Ikanapulog-pito nga Domingo

IKA-NAPULO'G PITO NGA DOMINGGO

a. UNANG BASAHON

Genesis 18:20-32

Ang pagbasa gikuha gikan sa basahon sa Genesis.

Ang Ginoo miingon kang Abraham, "Hilabihan na ang mga mulo batok sa Sodoma ug sa Gomora, ug ang ilang sala dako kaayo. Busa molugsong ako aron susihon kun tinuod ba ang mga mulo nga akong nadungog."

Unya mibiya ang duha ka tawo ug mipadayon paingon sa Sodoma, apan nagpabilin ang Ginoo uban kang Abraham. Giduol ni Abraham ang Ginoo ug gipangutana, "Laglagon mo ba gayud ang mga walay sala uban sa mga makasasala? Pananglit adunay kalim-an ka tawo nga walay sala didto, laglagon mo ba ang tibook siyudad? Dili mo ba kini pasayloon aron lamang pagluwas sa kalim-an ka tawo? Sa walay duhaduha dili mo gayud patyon ang mga walay sala uban sa mga makasasala. Dili mo kana mabuhat! Kay kun buhaton mo kini, ang mga walay sala mahiagom sa silot uban sa mga makasasala. Dili kana mahitabo! Ang Maghuhukom sa tibuok kalibutan kinahanglang magbuhat sa angay gayud."

Ang Ginoo miingon, "Kun makakaplag ako'g kalim-an ka tawo nga walay sala didto sa Sodoma, dili ko silotan ang tibook siyudad tungod lamang kanila."

Unya miingon na usab si Abraham, "Ginoo, pasayloa nga mangahas ako pagpadayon sa pagpakigsulti kanimo. Tawo lamang ako ug walay katungod pagsulti bisan unsa. Apan tingali'g aduna lamay kap-atan og lima ka tawo nga walay sala didto inay nga kalim-an? Laglagon mo ba ang tibook siyudad tungod kay kulang na man og lima?"

Ang Ginoo mitubag, "Dili ko kini laglagon kun makakaplag ako'g kap-atan og lima ka tawo nga walay sala."

Unya miingon na usab si Abraham, "Tingali'g kap-atan ra ka tawo ang walay sala." Ang Ginoo mitubag, "Dili ko laglagon kini kun adunay kap-atan ka tawo nga walay sala."

Si Abraham miingon, "Ayaw intawon kasuko, Ginoo, nga mopadayon ako sa pagsulti. Pananglit katloan lamang ka tawo?" Ang Ginoo mitubag, "Dili ko laglagon kini kon makakaplag ako'g katloan ka tawo."

Miingon si Abraham, "Pasayloa intawon ako, Ginoo, nga mangahas ako pagpadayon sa pagpakigsulti kanimo. Pananglit makakaplag ka lamang og kawhaan ka tawo?" Ang Ginoo mitubag, "Dili ko laglagon ang siyudad kun makakaplag ako'g kawhaan ka tawo."

Si Abraham miingon, "Ayaw intawon kasuko, Ginoo, niining katapusan kong pagsulti. Pananglit aduna lamay napulo nga imong makaplagan, unsa may mahitabo?" Ang Ginoo mitubag, "Dili ko kini laglagon kun adunay napulo."

Mga igsoon, ang Pulong sa Ginoo.

b. SALMO RESPONSORYO

Salmo 138:1-2,2-3,6-7,7-8

Tubag (R)-Ginoo, gitubag mo ako sa adlaw nga nangayo ako'g hinabang.

