IKA-NAPULO'G-UPAT NGA DOMINGGO

IKA-NAPULO'G-UPAT NGA DOMINGGO

a. UNANG BASAHON

Isaias 66:10-14

Ang pagbasa gikuha gikan sa basahon ni Propeta Isaias.

Duyog sa kalipay sa Jerusalem, ug pagsadya tungod kaniya, kamong tanan nga nahigugma kaniya; duyogi ninyo siya sa kalipay, kamong tanan nga nagbangotan tungod kaniya; aron kamo mosuso ug mabusog sa iyang mapinanggaong dughan; aron kamo moinom nga malipayon sa iyang daghang gatas.

Kay nag-ingon ang Ginoo, "Pauswagon ko siya sama sa suba, ug padaghanon ko ang bahandi sa kanasuran sama sa nagbaha nga sapa; ug magsuso ka, kugoson ka niya diha sa iyang bat-ang, ug ugay-ugayon diha sa iyang sabakan. Ingon sa anak nga lipayon sa iyang inahan, lipayon ko usab kamo didto sa Jerusalem.

Inigkakita ninyo niini, magmalipayon kamo, ug mosanay kamo Ingon sa balili; masayran unya nga ang gahum sa Ginoo anaa sa lyang mga alagad; ug pahamtangan niya sa lyang kasuko ang mga kaaway."

Mga igsoon, ang Pulong sa Ginoo.

b. SALMO RESPONSORYO

Salmo 66:1-3,4-5,6-7,16,20

Tubag (R)-Pasinggita ang tibook yuta ngadto sa Ginoo uban sa kasadya.

Singgit kamo nga malipayon ngadto sa Dios, kamong tanan diha sa yuta, awiti'g pagdayeg ang himaya sa iyang ngalan; Isangyaw ang iyang mahimayaong kadayeganan. Ingna ang Dios, "Pagkamakalilisang sa imong mga binuhatan." (R)

Pasimbaha kanimo ang tibuok yuta ug paawiti'g pagdayeg kanimo, paawiti'g pagdayeg sa imong ngalan! Umari kamo ug tan-awa ang mga buhat sa Dios, ang iyang makalilisang nga mga buhat diha sa katawhan. (R)

Giusab niya ang dagat ngadto sa pagka-mamala; latas sa suba nanglabang sila nga nagtiniil; busa magsadya kita diha kaniya. Nagamando siya pinaagi sa iyang gahum hangtud sa kahangturan. (R)

Pamati karon, kamong tanan nga nahadlok sa Dios, samtang akong isaysay unsa ang iyang nahimo kanako, dayegon ang Dios nga wala mobalibad kanako sa akong pag-ampo o sa iyang kalooy. (R)

c. IKADUHANG BASAHON

Galacia 6:14-18

Ang pagbasa gikuha gikan sa sulat ni San Pablo ngadto sa taga-Galacia.

Apan alang kanako magpasigarbo lamang ako sa krus sa atong Ginoong Jesukristo, kay pinaagi sa iyang krus patay na ang kalibutan alang kanako, ug ako patay na alang sa kalibutan. Dili mahinungdanon kun ang usa ka tawo tinuli ba o dili. Ang mahinungdanon mao nga siya bag-o nang binuhat. Alang niadtong nagsunod niining lagdaa, panghinauton ko nga ang kalinaw ug kalooy mag-uban kanila ug sa tanang katawhan sa Dios!

Sa katapusan, manghinaut ako nga wala na untay magsamok kanako kay ang mga ulat nga ania sa akong lawas nagmatuod nga ulipon ako ni Jesus. Mga igsoon, ang grasya sa atong Ginoong Jesukristo mag-uban unta kaninyong tanan. Amen.

Mga igsoon, ang Pulong sa Ginoo.

d. EBANGHELYO

Lucas 10:1-12,17-20 O 10:1-9

Ang pagsangyaw sa Maayong Balita sumala ni San Lucas.

Human niini, gipili sa Ginoo ang laing kapitoan og duha ka mga lalaki. Gipadala niya sila sa tinagurha aron mag-una kaniya ngadto sa tagsatagsa ka lungsod ug dapit nga iyang adtoan.

Miingon siya kanila, "Ang anihon daghan, apan diyotay ra ang mga mangangani. Busa pag-ampo kamo sa tag-iya sa anihon aron magpadala siya'g dugang pang mamumuo nga moanhi niini. Lakaw kamo, nagpadala ako kaninyo nga sama sa mga nating karnero ngadto sa mga lobo. Ayaw pagdala og puntil, ni sudlanan sa limos, ni sandalyas; ayaw kamo paghunong aron paghimamat kang bisan diha sa dalan. Bisan diing balaya kamo moabot, unaha ninyo pag-ingon, 'Ang panagdait maania niining balaya.'

