kabus sa prisyo sa usa ka paris nga sandalyas aron mahimo siyang ulipon."

Ang GINOO, ang Dios sa Israel, nanumpa, "Dili ko gayod hikalimatan ang ilang dautang mga buhat.

ANG PULONG SA GINOO.

SALMO RESPONSORYO

Ps. 113:1-2, 4-6, 7-8

R. Dayga ang Ginoo nga nagabayaw sa kabus.

Dayga, kamong mga sulugoon sa Ginoo, dayga ang ngalan sa Ginoo. Daygon unta ang ngalan sa Ginoo karon ug hangtod sa kahangturan. 

R. Dayga ang Ginoo nga nagabayaw sa kabus.

Labaw sa tanang kanasuran mao ang Ginoo; labaw sa kalangitan ang iyang himaya. Kinsay sama sa Ginoo, atong Dios, nga gipalingkod sa trono sa kahitas-an ug nagadung-aw sa langit ug sa yuta nga anaa sa ubos.

R. Dayga ang Ginoo nga nagabayaw sa kabus.

Gibayaw niya ang ubos gikan sa abog; gikan sa kalapukan iyang gialsa ang kabus.

Aron palingkuron siya uban sa mga kadagkoan, uban sa mga kadagkoan sa iyang lungsod.

R. Dayga ang Ginoo nga nagabayaw sa kabus.

BASAHON II

1 Tm. 2:1-8

KINUTLO GIKAN SA UNANG SULAT NI SAN PABLO NGADTO KANG TIMOTEO

Busa awhagon ko kamo, una sa tanan, nga kinahanglan himoon ang mga pag ampo, mga pangaliyupo ug mga pagpasalamat ngadto sa Dios alang sa tanang tawo, alang sa mga hari ug sa tanang nagmando, aron makabaton kitag mahusay ug malinawong kinabuhi, diosnon ug subay sa hustong pamatasan. Maayo kini ug makapahimuot sa Dios nga atong Manluluwas, nga buot nga maluwas ang tanang tawo ug mahibalo sa kamatuoran. Kay may usa lamang ka Dios ug usa lamang ang naghiusa sa Dios ug sa mga tawo, ang tawo nga si Cristo Jesus, nga mitugyan sa iyang kaugalingon aron pagluwas sa tanang tawo. Kini ang kamatuoran nga luwason sa Dios ang tanang mga tawo sa gitagal nga panahon. Kini ang hinungdan nga gipadala ako nga apostol ug magtutudlo sa mga dili Judio, aron pagsangyaw sa mensahe sa pagtuo ug kamatuoran, ug wala ako magbakak.

Buot ako nga mag-ampo ang mga lalaki sa tanang dapit, mag-ampo nga binayaw ang mga kamut, sa walay kasuko ni panaglalis.

ANG PULONG SA GINOO.

EBANGHELYO

TINAAS

Lk 16:1-13

Kinutlo gikan sa Ebanghelyo sumala ni Lucas

Ug miingon siya ngadto sa mga tinun-an, Dihay tawong adunahan nga adunay piniyalan ug kini gisumbong ngadto kaniya nga nag-usik-usik sa iyang kabtangan. Ug gitawag niya kini ug unya giingnan siya, 'Unsa kining akong nadungog bahin kanimo? Paghatag og husay sa imong pagkapiniyalan kay dili ka na makapadayon sa pagkapiniyalan. Miingon ang piniyalan sa iyang kaugalingon, 'Unsa may akong himoon nga bawion na man sa akong agalon ang akong pagkapiniyalan? Wala akoy kusog mokalot, maulaw akong magpakilimos.

Nasayod na akò kon unsay akong buhaton aron nga sa panahon nga tangtangon ako sa pagkapiniyalan, dawaton akò nila sa ilang mga panimalay' 

"Ug gipatawag niya og binagsa ang mga utangan sa iyang agalon; miingon siya ngadto sa nahiuna, 'Pila may imong giutang sa akong agalon?'

Siya miingon, 'Usa ka gatos ka mga taro sa lana?.Ug siya miingon kaniya, 'Dawata ang imong bale, lingkod dayon, isulat kalim-an?

Unya sa lain miingon siya, 'Ug ikaw, pila man ang imong giutang?'

Ug miingon siya, 'Usa ka gatos ka mga sako sa trigo.' 

Miingon siya kaniya, 'Dawata ang imong bale ug isulat kawaloan.'

Ug gidayeg sa agalon ang tikasan nga piniyalan tungod sa iyang inantigo nga buhat.

"Kay ang mga anak niining panahona

labaw pa ka maantigo sa pagdumala sa ilang mga kaubanan kaysa mga anak sa kahayag.