Pasalamatan ko ikaw, O Ginoo, sa tibook kong kasingkasing. Kay imong gidungog ang mga pulong sa akong baba; sa atubangan sa mga anghel awiton ko ang imong pagdayeg; magasimba ako sa imong balaan nga templo, ug pasalamatan ko ang imong ngalan. (R)

Tungod sa imong kalooy ug imong kamatuoran; kay imong gipadala labaw sa tanang butang ang imong ngalan ug ang Imong saad. Sa akong pagsangpit gipatalinghogan mo ako; imo akong gilig-on sulod sa akong kaugalingon. (R)

Ang Ginoo hataas, apan bisan pa niana nagatan-aw siya sa mapaubsanon, ug ang mapahitas-on iyang hiilhan gikan sa layo. Bisan ako taliwala sa kagul-anan, imo ako nga bantayan; batok sa kapungot sa akong mga kaaway imong gibakyaw ang imong kamot. (R)

Ang imong tuong kamot nagaluwas kanako, ang Ginoo maghingpit sa iyang gihimo kanako; ang imong kalooy, 0 Ginoo, nagalungtad sa kahangturan ayaw pagbiya ang buhat sa imong kamot. (R)

c. IKADUHANG BASAHON

Colosas 2:12-14

Ang pagbasa gikuha gikan sa sulat ni San Pablo ngadto sa taga Colosas.

Sa pagbunyag kaninyo gilubong kamo uban ni Kristo, ug sa pagbunyag usab kaninyo gibanhaw kamo uban ni Kristo pinaagi sa inyong pagtoo sa gahum sa Dios nga nagbanhaw kaniya. Kaniadto patay kamo sa espiritu tungod sa inyong mga sala ug tungod kay dili man kamo mga Judio ug busa wala mahisakop sa Balaod. Apan karon gibanhaw na kamo sa Dios uban ni Kristo! Gipasaylo na kita sa Dios sa tanan tang mga sala. Gipapas niya ang tanang tang mga utang lakip ang mga kasabutan bahin niini ug giwagtang niya ang tanan pinaagi sa paglansang niini didto sa krus.

Mga igsoon, ang Pulong sa Ginoo.

d. EBANGHELYO

Lucas 11:1-13

Ang pagsangyaw sa Maayong Balita sumala ni San Lucas,

Usa niana ka higayon nag-ampo si Jesus didto sa usa ka dapit. Sa pagkahuman niya'g pag-ampo, miingon ang usa sa iyang mga tinun-an, "Ginoo, tudloi kami sa pag ampo, ingon nga gitudloan ni Juan ang iyang mga tinun-an."

Si Jesus miingon kanila, "Ingna ninyo niini pag-ampo: Amahan, Simbahon unta ang imong ngalan. Maghari ka unta kanamo. Ihatag kanamo sa matag-adlaw ang kalan on nga among gikinahanglan. Ug pasayloa kami sa among mga sala, kay nagpasaylo kami sa tanan nga nakasala kanamo. Ayaw kami ibutang sa lisod nga pagsulay."

Ug miingon si Jesus sa iyang mga tinun-an, "Pananglit usa kaninyo moadto sa balay sa usa ka higala sa tungang gabil ug moingon kaniya, 'Bay, pabayloa ko'g tulo ka buok pan, kay miabot sa amo ang usa ka higala nga nagpanaw ug wala gayud akoy ikadalit kaniya.' Kun pananglit tubagon ka sa imong higala didto sa sulod, Ayaw na ako'g samoka! Gitrangkahan na ang pultahan, ug ang akong kabataan ug ako nanghigda na, ug dili na ako makabangon sa paghatag kanimo bisan unsa.' Unsa may imong buhaton? Sultihan ko kamo nga bisa'g higala ka niya, dili siya mobangon ug mohatag kanimo'g pan; apan mobangon na lang ug mohatag kanimo sa tanan nga imong gikinahanglan, kay wala ka man maulaw sa pagpunay og pangayo. Busa sultihan ko kamo: Pangayo kamo, ug kamo hatagan; pangita kamo, ug kamo makakaplag; pagtuktok kamo, ug ablihan ang pultahan alang kaninyo. Kay ang tanan nga mangayo hatagan, ug siya nga mangita makakaplag, ug ang pultahan ablihan alang kaniya nga magtuktok. May usa ba kaninyong mga amahan nga mohatag sa iyang anak og bitin kun siya mangayo'g isda? O mohatag ba kamo kaniya'g tanga kun mangayo siya'g itlog? Bisan pa sa inyong pagkadautan, mahibalo kamong mohatag og maayong mga butang ngadto sa inyong mga anak. Nan, ang amahan nga atua sa langit labaw pang mohatag sa Espiritu Santo kanila nga mangayo kaniya!"