Kun didto may nagpuyo nga mahigugmaon sa pakigdait, ibilin kaniya ang inyong yukbo sa pakigdait; kun wala, bakwi-a ang inyong yukbo sa pakigdait. Pabilin kamo niadtong balaya, ug kaon ug Inom sa ilang idalit kaninyo; kay ang mamumoo angay gayud nga suholan. Ayaw pagbalhinbalhin gikan sa usa ka balay ngadto sa lain.

Kun moadto kamo sa usa ka lungsod ug dawaton kamo nila, kaon sa idalit kaninyo; ayoha ang mga masakiton niadtong lungsora, ug sultihi ang mga tawo didto nga hapit na moabot kanila ang paghari sa Dios. Apan kun moadto kamo sa usa ka lungsod ug dili kamo nila dawaton didto, gula kamo ngadto sa kadalanan ug Ingna ninyo ang mga tawo, 'Bisan ang abog sa inyong lungsod nga mitapot sa among mga till among taktakon batok kaninyo; apan timan-i nga hapit na maghari ang Dios kaninyo!' Sultihan ko kamo nga sa Adlaw sa Paghukom, ang Dios mas malooy pa sa Sodoma kay niadtong lungsora!

Unya nahibalik ang kapitoan og duha nga malipayon kaayo ug miingon, "Ginoo, bisan ang mga yawa mipatoo kanamo sa among paghingilin kanila sa imong ngalan!" Si Jesus mitubag kanila, "Nakita ko si Satanas nga nahulog ingo'g kilat gikan sa langit. Pamati kamo! Gihatagan ko kamo'g gahum aron makahimo kamo pagyatak sa mga bitin ug sa mga tanga, ug sa tanang gahum sa Yawa, ug walay makaunsa kaninyo.

Apan ayaw kamo'g kalipay tungod kay ang mga yawa mipatoo kaninyo, kondili paglipay hinoon kamo kay ang inyong mga ngalan nahisulat didto sa langit!"

Mga igsoon, ang Maayong Balita sa atong Ginoo.

e. KOMENTARYO

Tema: Ang Misyon Malukpanon

Ang atong Ebanghelyo karon naghisgot mahitungod sa panaw ni Jesus paingon sa Jerusalem diin Iyang atubangon ang katapusang yugto sa Iyang kinabuhi ug misyon ug Iyang gisuginlan ang mga tinun-an nga magpadayon sa Iyang misyon, sa pagsangyaw sa Maayong Balita. Una na niyang gipadala ang napulo'g duha ka mga tinun-an. Karon laing kapitua og duha ka mga tinun-an. Makahuluganon kining mga numero nga 12 ug 72 nga maoy gipadala ni Jesus sa misyon. Una, ang 12 naghulagway alang sa 12 ka tribo sa Israel tungod kay ang usa sa tumong ni Jesus mao ang pagpahiuli sa kanasuran ngadto sa pagkamatinud-anon sa kabubut-on sa Dios. Ug ang 72 naghulagway usab sa mga langyaw ug pagano nga mga nasud matud pa sa tradisyon sa Daang Kasulatan kay sila kabahin usab sa misyon ni Kristo tungod kay ang misyon sa Anak sa Dios dili lamang alang niadtong mga mituo ug misunod Kaniya, apan alang kini sa tanan, walay pinili.

Ang 72 ka mga disipulo ni Jesus, naghulagway kini kanatong tanan, karon ug sa sunod nga kaliwatan nga gidapit sa pagsalmot sa pagsangyaw sa Maayong Balita sa Ginoo ngadto sa tanan. Sagad natong madungog ang kasamtangan nga hagit alang kanato nga mga sumusunod ni Kristo, ang Ebanghelisasyon. Isip mga tinugyanan sa pagtulun-an sa Ginoo, dako gayud kining hagit kanatong tanan nga mapakaylap ang mensahe sa Maayong Balita sa Ginoo sa tibuok kalibutan. "Pagkadaghan sa anihonon, apan diyotay ra ang mamumuo" (Cf. PCBA). Ang mga mamumuo nga gipasabot ni Jesus dili lamang alang niadtong tinugyanan sa katungdanan sama pananglit sa mga professionals, kaparian ug mga relihiyoso. Apan kanatong tanan, ang matag-usa kanato gitawag sa pagpadayon sa misyon sa Simbahan sa ngalan ni Kristo Jesus.