Ug nagaingon ako kaninyo,

'Pagpakighigala kamo gikan sa tinikas nga bahandi, aron inigkahurot na niini dawaton nila kamo ngadto sa mga puluy-anan nga molungtad.

"Ang matinud-anon sa labing gamay, matinud-anon usab sa labing dako; ug ang dili matarong sa labing gamay dili usab matarong sa labing dako. Busa kon sa tinikas nga bahandi dili kamo mahimong matinud-anon, sa tinuod nga bahandi kinsay mosalig kaninyo? Ug kon sa butang sa ubàn dili kamo mahimong matinud-anon, kinsa may mohatag kaninyo sa inyoha?

"Walay sulugoon nga makaalagad og duha ka agalon; kay kasilagan niya ang usà ug ang lain iyang higugmaon; o mosuod siya sa usà ug ang lain iyang tamayon. Dili kamo makahimo pag-alagad sa Dios ug sa bahandi."

Ang Ebanghelyo sa Ginoo.

MINUBO

Lk 16:10-13

Kinutlo gikan sa Ebanghelyo sumala ni Lucas

Ug miingon siya ngadto sa mga tinunan, tinun-an, "Ang matinud-anon sa labing gamay, matinud-anon usab sa labing dako; ug ang dili matarong sa labing gamay dili usab matarong sa labing dako. Busa kon sa tinikas nga bahandi dili kamo mahimong matinud-anon, sa tinuod nga bahandi kinsay mosalig kaninyo? Walay sulugoon nga makaalagad og duha ka agalon; kay kasilagan niya ang usà ug ang lain iyang higugmaon;

Ug kon sa butang sa ubàn dili kamo mahimong matinud-anon, kinsa may mohatag kaninyo sa inyoha?

o mosuod siya sa usà ug ang lain iyang tamayon. Dili kamo makahimo pag-alagad sa Dios ug sa bahandi.”

Ang Ebanghelyo sa Ginoo.

PASIUNA

SEPTEMBER 18, 2022

Maayong buntag /hapon mga igsoon diha ni Kristo.

Ania na kita sa ikakawhaan ug lima nga domingo sa ordinaryong panahon.

Ang unang pagbasa gikan sa Basahon ni Propeta Amos. Kinsa naglarawan sa plano sa dautang mga tawo."

Ang ikaduhang pagbasa gikan sa unang sulat ni San Pablo ngadto kang Timoteo. Si San Pablo nagdasig sa katawhan sa pag-ampo, pangaliyupo ug pagpasalamat sa Ginoo."

Ug ang Ebanghelyo gikan sa ebanghelyo sumala ni San Lucas. Kini naghisgot sa pagkapiniyalan.

Palihug manindog ang tanan alang sa pagsugod sa Santos na Eyukaristiya.

PANGALIYA

SEPTEMBER 18, 2022

PARI: Mga igsoon, mag-ampo kita sa Dios atong Amahan, kinsa mipiyal kanato niining kalibutan. Kita moingon: GINOO, DUNGGA ANG PAG-AMPO SA IMONG MGA PINIYALAN.

1. Alang sa Simbahan ug sa mga nangulo niini himoon unta sa Dios nga mga maayong piniyalan, aron ang kamatinud-anon ug ang kaputli sa kinabuhi ilang maangkon ug ang ilang pag-alagad magmabungahon. Mag-ampo kita.

2. Alang sa mga nangulo sa atong nasud, himoon unta sila sa Dios nga tinud-od nga mga saksi, sa kaangayan ug kalinaw aron magdala silag kalamboan sa katilingban. Mag-ampo kita.

3. Alang kanatong tanan nga nagsaulog niining Santos nga Eyukaristiya, makaangkon unta ug mga hiyas sa maayong magbalantay aron mahimo kitang instrumento sa kahiusahan sa atong pamilya ug katilingban .Mag-ampo kita.

4. Alang sa atong mga igsoon nga nag-antus sa sakit, sa katigulangon ug sa kawad-on sa kinabuhi, hatagan unta sila sa Dios ug kalig-on sa pagtoo ug bendisyonan unta sila aron malaumon silang magpakabuhi taliwala sa ilang mga kalisdanan. Mag-ampo kita.

5. Alang kanila nga mapasalamaton sa Dios hilabina nila hatagan unta sa Dios sa mga grasya nga ilang gikinahanglan. Mag ampo kita.

6. Alang sa atong mga igsoon nangamatay hilabina sila makaangkon na unta sa kinabuhing tunhay. Mag-ampo kita.

PARI: Langitnong Amahan, nangamuyo kami nga hatagan mo untag katumanan ang among mga pag-ampo, pinaagi ni Kristo, among Ginoo, Amen.