Mga igsoon, ang Maayong Balita sa atong Ginoo.

e. KOMENTARYO

Tema: Pag-ampo nga Mapadayonon Tubagon sa Ginoo!

Diha sa Ebanghelyo ni San Lukas, si Jesus naghisgot mahitungod sa pag-ampo sa usa niya ka disipulo, "Ginoo tudloi kami sa pag-ampo, sama usab nga si Juan mitudlo sa iyang mga tinun-an." Mao kini ang mga panultihon ni Jesus sa pagtubag sa mga hangyo Kaniya: una mao ang Amahan Namo, ikaduha mao ang "parable of the persistent friend" ug mahitungod sa pagpangayo. Ang han-ay sa pag-ampo pamilyar na sa ato: gingharian, kalan-on (pagkaon), pagpasaylo ug ilikay pagsulay. Apan ang estorya sa Ebanghelyo ni San Lukas adunay kalahian sa Ebanghelyo ni Mateo. Simple lang kung sundon nato ang pag-ampo gikan kang Lukas. Pagkahuman niining pag-ampo gisundan dayon sa usa ka sambingay. Ang sambingay adunay tulo ka saysay. Ang una mao ang usa ka amigo nga milakaw sa kagabhion, mituktok sa pultahan ug miingon, "Higala, pahulama ko og tulo kabuok pan." Ang panultihon nga "Higala", pananglitan usa sa inyoha naay higala, moadto mo sa iyaha sa gabii ug mosulti, "Higala, pahulama ko og tulo kabuok pan, kay ang usa nako ka higala miabot ug wala koy ikadalit kaniya.' Ang misunod na linya nagikan sa sulod: "Ayaw ko disturboha. Ang pultahan nakasarado na. Ang akong mga anak naa na sa higdaanan, kauban nako ug dili na gayod ako mobangon aron mohatag kanimo og bisan unsa." Ang ikatulo nga linya nga panultihon gikan kang Hesus mahitungod sa pagpadayon sa pagpangayo. Bisan, ang higala dili na mobangon aron mohatag kaniya og bisan unsa kay tungod managhigala sila sa ulahing bahin, mobangon ang higala ug mohatag og bisan unsa kay tungod managhigala man sila. Ang iyang makanunayon nga paghangyo, gantihan gayud. Mao nga ang ikaduhang tubag ni Jesus sa Iyang disipulo nga mopadayon lang sa pag-ampo.

Ang mosunod nga panghitabo usa ka memorable structure: "So ask and it will be given; search and you will find; knock and the door will be opened. "Ang han-ay: ask, search, knock. Ang ikaduhang bahin halos magkapareha og han-ay: whoever asks receives, whoever searches find, whoever knocks will be opened. Ask, search, knock: ASK. Kung ang inyong anak mangayo og isda, hatagan ba ninyo og halas? Kung mangayo og itlog, hatagan ba kini ninyo og tanga? Ang han-ay: isda/halas, itlog tanga." Busa, kon kamo gani nga mga dautan makamao mohatag og mga maayong gasa sa inyong mga anak, nan labaw pa nga mohatag ang Langitnong Amahan sa Espiritu Santo ngadto kanila nga nangayo Kaniya. Ang keyword, "ask kon mangayo."

Ang tono sa mga panultihon ni Jesus "ASK" mangayo ug sa atong kanunay'ng paghangyo ang Ginoo, padayon sa paghatag sa atong mga panginahanglan. Kanunay nato madungggan ang pag-ampo sa Ginoo nga naghangyo. Makita nato nga ang pag-ampo ni Jesus mga "series of commands" sa Ginoo: balaan, ihatag, pasaylo... Mao ni ang mga pamaagi ni Jesus sa iyang mga tinun-an ug sa ato kung unsa ang iampo ug unsaon pag-ampo.

Nindot kaayo ang sambingay. Kining sambingay mahitungod sa duha ka maghigalaay nga nagtubaganay sa pultahan. Ang tawo nga naa sa sulod sa balay dili na mobangon ug mohatag og bisan unsang butang sa tawo nga anaa sa gawas apan tungod gayod sa iyang pagkawalay ulaw niini, mobangon na lang siya og mohatag kaniya sa bisan unsa nga iyang gikinahanglan.