Klaro nga ang paghatag ni Jesus og instruksyon sa 72 ka mga tinun-an alang usab kanato. Karon gidapit kita Niya sa pagtuon kung unsa ang usa ka magsasangyaw. Una, ang kalipay nga atong makita diha sa atong pagsalig sa Ginoo. Nagmaya kita sa kaayo nga gidala niini sa atong kinabuhi. Diha sa atong Unang Pagbasa, gihulagway ni Propeta Isaias ang kalidad sa usa ka magsasangyaw, dili matukib ang kasadya nga gibati sa pagdawat sa grasya sa Ginoo. Ikaduha, kinahanglan nga hugot ang pagtoo sa magsasangyaw, walay pagduhaduha nga mopakaylap sa mensahe. Ang mga disipulo ni Jesus gisuginlan nga ang mensahe nga ilang gidala mao ra ang bugtong nilang bahandi; dili na maghunahuna pa og lain pang butang. Ang ilang pagtoo ang mamahimong sukaranan nga makakabig og lain pang magsasangyaw ginamit ang mga nakat-onan sa mensahe nga gidala. Ikatulo, ang tinuod nga magsasangyaw magdala og kalinaw sa uban (peacemakers). Si Jesus miingon, "gipadala ko kamo ingon nga mga nating karnero taliwala sa mga lobo" (cf. PCBA). Ang karnero nagasimbolo sa pagkamaaghop, pagkamalumo (gentle), ug panagdait (peace). Ang Kristiyano, matud pa, sa iyang panglantaw sa mga butang, siya usa ka peacemaker. Kini usa ka mahinungdanon nga aspeto sa kinabuhing Kristiyano ilabina sa atong kasamtangan nga sitwasyon sa atong sosyodad ug sa tibuok kalibutan, nga adunay kagubot, gubat, patay ug uban pa. Ika-upat, gipadala sila ni Jesus tinagurha (by two's) kay sa pagkinabuhi isip katilingban importante ang adunay katimbayayong sa panaw, kay walay tawo nga nagkinabuhi nga nag-inusara. Ug sa katapusan, angay bantayan ang paghatag og dungog sa kaugalingon gumikan sa kahanas sa pagtuman sa misyon ug kaugalingon na lamang ang nasentro sa pagsangyaw, nakalimtan na ang tumong sa pagsangyaw ug nalimtan na kung kinsa ang nagpadala kaniya.

Mamahimong matuman nato ang mga instruksiyon nga gisulti sa atong Ginoo ug kita matawag nga maayong magsasangyaw, apan ang labing mahinungdanon mao ang kalidad sa atong pagtubag sa awhag ni Jesus sa pagbuhat sa Iyang misyon luyo sa mga kasakit nga Iyang nasinati. ug kalisod Sa atong bahin usab sa nagkadaiyang hagit sa kinabuhi, sa pamilya o sa katilingban. Sama ni San Pablo, wala gayud siyay ikapanghambog gawas lamang sa pagsangyaw sa kaluwasan ug sa Iyang pagtoo kang Kristo Jesus. Sa atong pagsunod kang Kristo, atong batonan nga kinahanglan kitang mopas-an sa atong kaugalingong krus adlaw'ng tanan.

Giya alang sa Pamalandong:

1. Madasigon ba akong nagsangyaw sa Maayong Balita diha sa akong pulong ug buhat?

2. Andam ba akong mosakripisyo tungod og alang sa akong paghigugma kang Kristo?

f. PANGALIYA

Pangulo: Ang gugma ug kalooy sa Dios dili matugkad ug walay sukod. Busa sa tumang pagsalig ato karong ihalad Kaniya ang atong mga panginahanglan ug sa matag pangamuyo kita motubag: DUNGGA KAMI, GINOO.

1. Alang sa kinatibuk-ang Simbahan, sa mga laykong nangulo niini nga mapuno sila sa kadasig ug kalipay diha pagsangyaw sa mensahe sa kaluwasan ilang gipaambit sa tanan. Mag-ampo kita.

2. Alang sa mga nagdumala sa mga kanasuran, nga motuhop sa ilang galamhan ang mga Kristohanong mensahe aron sila motubag nga matinud-anon sa tawag sa pagkamaalagaron ngadto sa tanang katawhan ilabina sa mga nanginahanglan. Mag-ampo kita.

3. Alang sa matag GKK, nga mahatagan og kinabuhi ang ehemplo nga gipadayag ni Kristo nga maoy magsilbing lig-on nga pundasyon sa pagmugna og usa ka malinawon ug hapsay nga katilingban. Mag-ampo kita.

4. Alang sa mga nag-antus sa kawad-on ug mga nagmasakiton natong mga igsoon, nga sila sa ilang pagtoo ug pagsalig sa Ginoo nga maoy tinubdan sa kalooy, gugma ug kahupayan. Mag-ampo kita.

5. Alang kanatong tanan nga makaplagan nato ang matuod nga kalinaw sa atong kasingkasing sa makanunayon natong pagpakighiusa sa Dios diha sa atong mga pag-ampo ug pagdawat Kaniya diha sa Santos nga Yukaristiya. Mag-ampo kita.

6. Alang sa atong personal nga katuyuan, ato kining ihalad diha sa kahilum.

Pangulo: Langitnon namong Amahan, nasayud Ka sa among mga pangandoy ug panginahanglan. Malaumon kami nga Imo nang kahatagan og katumanan ang mga pag-ampo nga among gihalad karon pinaagi ni Kristo Imong Bugtong Anak ug among Ginoo hangtud sa kahangturan. Amen.