Ang pinaka-ulahing panultihon nagpunting sa mga tinun-an: pangayo ug pagahatagan kamo, pangita ug makakaplag kamo, panuktok ug paga ablihan kini kaninyo. Kay si bisan kinsa nga mangayo makadawat, ug ang mangita makakaplag, ug siya manuktok paga-ablihan. Ang pagpanudlo ni Jesus mahitungod sa pag-ampo simple lang ug deretsahan. Maayo kini ang pagkasulti ug dili nagpakiluoy.

Kinahanglan nato ang pag-ampo. Ang pag ampo alang sa espirituwalidad sa atong kinabuhi. Kung dili kita mag-ampo dili kita makalahutay sa atong kinabuhing espiritwal. Isip mga anak sa Dios, ang pag-ampo moabot lang na natural. Ug tinuod gayod nga kita mismo wala nakahibalo kung unsaon pag-ampo o unsa ang iampo. Kana, kinahanglan gayod kita nga tudloan sa pag-ampo. Walay laing maayong magtutudlo sa pag-ampo kung dili si Jesus mismo. Ug kana makaingon kita kang Jesus, Ginoo tudloi kami sa pag-ampo.

Si Jesus mihatag kanato "Amahan sa Namo". Mao ni ang mubo nga version nga gisulti dinhi ni San Lukas. Kining pag-ampo masulti nato dili lamang pinaagi sa atong baba kung dili pinaagi sa atong kasingkasing. Pabalikbalik kita nga mangayo, pabalikbalik kita nga mangita, ug pabalikbalik kita nga manuktok, dili kay ang Ginoo wala nakadungog sa atong mga pangaliya kung dili sa atong matag pangayo, matag pangita, ug matag panuktok atong giablihan ang atong mga kasingkasing nga modawat sa grasya nga gusto ihatag sa Dios diha sa pagtubag sa atong mga pag-ampo.

Giya alang sa Pamalandong:

1. Nakasinati ba ako sa mga bunga sa akong kinabuhing maampoon sama sa kalinaw sa kahiladman?

2. Mapadayonon ba ako sa akong pag-ampo bisan kon ang tubag sa Ginoo dili pa klaro alang kanako?

f. PANGALIYA

Pangulo:

Uban sa dakung pagsalig, atong ihalad sa Amahan ang atong mga pag ampo ug panginahanglan. Sa matag pangamuyo moingon kita: GINOO, DUNGGA ANG AMONG PAG-AMPO.

1. Mag-ampo kita alang sa atong Santo Papa, mga Obispo ug kaparian nga pinaagi diha sa ilang matinud-anon nga pagsaksi sa Ebanghelyo, ilang makabig ang mga katawhan sa paghatag og dakung gimbug-aton sa espirituhanong bahin sa ilang kinabuhi. Moingon kita..

2. Mag-ampo kita alang sa mga lideres sa nasud nga madasigon sila sa pagsaksi nga matinud-anon sa ilang mga saad diha sa pagtubag sa mga panginahanglan sa gong mga kabus. Moingon kita.

3. Mag-ampo kita alang sa matag katilingban nga makabaton sa hiyas sa pagkamaampoon ang tinubdan sa tanang kalig-on. Moingon kita...

4. Mag-ampo kita nga sama kang Kristo, nga ang pag-ampo mahimong kabahin sa inadlaw-adlaw natong pagkinabuhi bisan pa man sa kadaghan sa atong mga gimbuhaton. Moingon kita...

5. Mag-ampo kita nga makabaton kita og igong kaisog sa pagtubag sa tawag sa Dios sa tumang kaligdong ug kamatinud-anon. Moingon kita..

6.Mag-ampo kita alang sa atong kaugalingon nga katuyuan diha sa kahilum.

Pangulo:

Amahan nga Langitnon, mahinangpon kami nga amo nang matagamtaman ang grasya nga lmong gitagana kanamo alang sa among panginahanglan gikan sa Imong maayong kabubut-on pinaagi ni Kristo among Ginoo ug Manunubos. Amen.